އިނގިރޭސިވިލާތުގެ ބޮޑުވަޒީރު ކިއަރު ސްޓާމާ ޗައިނާއަށް ރަސްމީ ދަތުރެއް ފައްޓަވައިފި އެވެ.
މިއީ ފާއިތުވި އަށް އަހަރުގެ ތެރޭގައި އިނގިރޭސިވިލާތުގެ ވެރިއަކު ޗައިނާއަށް ކުރައްވާ ފުރަތަމަ ދަތުރެވެ.
މި ދަތުރުގެ މައިގަނޑު މަގުސަދަކީ ދެ ގައުމުގެ ދެމެދުގައި އޮތް ނުތަނަވަސް ގުޅުން ރަނގަޅުކުރުމާއި އެމެރިކާގެ ސިޔާސަތުތަކަށް އަންނަމުންދާ ކުއްލި ބަދަލުތަކާ ގުޅިގެން، އެ ގައުމަށް ބަރޯސާވާ މިންވަރު ކުޑަކުރުމެވެ.
 ސްޓާމާ ބެއިޖިންގައި ޗައިނާގެ އިސްވެރިންނާ ބައްދަލުކުރެއްވުމަށް ފަހު، ޝަންހާއީ އަދި ޖަޕާނަށް ވަޑައިގަތުމަށް ވަނީ ހަމަޖެހިފަ އެވެ.
މި ދަތުރުގައި ވިޔަފާރިވެރިންގެ ބޮޑު ވަފުދެއް ބައިވެރިވެ އެވެ.
ސްޓާމާ ތިން ދުވަހުގެ ދަތުރެއް މި ކުރައްވަނީ، އެމެރިކާގެ ރައީސް ޑޮނަލްޑް ޓްރަމްޕް ގްރީންލޭންޑްގެ ކޮންޓްރޯލް ހޯއްދެވުމަށް ދެއްވަމުންދާ އިންޒާރުތަކާއި އެމެރިކާގެ ހަރުކަށި ވިޔަފާރީގެ ސިޔާސަތުތަކުގެ ސަބަބުން ލަންޑަނާއި ވޮޝިންޓަނާ ދެމެދު ނުތަނަވަސްކަން އިތުރުވަމުންދާ ދަނޑިވަޅެއްގަ އެވެ.
މީގެ ދެ އަހަރެއްހާ ދުވަސް ކުރިން އިނގިރޭސިވިލާތުގެ ވެރިކަމާ ހަވާލުވެވަޑައިގަތުމަށް ފަހު، ސްޓާމާ ވަނީ މީގެ ކުރީގެ ސަރުކާރުތަކުގައި ހޮންކޮންގެ މައްސަލަ އާއި ޖާސޫސްކުރުމުގެ ތުހުމަތުތަކާ ގުޅިގެން ޗައިނާއާ އެކު ގޯސްވެފައިވާ ގުޅުން އިއާދަކުރުމަށް މަސައްކަތް ކުރައްވާފަ އެވެ.
އިނގިރޭސި ސަރުކާރުން ގަބޫލުކުރާ ގޮތުގައި، ގައުމުގެ އިގްތިސާދީ ދުވެލި ހަލުވިކޮށް، ދިރިއުޅުމުގެ ފެންވަރު މަތިކުރުމަށްޓަކައި ޗައިނާއާ އެކު އިގްތިސާދީ ގުޅުން ބަދަހިކުރުމަކީ ކޮންމެހެން ބޭނުންތެރި ކަމެކެވެ.
ރަސްމީ ތަފާސްހިސާބުތަކުން ދައްކާ ގޮތުގައި، 2025ގެ މެދެއްހާ ހިސާބަށް ޗައިނާއަކީ އިނގިރޭސިވިލާތުގެ ހަތަރުވަނައަށް އެންމެ ބޮޑު ވިޔަފާރި ބައިވެރިޔާ އެވެ. ދެ ގައުމުގެ ދެމެދުގައި ކުރެވޭ ވިޔަފާރީގެ އަގު ގާތްގަނޑަކަށް 100 ބިލިއަން ޕައުންޑަށް އަރަ އެވެ. 
މި ދަތުރަކީ ޓްރަމްޕްގެ ސިޔާސަތުތަކުގެ ސަބަބުން ކަންބޮޑުވެފައިވާ އެމެރިކާގެ ގާތް އެކުވެރިންނާ އެކު ގުޅުން ބަދަހިކުރުމަށް ބެއިޖިންއަށް ލިބޭ ފުރުސަތެކެވެ.
މި މަހުގެ ކުރީކޮޅު ކެނެޑާގެ ބޮޑުވަޒީރު މާކް ކާނީ ޗައިނާއާ އެކު އިގްތިސާދީ އެއްބަސްވުމެއްގައި ސޮއިކުރެއްވުމާ ގުޅިގެން، ޓްރަމްޕް ވަނީ އެ އެއްބަސްވުމާ އެކު ކުރިއަށްދާ ނަމަ ކެނެޑާގެ މުދަލުން %100ގެ ޓެރިފް ނަގާނެ ކަމުގެ އިންޒާރު ދެއްވާފަ އެވެ.
ޗައިނާގެ ސަރުކާރުން ހިންގާ ގްލޯބަލް ޓައިމްސް އިން ބުނި ގޮތުގައި، ދުނިޔޭގެ ބާރުތައް ބެހިފައިވާ ނިޒާމެއް ގާއިމުކުރުމުގައި ޗައިނާއަކީ އިތުބާރު ހުރި ބައިވެރިއަކަށް ވާނެ އެވެ.
ނަމަވެސް، ސްޓާމާގެ މި ދަތުރަށް އިނގިރޭސިވިލާތުންނާއި އެމެރިކާއިން ދަނީ ފާޑުކިޔުންތައް އަމާޒުވަމުންނެވެ. ވަކިން ހާއްސަކޮށް، ލަންޑަންގެ މެދުތެރޭގައި ޗައިނާގެ ބޮޑު އެމްބަސީއެއް އެޅުމުގެ ހުއްދަ ސަރުކާރުން ދިނުމަކީ ޖާސޫސްކުރުމަށް މަގުފަހިވާނެ ކަމެއް ކަމަށް ބުނެ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.