މީހެއްގެ ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް، އޭނާގެ ހިއްސާ އޮންނަ ކުންފުނީގެ ބެންކު އެކައުންޓުން 279،000 އަށް ވުރެ ގިނަ ރުފިޔާ ނެގި މައްސަލައިގައި އިތުރު ތިން މީހުން ހައްޔަރުކޮށްފި އެވެ.
ވީ ކިހިނެއް؟ - ފުލުހުން އިތުރު ބަޔަކު މި ހައްޔަރުކުރީ އެ މައްސަލާގައި މިހާރު ކުރިއަށްދާ ތަހުގީގުގެ ތެރޭގަ އެވެ. 
މިދިޔަ އަންގާރަ ދުވަހުން ފެށިގެން ހިންގަމުން އަންނަ ތަހުގީގުގައި ތިނަދު އާއި އައްޑޫ ހިތަދޫ ޕޮލިސް ވެސް ވަނީ ބައިވެރިވެފަ އެވެ.
އެންމެ ފަހުން އެ މައްސަލައިގައި ހައްޔަރުކުރި މީހުންނަކީ:
މުނާޒު ޖައުފަރު، 24، ނާދީ/ސ. ހުޅުދޫ
މުހައްމަދު ނާއިޝް ނަބީލް، 24، އަތިރީއައްސޭރި/ގދ. ގައްދޫ
ހަސަން ވިއާމް، 19، ހާލަމް/ސ. ހިތަދޫ
ބުނީ ކީކޭ؟ - ފުލުހުން ބުނީ އެމީހުންގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން މުނާޒުގެ ބަންދަށް 15 ދުވަސް، ވިއާމްގެ ބަންދަށް 10 ދުވަސް އަދި ނާއިޝްގެ ބަންދަށް ހަތް ދުވަސް ކޯޓުން ދީފައިވާ ކަމަށެވެ.
ތަފްސީލު - މި މައްސަލައިގައި މީގެ ކުރިން 10 މީހުން ވަނީ ހައްޔަރުކޮށްފަ އެވެ. އެއީ:
މުހައްމަދު ހަސަން، 59، ގުޑްލައިފް/ ލ. އިސްދޫ
އަލީ އިރުފާނު އަޙްމަދުދީދީ، 26، އުދަ/ ސ. ހިތަދޫ  
އަލީ ޝިރާޒު، 38، ނަންރީތިގެ/ ސ. ހިތަދޫ  
އަބްދުﷲ ނާފިޒް، 39، ޕެރިމްރޯޒް/ ހދ. ވައިކަރަދޫ 
މުހައްމަދު އަލީ، 42، ފޫހިވާގެ / ގއ. ކަނޑުހުޅުދޫ 
މުހައްމަދު ނުހާދު އަލީ، 30، މ. މާލޭގެއާގެ 
މުހައްމަދު ސިމާދު، 38، ޕެނަމާ / ހއ. ކެލާ 
އަލީ އިމްރާން، 38، ހީނާމާގެ / ގދ. ފިޔޯރީ 
އަބްދުﷲ އިސްރާގު، 19، ގުލްބަކާގެ / ގދ. ތިނަދޫ 
މުހައްމަދު އިބްރާހީމް، 49، މެޑޯޒް / ކ. ހިންމަފުށި
އޭގެ ތެރެއިން އެކި މީހުންގެ ބަންދަށް އެކި މުއްދަތު ދީފައިވާއިރު، ފުލުހުން ބުނީ މުހައްމަދު އަލީގެ ބަންދާ މެދު ގޮތެއް ނިންމަން ދެ ވަނަ ފަހަރަށް ކޯޓަށް ހާޒިރުކުރުމުން 30 ދުވަހަށް ބަންދުކުރަން ކޯޓުން އަމުރުކޮށްފައިވާ ކަމަށެވެ.
އެނގުން މުހިންމު - ފުލުހުން މީގެ ކުރިން ބުނެފައިވާ ގޮތުގައި އެ މީހުންގެ ތެރެއިން ހަ މީހަކު ވަނީ ސްކޭމްކޮށްގެން ހޯދާފައިވާ ފައިސާ އެ މީހުންގެ އެކައުންޓަށް ޖަމާކޮށް، އެ ފައިސާ ނަގާފަ އެވެ. އަދި އެތަނުން އެކަކު، ސްކޭމްކޮށްގެން ހޯދި ފައިސާ އެކި ވިޔަފާރިތަކަށް ޖަމާކޮށް އެ ފައިސާއަށް މުދާ ގަނެފައިވާއިރު އަނެއް ތިން މީހުންނަކީ އެކި މީސް މީހުން އޭޓީއެމްއަށް ގެންގޮސްގެން އެ މީހުން މެދުވެރިކޮށް އޭޓީއެމުން ފައިސާ ނެގުމަށް ފަހު އެ ފައިސާތަކާ ހަވާލުވެފައިވާ މީހުންނެވެ.