އެމްޑީޕީގެ ކުރީ ސަރުކާރުން ކަނޑައަޅާފައިވާ އުސޫލުތަކާ އެއްގޮތަށް، އެ ސަރުކާރުގެ ގެދޮރުވެރިޔާ އާއި ބިންވެރިޔާ ސްކީމްގެ ދަށުން ފުލެޓަށާއި ގޯއްޗަށް ދެވަނަ ފަހަރަށް ލީ މީހުންގެ ތެރެއިން އިވެލުއޭޓްނުކުރާ ފޯމުތައް އިވެލުއޭޓްކުރުމަށްފަހު، މި ސަރުކާރުގެ ސްކީމްގެ ދަށުން ފުލެޓުތައް ދޫކުރުމަށް، ހުޅުމާލޭގެ ތިންވަނަ ފިޔަވަހީގެ ޔޫނިއަނުން މިއަދު ގޮވާލައިފިއެވެ. އެ ޔޫނިއަންގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކެންދޫ ދާއިރާގެ މެންބަރު އަދި ގާނޫނީ ވަކީލު ޢަލީ ޙުސައިން ވިދާޅުވީ، މިދިޔަ ސަރުކާރުން ގެދޮރުވެރިޔާ އާއި ބިންވެރިޔާގެ ދަށުން ހުޅުވާލި ދެވަނަ ފުރުސަތުގައި 9،000 މީހުންނަށް ފުލެޓު ދޭން އޭރު ކަނޑައެޅި ކަމަށާއި، އެ ފުރުސަތުގައި ގޯއްޗަށް ފޯމު ހުށަހެޅި މީހުންގެ ތެރެއިން 41،000 މީހުންގެ ފޯމު އޮތީ އިވެލުއޭޓްނުކޮށް ކަމަށެވެ. ޢަލީ ވަނީ، މި ސަރުކާރުން މަސައްކަތްކުރަނީ ފުލެޓު ލިބޭނެ ކަމަށް ކަނޑައެޅި 9،000 މީހުންނާއި ބާކީތިބި 41،000 މީހުން މިހާރު ހިއްކަމުން އަންނަ ރަސްމާލެއަށް ފޮނުވާލަން އުޅޭ ކަމަށް ތުހުމަތުކުރައްވައިފައެވެ. އޭނާ ވިދާޅުވީ، ސަރުކާރުން 600 މިލިއަން ޑޮލަރަށް ފުށިދިއްގަރުފަޅު ހިއްކަން ހަވާލުކުރީ، 400 މިލިއަން ޑޮލަރަށް އެ މަސައްކަތްކުރެވޭނެ ކަމަށް ސަރުކާރު ހިއްސާވާ ކުންފުނި އެމްޓީސީސީން ބުނެފައި ވަނިކޮށް ކަމަށެވެ. އެކަން ކުރަނީ ސަރުކާރުން ނާޖާއިޒު ފައިދާއެއް ނެގުމުގެ މަގުސަދުގައި ކަމަށް އޭނާ ތުހުމަތުކުރެއްވިއެވެ. "މި 50،000 އާއިލާއަކީ ހަގީގަތުގަ މާލެ ސަރަހައްދުން ގޯތި ނުވަތަ ފުލެޓު ހޯދަން ހުށަހަޅައި، ފޯމު ބަލައިގެންފައިވާ މީހުންނާއި ފުލެޓު ލިބޭނެކަމަށް ކަނޑައަޅާފައިވާ ފަރާތްތައް، އެހެންވީމާ ކޮން އުސޫލަކުން ކޮން ހަމައަކުންތޯ އެ މީހުން މާލެއަތޮޅު ދެކުނުބުރި ގުޅީ ކައިރިއަށް ފޮނުވާލަން މި ޖެހެނީ؟" ޢަލީ ސުވާލު އުފެއްދެވިއެވެ. ޢަލީ ވިދާޅުވީ، ކުރީ ސަރުކާރުގައި އޮތީ މާލެ ސަރަހައްދުން ބޯހިޔާވަހިކަން ނެތްނަމަ މާލޭން ފުލެޓު ލިބުމަށް ޝަރުތުހަމަވާ ކަމަށް ކަނޑައަޅައިފައި ކަމަށާއި، އެ އުސޫލުގެ ދަށުން ހުށަހަޅައިފައިހުރި ފޯމުތައް އަދިވެސް އިވެލުއޭޓްނުކޮށް އެބަހުރި ކަމަށެވެ. "އެހެންވީމާ އަލުން ރައްޔިތުންނަށް ތަކުލީފު ނުޖައްސާށޭ، އެ ފޯމުތައް އިވެލުއޭޓްކޮށް ނިންމާށޭ، އެއީ އަޅުގަނޑު މި ދައްކާ ވާހަކައަކީ، އެހެންވީމާ އަޅުގަނޑުމެން މި ގޮވާލަނީ މި ސަރުކާރަށް އިތުރަށް ރައްޔިތުންނަށް ތަކުލީފު ނުޖައްސައި، ދެވަނަ ބުރުގައި ހުށަހަޅައިފައި ހުރި ފޯމުތައް، 41،000 އަށް ވުރެ ގިނަ ފޯމު އަލުން އިވެލުއޭޓްކޮށްފަ، ކުރީ ސަރުކާރުން ކަނޑައަޅައިފައިވާ އުސޫލާު އެއްގޮތަށް ފުލެޓާއި ގޯތި ދިވެހިންނަށް ހަވާލުކުރަން،" ޢަލީ ވިދާޅުވިއެވެ. ފާހަގަކުރެވޭ ގޮތުގައި މި ސަރުކާރުން ވަނީ މިދިޔަ ނޮވެންބަރު މަހު މެދުތެރޭ "ބޯހިޔާވަހިކަން އެންމެންނަށް"ގެ ނަމުގައި ސިޔާސަތެއް އިފުތިތާހުކޮށްފައެވެ. މި ސިޔާސަތުގެ ދަށުން މި ސަރުކާރުން 7،900 ފުލެޓު އިމާރާތްކޮށް، 15،000 ގޯތި ދޫކުރާނެއެވެ. އެ ސިޔާސަތުގެ ތެރެއިން މާލީ ގޮތުން ފުދުންތެރި މީހުންނަށް ހައުސިން ޔުނިޓާއި ގޯތި ގަތުމުގެ މަގުފަހި ކުރުމަށާއި މެދު ފަންތީގެ އާއިލާތަކަށް ހެޔޮ އަގުގައި، ބޯހިޔާވަހިކަން ފޯރުކޮށްދިނުމަށް އެފޯޑަބަލް ހައުސިންއަށް ޚާއްސަކޮށް ޕްރޮޖެކްޓުތައް ހިންގާނެއެވެ. އޭގެއިތުރަށް، އަމިއްލަ ބޯހިޔާވަހިކަމެއް ގަތުމުގެ ތަނަވަސްކަން ލިބިފައި ނެތް މީހުންނަށް "ރެންޓް ޓު އޯން" މޮޑެލްގެ ދަށުން ބޯހިޔާވަހިކަން ލިބޭނެ ގޮތާއި، ދިރިއުޅޭނެ ތަނެއް ނެތް އާއިލާތަކަށް ސަރުކާރުން ހަދާ އެސެސްމަންޓެއްގެ ތެރެއިން ބޯހިޔާވަހިކަން ލިބޭ ގޮތް ހަމަޖެހޭނެއެވެ. މި ސިޔާސަތުގެ ދަށުން މާލޭގެ ރަށްވެހިންނާއި މާލޭގައި ދިރިއުޅޭތާ 15 އަހަރުވީ މީހުންނަށް ބޯހިޔާވަހިކަން ހަމަޖައްސައިދޭނެއެވެ. އެ ސްކީމުގެ ތެރެއިން މާލެ ރަށްވެހިންނަށް ގޯއްޗާއި ފުލެޓް ދޫކުރާނީ މާލެ ސަރަހައްދުންނާއި ރަސްމާލެއިންނެވެ. މާލޭ ރަށްވެހިންގެ ކެޓެގަރީގައި ހިމެނެނީ، ފެށުނީއްސުރެ މާލޭ ރަޖިސްޓްރީގައި ޖެހިފައިވާ މީހުންނާއި މާލޭ ދަފްތަރުގައި ޖެހިފައިވާ މީހުންގެ އިތުރަށް ފަހުން މާލޭގައި ރަޖިސްޓްރީވެފައިވާ މީހުންނެވެ. އެ ސްކީމަށް އެދެވޭނީ މާލޭ ރަށްވެއްސަކަށްވެ، ފަސް އަހަރަށް ވުރެ ގިނަ ދުވަސްވެފައިވާ މީހުންނަށެވެ. ކޮންސްޓްރަކްޝަން މިނިސްޓްރީން ބުނީ، ގޯއްޗާއި ފުލެޓު ދިނުމުގައި ޕޮއިންޓު ދިނުމަށް ކަނޑައަޅާފައި ވަނީ، ވީހާވެސް ބޮޑަކަށް ވެރިފައި ކުރެވޭނެ ފަދަ ގޮތަކަށް ކަމަށެވެ. ފާހަގަކުރެވޭ ގޮތުގައި، ރަސްމާލެއިން، މާލޭ ރަށްވެހިންނަށް 15،000 ގޯތި ދޫކުރަން ހުޅުވައިލައި، 7000 ހައުސިން ޔުނިޓުގެ މަސައްކަތް ފަސް މަސް ދުވަހުގެ ތެރޭ ފަށާނެ ކަމަށް މިދިޔަ ނޮވެންބަރު މަހު ރައީސް ޑރ. މުޙައްމަދު މުޢިއްޒު ވިދާޅުވެފައިވެއެވެ.