މި އަހަރު އެޑިއުކޭޝަން މިނިސްޓްރީން ކުރަން ނިންމައިފައި އޮތް އެންމެ މުހިންމު އެއް ކަމަކީ، ދަރިވަރުންގެ ކިބައިގައި އަޚްލާގު އަށަގަންނުވަން މުޅި އަހަރަށް ބަހައިލައިގެން ޕްރޮގްރާމެއް ކުރިއަށް ގެންދިއުން ކަމަށާއި އަންނަ މަހު އެކަން ފަށާނެކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު މިއަދު ވިދާޅުވެއްޖެއެވެ. މި ދައުރުގައި އަލަށް ހުޅުވި ފުރަތަމަ ސްކޫލުކަމަށްވާ، ހުޅުމާލެ ފޭސް ދޭއްގެ ޝަހީދު ޢަލީ ސްކޫލް ހުޅުވުމަށް، ދަރިވަރުންނާއި، މުދައްރިސުން ބައިވެރިވި ރަސްމިއްޔާތުގައި ވާހަކަދައްކަވަމުން ޝަފީއު ވިދާޅުވީ އެންމެ މުހިންމު ކަމަކަށް މި އަހަރު ކުރަން ކަނޑައަޅައިފައިވަނީ، މުޅި އަހަރަށް ބަހައިލައިގެން ތަރުބަވީ ޚާއްސަ ޕްރޮގްރާމެއް ކުރިއަށް ގެންދިއުން ކަމަށެވެ. އެއީ ދަރިވަރުންގެ ކިބައިގައި ރިވެތި އަޚްލާގް އަށަގަންނުވަން ހިންގާ ޕްރޮގްރާމެއް ކަމަށާއި، އަންނަ މަހުގެ ތެރޭ އެ ޕްރޮގްރާމް ފަށާނެ ކަމަށް ވެސް ވިދާޅުވިއެވެ. މީގެ އިތުރުން ބެލެނިވެރިންނާއި، މުދައްރިސުންނަށް މިނިސްޓަރުވަނީ، ދަރިވަރުންނަކީ އަމިއްލަ އުނގެނުމަށް ޒިންމާވާ ބަޔަކަށް ހެދުމަށް އިލްތިމާސްކުރައްވައިފައެވެ. "ހަގީގަތުގައި ވެސް އަބަދުމެ ސްޕޫންފީޑުކޮށްގެން، އަބަދުމެ ކައިރީގައި ބައިންދައިގެން ކިޔަވައިދިނުމުގެ ވައްޓަފާޅި ބަދަލުކުރަން އެބަޖެހޭ. ފިކުރާއި ވިސްނުން ތަރައްގީވާނީ އޭރުން," ދަރިވަރުންނަށް ކިޔެވުމަށް މިނިވަންކަމެއް ދޭންޖެހޭ ކަން ފާހަގަކުރައްވައި އޭނާ ވިދާޅުވިއެވެެ. މިނިސްޓަރު ވިދާޅުވީ އަމިއްލައަށް އުނގެނުމަށް ޒިންމާދާރު ޖީލެއް ބިނާކުރެވިއްޖެނަމަ، މަސައްކަތުގައި މާހައުލުގައި އަދި އަމިއްލަ ދިރިއުޅުމުގައި ވެސް އެ ކުދިން ޒިންމާދާރުވާނެ ކަމަށެވެ. https://sun.mv/215184 އަޚްލާގީ ޕްރޮގްރާމެއް ހިންގާކަން މިނިސްޓަރު އިއުލާނުކުރެއްވިއިރު، މި ނިމުނު އަހަރުގެ ތެރޭ ދަރިވަރަކާއި، ޓީޗަރަކާ ދެމެދު ހިނގި ހަމަނުޖެހުމެއްގެ މައްސަލަ މުޅި ރާއްޖޭގެ ސަމާލުކަމަށް ވަނީ އައިސްފައެވެ. ޓީޗަރުންނަށް އެކިފަަހަރު މަތިން ހަނގާކުރުމުގެ މައްސަލައެއްގެ ގޮތުގައި ފާހަގަވި އެ މައްސަލައާއެކު ދަރިވަރުންގެ ކިބައިގައި ރިވެތި އަޚްލާގު އަށަގެންނެވުމުގެ މުހިންމުކަމުގެ ބަހުސް ވަރަށް ބޮޑަށް ކުރެވުނެވެ.