މިދިޔަ ސަރުކާރުގެ ފަހުކޮޅު ހުޅުމާލޭ ތިންވަނަ ފިޔަވަހިންނާއި ގުޅިފަޅުން ދޫކުރި ބައެއް ގޯތިތައް ހުރި ތަންތަނަށް ބަދަލު ގެނައުމާ ގުޅިގެން، އެ ގޯތިތަކުގެ ކުރީގެ ރަޖިސްޓްރީ ބާތިލުކޮށް، އާ ރަޖިސްޓްރީތަކާ ހަވާލުވާން ހައުސިން މިނިސްޓްރީން މިއަދު އެދިއްޖެއެވެ. ޑިސެންބަރު 19 ގައި ސަރުކާރުން ވަނީ ހުޅުމާލޭ ތިންވަނަ ފިޔަވަހީގެ ލޭންޑް ޔޫސް ޕްލޭންއަށް ބަދަލު ގެނެސްފައެވެ. އެހެންވެ، ޖެހިގެން އައި ދުވަހު ވަނީ އެ މީހުންގެ މެދުގައި އަލުން ގުރުއަތު ލާފައެވެ. ހައުސިން މިނިސްޓްރީން މިއަދު ކުރި އިއުލާނެއްގައި ބުނީ، އެ ބަދަލާ ގުޅިގެން ކުރިން ދޫކުރި ބަންޑާރަ ގޯތީގެ ރަސްޖިސްޓްރީ ބާތިލުކޮށްފައިވާ ކަމަށެވެ. އަދި، މިހާތަނަށް ގޯތީގެ ރަޖިސްޓަރީ ހަވާލުކޮށްފައިނުވާ މީހުންނަށް ގޯތީގެ ރަޖިސްޓަރީ ހަވާލުކުރުމާއި ގޯތި ހަވާލުކުރުމުގެ އެއްބަސްވުމުގެ ސޮއިކުރަން ވެސް ހަމަޖެހިފައިވާ ކަމަށެވެ. އެހެންވެ، އިއްޔެއިން ފެށިގެން މާރިޗު 15 ވަނަ ދުވަހާ ހަމައަށް ހިޔާވެހި ޕޯޓަލް މެދުވެރިކޮށް ބަންޑާރަ ގޯތީގެ ރަޖިސްޓްރީއާ ހަވާލުވުމުގެ ފުރުސަތު ވަނީ ހުޅުވާލާފައެވެ. https://sun.mv/217115 މީގެ އިތުރުން، ގުޅިފަޅުގެ ލޭންޑް ޔޫސް ޕްލޭނަށް ވެސް ސަރުކާރުން ވަނީ ބަދަލު ގެނެސްފައެވެ. އެހެންވެ، މިއަދާ ހަމައަށް އެއްބަސްވުމުގައި ސޮއިކޮށް، ގޯތީގެ ރަޖިސްޓްރީއާ ހަވާލުވެފައިނުވާ މީހުންނަށް އިތުރު ފުރުސަތެއް ދޭން ވެސް މިނިސްޓްރީން ނިންމާފައިވާ ކަމަށް އިއުލާނުގައިވެއެވެ. އެ ގޮތުން، އިއްޔެއިން ފެށިގެން މާރިޗު 15 ވަނަ ދުވަހުގެ ނިޔަލަށް އެ މީހުން ވެސް ހިޔާވެހި ޕޯޓަލް މެދުވެރިކޮށް އެޕޮއިންޓްމަންޓަށް އެދި ހުށަހަޅަން ވަނީ ހުޅުވާލާފައެވެ. ބިންވެރިޔާ ސްކީމްގެ ދަށުން ކުރީގެ ސަރުކާރުން ވަނީ ހުޅުމާލެއާއި ގުޅިފަޅު އަދި ގިރާވަރުފަޅުން 9،031 ގޯތި މާލޭ މީހުންނަށް ދޭން ނިންމާފައެވެ. އޭގެ ތެރެއިން ގިނަ ގޯތިތައް ދީފައިވާއިރު، ހުޅުމާލޭ ތިންވަނަ ފިޔަވަހި ވެސް މިހާރު ވަނީ ހިއްކާ ނިންމާލާފައެވެ. https://sun.mv/217139 މި ސަރުކާރުން އެ ގޯތިތައް ދިނުން ލަސްވާތީ ކަމަށް ބުނެ، އެމްޑީޕީން މީގެ ކުރިން ކަންބޮޑުވުން ވެސް ފާޅުކުރިއެވެ. އެކަމަކު، ސަރުކާރުން ވަނީ ކެމްޕޭނާ ދިމާކޮށް ހިއްކާ ނުނިމޭ ބިންތަކުން ގޯތި 'ބަހާލީ' ކަމަށް ތުހުމަތުކޮށްފައެވެ. ރިޔާސީ ކެމްޕޭންގެ ތެރޭގައި ރައީސް ޑރ. މުހައްމަދު މުއިއްޒު ވަނީ އެއްވެސް މީހަކަށް ލިބިފައިވާ އެއްވެސް ފުލެޓެއް އަދި ގޯއްޗެއް ނުއަތުލާނެކަމުގެ ޔަގީންކަން ދީފައެވެ. މި ސަރުކާރުން ވެސް ވަނީ 15،000 ގޯއްޗާއި 7،900 ފުލެޓަށް އެދި ކުރިމަތިލާން ހުޅުވާލާފައެވެ. އޭގެ ތެރެއިން ގިނަ ގޯތިތައް ދޫކުރަން ނިންމާފައިވަނީ ރަސްމާލެއިންނެވެ. އެތަން ހިއްކުމުގެ މަސައްކަތް ސަރުކާރުން އަންނަނީ ކުރަމުންނެވެ.