ރެއާ ހަމައަށް މާލޭ ސަރަހަރައްދުގައި 12،274 މަސްދަޅު ކޭސް ދޫކޮށްފައިވާ ކަމަށް ލޯކަލް ގަވަމަންޓް މިނިސްޓްރީން މިއަދު ބުނެފި އެވެ.
ވީކިހިނެއް؟ - މި އަންނަ ރޯދަ މަހަށް ސަރުކާރުން ދޭ ހަދިޔާއެއްގެ ގޮތުގައި މާލެ ސަރަހައްދުގައި މަސްދަޅު ކޭސް ދޫކުރަން ފެށީ މިދިޔަ ހޮނިހިރު ދުވަހުގެ ރޭގަ އެވެ. މަސްދަޅު ކޭސް ދޫކުރަމުން ދަނީ ވެސް ރޭގަނޑުގެ ވަގުތު އެކަންޏެވެ.
ތަފްސީލް - ހޮނިހިރު ދުވަހުން ފެށިގެން ރެއާ ހަމައަށް، މިދިޔަ ތިން ދުވަހުގެ ރޭ 12،274 މަސްދަޅު ކޭސް ދޫކޮށްފައިވާ އިރު، އެއީ މާލެ ސަރަހައްދުގެ %18.8 ގޭބިސީ ކަމަށް މިނިސްޓްރީން ބުންޏެވެ.
ލޯކަލް ގަވަރުމަންޓް މިނިސްޓްރީން ބުނި ގޮތުގައި، ގްރެޓާ މާލެ ސަރަހައްދުގައި ރަޖިސްޓްރީ ކުރެވިފައިވާ ޑޮމެސްޓިކް މީޓަރުތަކުގެ އަދަދަކީ 65،230 އެވެ. މަސްދަޅު ދޫކުރަނީ ކޮންމެ ޑޮމެސްޓިކް މީޓަރަކީ ގޭބިސީއެއް ކަމަށް ބަލައިގެންނެވެ.
މާލޭގައި މަސްދަޅު ކޭސް ދޫކުރުމަށް ހަމަޖެހިފައި ވަނީ ހުކުރު ދުވަސް ފިޔަވައި ކޮންމެ ރެއަކު 8:30 އިން 11 އަށެވެ. އަންނަ މަހުގެ 11ގެ ނިޔަލަށް މަސްދަޅު ކޭސް ބެހުމުގެ މަސައްކަތް ކުރިއަށްދާނެ އެވެ.
މާލޭގައި ރޯދަ ހަދިޔާ ބަހަން 15 މަރުކަޒެއް ގާއިމުކޮށްފައިވެ އެވެ. އެއީ މާލޭގައި 8 މަރުކަޒާއި ވިލިމާލޭގައި 1 މަރުކަޒާ އަދި ހުޅުމާލޭގައި 6 މަރުކަޒެވެ. މަސްދަޅު ކޭސް ބަލާ ދާން ޖެހެނީ ފުލުހުން ތައާރަފްކުރި ޕޯޓަލެއް މެދުވެރިކޮށް ނަންބަރު ނަގައިގެންނެވެ.
ފާހަގަކޮށްލެވޭ - އެހެން ރަށްރަށުގެ ގޭބިސީތަކަށް މަސްދަޅު ކޭސް ދޫކުރުމަށް، މިއަދު ރަށްރަށް ކޭސްތައް ފޮނުވުމުގެ މަސައްކަތް ފަށާފައިވާ ކަމަށް ވެސް ލޯކަލް ގަވަމަންޓް މިިނިސްޓްރީން ބުންޏެވެ.