އަވައްޓެރި އިންޑިއާގެ ޖުމްހޫރީ ދުވަސް ފާހަގަކުރުމަށް މާލޭގައި ރޭ ޚާއްސަ ހަފްލާއެއް ބާއްވައިފިއެވެ. އިންޑިއާގެ 77ވަނަ ޖުމްހޫރީ ދުވަސް ފާހަގަކުރުމަށް ސޯޝަލް ސެންޓަރުގައި ރޭ ބޭއްވި ހަފްލާގައި ވަނީ ކުރީގެ ރައީސުން ކަމަށްވާ އިބްރާހިމް މުޙައްމަދު ޞާލިހާއި، މުޙައްމަދު ނަޝީދާއި، އެހެން އިސް ބޭފުޅުން ވެސް ބައިވެރިވެވަޑައިގެންފައެވެ. އެގޮތުން މި ސަރުކާރުގެ ވަޒީރުންނާއި، ރާއްޖޭގައި ތިއްބަވާ އެކި ގައުުމުތަކުގެ ސަފީރުން ވެސް ހިމެނެއެވެ. އިންޑިއާގެ 77ވަނަ ޖުމްހޫރީ ދުވަސް ފާހަގަކުރުމަށް ސޯޝަލް ސެންޓަރުގައި ރޭ ބޭއްވި ހަފްލާ ތެރެއިން -- ސަން ފޮޓޯ: މޫސާ ނަދީމް މި ހަފްލާގައި އިންޑިއާގެ ސަގާފީ ހަރަކާތްތަކާއި، ރާއްޖެ- އިންޑިއާ ގުޅުމަށް 60 އަހަރު ފުރުން ފާހަގަވާ ޚާއްސަ އެގްޒިބިޝަނެއް ވެސް އޮތެވެ. މި ހަފްލާގައި ވާހަކަދައްކަވަމުން ފޮރިން މިނިސްޓަރު އަބްދުﷲ ޚަލީލް ވިދާޅުވީ އިންޑިއާއަކީ އަބަދުވެސް ރާއްޖެއަށް އެހީތެރިވެދޭ ގައުމެއް ކަމަށެވެ. އެ އެހީތަކުގެ ސަބަބުން ދިވެހީންނަށް ވަރަށް ގިނަ ފައިދާތަކެއް ލިބޭ ކަމަށް ވެސް ވިދާޅުވިއެވެ. އިންޑިއާގެ 77ވަނަ ޖުމްހޫރީ ދުވަސް ފާހަގަކުރުމަށް ސޯޝަލް ސެންޓަރުގައި ރޭ ބޭއްވި ހަފްލާ ތެރެއިން -- ފޮޓޯ: އިންޑިއާ ހައިކޮމިޝަން "ރާއްޖޭގައި މިހާރު ވެސް އެތަކެއް އިންޑިއާ މީހުން އެބަތިބި ޚިދުމަތް ކުރަން. އިންޑިއާގެ ޑޮކްޓަރުންނާއި، ނަރުހުންނާއި، ޓީޗަރުންގެ ފަރާތުން ފެނިގެންދަނީ، ރާއްޖެއަށް އޮންނަ ލޯތްބާއި އިހްތިރާމް،" ޚަލީލް ވިދާޅުވިއެވެ. މީގެ އިތުރުން ރާއްޖޭގައި ހުންނަވާ އިންޑިއާ ސަފީރު ޖީބަލަސުބްރަމާނިއަން ވިދާޅުވީ ދެ ގައުމުގެ ގުޅުމުގެ ސަބަބުން، ދެ ގައުމަށް ވެސް ފައިދާ ކުރާ ކަމަށެވެ. އަދި އިންޑިއާއަށް އަންނަ ތަރައްގީއާއި ހޯދަމުން އަންނަ ކުރިއެރުންތަކަށް ވެސް ސަފީރުވަނީ އަލިއަޅުއްވައިލައްވައިފައެވެ. އެއާއެކު އުންމީދަކީ ދެ ގައުމުގެ ގުޅުން މުސްތަގްބަލުގައި ވެސް އިތުރަށް ބަދަހިވުން ކަމަށް އޭނާ ވަނީ ވިދާޅުވެފައެވެ.