އިދާރާތަކުން ކުށުގެ ރެކޯޑު ސާފުކުރުން ފަދަ ކަންކަމުގައި ގިނަ ދުވަސްތަކެއް ނަގާތީ، ކުރިއަށް އޮތް ކައުންސިލް އިންތިހާބަށް ކުރިމަތިލާން ދީފައިވާ މުއްދަތުގައި ކެންޑިޑަސީ ފޯމު ހުށަނޭޅިދާނެތީ އެކަމަށް ހައްލެއް ހޯދައިދިނުމަށް އެމްޑީޕީން އިލެކްޝަން ކޮމިޝަން (އީސީ)އަށް މިއަދު ގޮވާލައިފި އެވެ.
ވީ ކިހިނެއް؟ - އަންނަ 4 އޭޕްރީލްގައި ބާއްވާ ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކުގެ އިންތިހާބުގައި ވާދަކުރުމަށް ހުޅުވާލާފައިވަނީ މި މަހުގެ 17 އިން ފެށިގެން އަންނަ މަހުގެ 1 ވަނަ ދުވަހުގެ ނިޔަލަށެވެ.
ފޯމު ހުށަހަޅަންޖެހެނީ އީސީގައި ގާއިމުކޮށްފައިވާ ޕޯޓަލްއެއް މެދުވެރިކޮށް އެ ކެންޑިޑޭޓެއްގެ އަމިއްލަ އީފާސް މެދުވެރިކޮށެވެ. އަދި މި ފޯމު ހުށަހެޅޭނީ ރަސްމީ ގަޑިތަކުގައި އެކަންޏެވެ. އެއީ:
ހުކުރު ދުވަސް ފިޔަވާ ކޮންމެ ދުވަހެއްގެ ހެނދުނު 8:30 އިން މެންދުރުފަހު 3:30އަށް 
ހުކުރު ދުވަސްދުވަހުގެ މެންދުރުފަހު 3:30 އިން ހަވީރު 6އަށް
ބުނީ ކީކޭ؟ - އެމްޑީޕީން މިއަދު ސޯޝަލް މީޑިއާގައި ބުނީ، ކައުންސިލް އިންތިހާބަށް ކުރިމަތިލުމަށް އެދި ފޯމު ހުށަހެޅުމަށް އީސީން ދީފައިވަނީ ވަރަށް ކުރު މުއްދަތެއް ކަމަށްވާތީ ބޮޑެތި ދަތިތަކާ ކުރިމަތިވަމުންދާ ކަމަށެވެ. އެގޮތުން:
ދައުލަތުގެ އިދާރާތަކުން ރިކޯޑް ސާފުކުރުމާއި އެހެނިހެން ކަންކަން ފުރިހަމަކުރުމަށް ގިނަ ދުވަސްތަކެއް ނަގާ؛ އެހެންވެ، މިއީ ފޯމު ހުށަހެޅުމަށް އެކަށީގެންވާ މުއްދަތެއް ނޫން 
މިކަމުގެ ސަބަބުން އެތައް ބަޔަކަށް އިންތިހާބަށް ކުރިމަތިލުމުގެ ފުރުސަތު ގެއްލިދާނެކަމުގެ ކަންބޮޑުވުން ފާޅުކުރަން
މި މައްސައަށް ހައްލެއް ހޯދައިދިނުމަށް އީސީއަށް ގޮވާލަން 
އެމްޑީޕީގެ ފަރާތުން ކުރިމަތިލާ ކެންޑިޑޭޓުންގެ ފޯމުތައް ހުށަހެޅުމުގެ މަސައްކަތުގައި ހަރަކާތްތެރިވެވަޑައިގެންނެވީ ކުރީގެ މަޖިލިސް މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވީ، ކަރެކްޝަނުން ކުށުގެ ރެކޯޑް ސާފުކުރަން ބަލާއިރު، އޮންލައިންކޮށް އެކަން ކުރުން މި މަހުގެ 22 އިން ފެށިގެން ހުއްޓާލާފައިވާ ކަމަށް މައުލޫމާތު ލިބޭ ކަމަށެވެ. އެހެންވެ، މިހާރު އެކަން ކުރަންޖެހެނީ "އެތަނަށް ގޮސްގެން، ސަލާން ޖަހައިގެން" ކަމަށް އޭނާ ވިދާޅުވި އެވެ. 
މެންދުރުފަހު 3ގެ ފަހުން ޕޯޓަލަށް ފޯމު ހުށަނޭތީ އެ ކަންބޮޑުވުން ވެސް އޭނާ ފާހަގަކުރެއްވި އެވެ. މުހައްމަދު ރަޝީދު ވިދާޅުވީ 24 ގަޑިއިރު ފޯމު ހުށަހެޅޭނެ އިންތިޒާމުތަކާ އެކު، ފޯމު ހުށަހެޅުމަށް ވީހާ ވެސް ފަސޭހަ ގޮތަކަށް އިންތިޒާމުތައް ހަމަޖައްސައިދޭންޖެހޭ ކަމަށެވެ.