ބްލަޑް ބޭންކުގައި ހުރި ލޭ އިންތިހާއަށް މަދުވެ، މިހާރު ހުރި ވަރުން ބަލިމީހުންނަށް ލޭ ނުދެވޭނެ ކަމުގެ ބިރު ބޮޑުވެއްޖެއެވެ. ލޭ ލިބުން ދަތިވެފައިވާކަން ހާމަކޮށް، މޯލްޑިވްސް ބްލަޑް ސާވިސަސް (އެމްބީއެސް)އިން އާންމުންގެ އެހީތެރިކަމަށް އެދުނީ މިދިޔަ ބުރާސްފަތި ދުވަހެވެ. https://sun.mv/217028 ލޭ ހަދިޔާކުރާ މީހުންނާއި ލޭ ބޭނުންވެގެން އެދޭ މީހުންނަށް ފަސޭހަކުރުމަށް އުފެއްދި ލޭ އެޕްގެ ފަރާތުން މިއަދު ބުނީ، ބްލަޑް ބޭންކުގައި މިވަގުތު ލޭ ހުރިވަރުން، ކެންސަރު ފަރުވާ ހޯދާ މީހުންނަށާއި މާބަނޑު މީހުންނަށާއި، ކޮންމެހެން ލެއަށް ޖެހިފައިވާ މީހުންނަށް ލޭ ނުދެވޭނެ ކަމަށާއި، އިންތިހާއަށް ބްލަޑް ބޭންކުގައި ހުރި ލޭ މަދުވެއްޖެ ކަމަށެވެ. އެހެންވެ، ލޭ އެޕުން ވަނީ، ލޭ ހަދިޔާކުރެވޭ މީހުން އެއްވެސް ލަސްކުރުމެއް ނެތި ލޭ ހަދިޔާކުރުމަށް ގޮވާލައިފައެވެ. https://x.com/leyapp_mv/status/2016528717967933844 ބްލަޑް ބޭންކުގައި ލޭ މަދުވި ސަބަބުތަކެއް ކަމަށް ލޭ އެޕުން ބުނީ، ލޭ ހަދިޔާކުރާނެ އާ މީހުން މަދުވުމާއި، ސްކޫލު ޗުއްޓީގައި ލޭ ހަދިޔާކުރާ މީހުން މަދުވުމާއި، މޫސުމީ ބަލިތަކާއި، ވައިނުސާފުވުމުގެ ސަބަބުން ބައެއް މީހުންނަށް ހޮސްޕިޓަލުތަކުގައި ފަރުވާ ދޭންޖެހުން ކަމަށެވެ. އަދި ރޯދަ މަހާ ދިމާކޮށް އާންމުގޮތެއްގައި ލޭ ހަދިޔާކުރާ މީހުންގެ އަދަދު މަދުވާކަން ވެސް ފާހަގަކޮށްފައިވެއެވެ. ލޭ އެޕުން ވަނީ، އަލަށް ލޭ ހަދިޔާކުރަން ބޭނުންވާ ފަރާތްތަކުން ލޭ ހަދިޔާކުރުމަށް ގޮވާލައިފައެވެ. ލޭ ހަދިޔާކުރާ މީހުންގެ ހަށިގަނޑުން ލޭ ނަގަނީ ލޭގެ ގްރޫޕު ދެނެގަނެ، ލޭ ހަދިޔާކުރާ މީހާގެ ސިއްހީ ހާލަތު ފަދަ ބަލަންޖެހޭ ބެލުންތައް ބެލުމަށްފަހު ކަމާއި، އެކަން ކުރަނީ ރައްކާތެރި ފިޔަވަޅު އެޅުމަށްފަހު ކަން، ލޭ އެޕުން ފާހަގަކުރިއެވެ. ލޭ ހަދިޔާކުރަން ބޭނުންވާ ފަރާތްތައް ހުޅުމާލޭގައި ނަމަ އޮރެންޖު ހިޔާ ނުވަތަ ހުޅުމާލެ ހޮސްޕިޓަލް، އަދި މާލެ ނަމަ އައިޖީއެމްއެޗަށް ގޮސް ލޭ ހަދިޔާކުރެވޭނެ ކަމަށް، ލޭ އެޕުން ބުންޏެވެ. ހުޅުމާލޭގެ އޮރެންޖު ހިޔާގައި ހުންނަ މޯލްޑިވްސް ބްލަޑް ސާވިސަސްގެ ބްލަޑް ބޭންކު ހުޅުވާފައި ހުންނާނީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 08:00 އިން ރޭގަނޑު 08:00 އަށެވެ. މޯލްޑިވްސް ބްލަޑް ސާވިސަސްއިން ބުނީ، ލޭ ހަދިޔާކުރާ މީހުން އުމުރުން 18އަހަރުން މަތިވެ، ބަރުދަން 45 ކިލޯއަށް ވުރެ މަތިވާން ވާނެ ކަމަށެވެ. އަދި ލޭ ހަދިޔާކުރާ މީހުން މަދުވެގެން ހަ ގަޑިއިރުގެ ނިދި ހަމަކުރުމާއި ލޭ ހަދިޔާކުރުމުގެ އެއް ގަޑިއިރު ކުރިން ކާން އެ ޚިދުމަތުން އިލްތިމާސްކުރެއެވެ.