މީހެއްގެ ވައިބާ އެކައުންޓް ކޮމްޕްރޮމައިޒްކޮށް، އެމީހާގެ ނަމުގައި އެކި ފަރާތްތަކާ ވާހަކަ ދައްކައި މަކަރާއި ހީލަތުން އެކި ފަހަރު މަތިން 150،000 އަށްވުރެ ގިނަ ރުފިޔާ ހޯދައި، އެ ފައިސާތަކުގެ ތެރެއިން ބައެއް ނަގާފައިވާ މައްސަލައަކާ ގުޅިގެން ހައްޔަރުކުރި މީހެއްގެ ބަންދު އިތުރުކޮށްފިއެވެ. މިިމައްސަލައާ ގުޅިގެން ހައްޔަރުކޮށްފައިވަނީ ހުޅުމާލެ ފްލެޓް 06-2-39، މާލެ، އުމުރުން 39 އަހަރުގެ ޙަސަން އަޒުރާހެވެ. މިދިޔަ މަހުގެ ހަތްވަނަ ދުވަހު އޭނާ ހައްޔަރުކޮށްފައިވަނީ މީހެއްގެ ވައިބާ އެކައުންޓް ކޮމްޕްރޮމައިޒްކޮށްގެން، އެ މީހާގެ ނަމުގައި އެކި ފަރާތްތަކާ ވާހަކަދައްކައި މަކަރާއި ހީލަތުން އެކި ފަހަރު މަތިން 150،000 ރުފިޔާއަށްވުރެ ގިނަ ފައިސާ ހޯދާފައިވާކަމަށް މިދިޔަ ނޮވެމްބަރު 30ވަނަ ދުވަހު އެންޓި ސްކޭމް ސެންޓަރަށް ހުށަހެޅުމުންނެވެ. އެންމެ ފުރަތަމަ އޭނާގެ ބަންދަށް ޖެހީ 15 ދުވަހެވެ. އެއަށްފަހު ބަންދު އިތުރުކުރަމުން އަނެއްކާ ވެސް ވަނީ ބަންދު މުއްދަތު އިތުރުކޮށްފައެވެ. އެގޮތުން ކޯޓުން އިއްޔެވަނީ އޭނާގެ ބަންދަށް 15 ދުވަސް ޖަހައިފައެވެ. ބަންދު އިތުރުކުރީ ކުށް ތަކުރާރުވާނެ ކަމަށް ބެލުމުގެ ފުރުސަތު އޮތުމުން ކަމަށް އަމުރުގައިވެއެވެ. އަދި މައްސަލައަކީ ޕްރޮސެކިއުޓާ ޖެނެރަލް (ޕީޖީ) އޮފީހުން ބަލައިގަނެފައިވާ މައްސަލައެއް ކަމަށާއި، ވީ އެންމެ އަވަހަށް ކޯޓަށް މައްސަލަ ހުށަހަޅާނެ ކަމަށް ޕީޖީ އޮފީހުން ބުނެފައިވާކަމަށް އަމުރުގައިވެއެވެ. މި މައްސަލާގައި މީގެ ކުރިން ހައްޔަރުކޮށްފައިވަނީ ގ. މާލޭހިޔާ 1-16-03 / މާލެ، އަޙްމަދު ޙައްސާން (33އ) އާއި ނ. މަނަދޫ / ވެށި، ޙުސައިން ސަމާޙު (33އ)އެވެ. މިމައްސަލަ ފުލުހުން ދަނީ ތަހުގީގު ކުރަމުންނެވެ.