ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުން. ވިކްޓަރީ ސްޕޯޓްސް ކްލަބް 1-0 އިން ބަލިކޮށް ޓީސީ ސްޕޯޓްސް ކްލަބުން ޖެހިޖެހިގެން ތިން ވަނަ މެޗުން މޮޅުވެއްޖެ އެވެ.
މުހައްމަދު އާތިފް (އާތީ) ހަވާލުވި ފަހުން ނަތީޖާތައް ރަނގަޅުކޮށްފައިވާ ޓީސީން މި ވަނީ ތިން ހަފްތާއެއްހާ ދުވަސްތެރޭ ލީގުގައި ޖެހިޖެހިގެން ތިން މެޗުން މޮޅުވަ އެވެ. އެ ގޮތުން، ޓީސީން ވަނީ ވިކްޓަރީ އަތުން މޮޅުވުމުގެ ކުރިން، ކްލަބް ވެލެންސިއާ އާއި ކްލަބް ގްރީން ސްޓްރީޓްސް އަތުން ވެސް މޮޅުވެފަ އެެވެ.
މި ފަހަރުގެ ދިވެހި ޕްރިމިއާ ލީގުގެ ފޯމެޓް ރޭވިފައި އޮތް ގޮތުން، ލީގުގެ ފުލަށް ދާ ދެ ޓީމެއް ރެލިގޭޓްވާނެ އެވެ. އެހެންކަމުން، ރެލިގޭޝަނުން ސަލާމަތްވާން ލީގުގެ ފަހު މެޗުތަކަށް ދާއިރު، ހަތަރު ޓީމަކުން އަންނަނީ މަސައްކަތް ކުރަމުންނެވެ.
ޓީސީން ޖެހިޖެހިގެން ތިން މެޗުން މޮޅުވެ، ހަތް ވަނައިގައި އޮތީ 17 މެޗުން 18 ޕޮއިންޓް ހޯދައިގެންނެވެ. އަށް ވަނައިގައި އޮތް ކްލަބް ގްރީން ސްޓްރީޓްސް އަށް 16 މެޗުން 11 ޕޮއިންޓް ލިބިފައިވާއިރު، ނުވަ ވަަނައިގައި އޮތް ވެލެންސިއާ އަށް 16 މެޗުން ލިބިފައި އޮތީ އަށް ޕޮއިންޓެވެ. އަދި، އެންމެ ފުލުގައި 16 މެޗުން ހަތް ޕޮއިންޓާ އެކު އޮތީ ޔުނައިޓެޑް ވިކްޓަރީ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގައި، ޓީސީގެ ހަމައެކަނި ލަނޑު މެޗުގެ 68 ވަނަ މިނިޓްގައި ކާމިޔާބުކުރީ ގާނާގެ ފޯވާޑް، ޕްރިންސް ބޯޑޫ އެވެ. އޭނާ މި ލަނޑު ޖެހީ ޕެނަލްޓީ އަކުންނެވެ. މި ޕެނަލްޓީ ލިބުނީ އޭރިއާތެރެއިން ޕްރިންސް އަށް ވިކްޓަރީގެ ކެޕްޓަން، އަމްދާން އަލީ (އެންޑީ) ފައުލުކުރުމުންނެވެ.
މެޗުގައި ވިކްޓަރީން ލަނޑެއް ޖެހޭތޯ ގިނަ މަސައްކަތްތަކެއް ކުރި ނަމަވެސް ކާމިޔާބެއްނުވި އެވެ.