بِسْمِ ٱللّٰهِ ٱلرَّحْمٰنِ ٱلرَّحِيمِ‎
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
ޝަހީދު ޢަލީ ސްކޫލްގެ ލޮބުވެތި އެންމެހައި ދަރިވަރުން، ޕްރިންސިޕަލް، އެޑިޔުކޭޝަން މިނިސްޓަރ، އެހެނިހެން ވަޒީރުން، މި މަސައްކަތް ކުރެއްވި ކުންފުނީގެ ވެރިން، ވަޑައިގެން ތިއްބެވި އެންމެހައި ބޭފުޅުން، ސްކޫލުގެ ހުރިހާ ޓީޗަރުންނާއި، އެންމެހައި މުވައްޒަފުންނާއި، ހުރިހާ ބޭފުޅުން، އަދި މި ޙަފްލާ ބައްލަވާ ލޮބުވެތި ހުރިހާ ރައްޔިތުން.
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، މި އުފާވެރި މުނާސަބަތުގައި، މި ފަޚްރުވެރި ސްކޫލް ހުޅުވިގެންދިޔަ މުނާސަބަތުގައި، މި ސްކޫލްގައި މިއަދު ކިޔަވަން ފަށާ ލޮބުވެތި ހުރިހާ ދަރިވަރުންނަށް އަޅުގަނޑުގެ ހިތުގެ ފުންމިނުން ވަރަށް ބޮޑަށް މަރުޙަބާ ދަންނަވަން. އަދި މިއަދަކީ މި އަހަރަށް، ދިރާސީ އަހަރު ފެށިގެންދާ ދުވަސް ކަމުގައިވާތީ، ރާއްޖޭގެ ހުރިހާ ކިޔަވާ ކުދިންނަށްވެސް އަޅުގަނޑު ވަރަށް ބޮޑަށް މަރުޙަބާ ދަންނަވަން. އަދި ތަޢުލީމީ ނިޒާމުގައި މަސައްކަތް ކުރައްވާ ހުރިހާ ޕްރިންސިޕަލުންނަށާއި، ހުރިހާ ޓީޗަރުންނަށާއި، ސްކޫލްތަކުގެ ހުރިހާ މުވައްޒަފުންނަށާއި، ތަޢުލީމީ ނިޒާމުގައި މަސައްކަތް ކުރައްވާ ހުރިހާ ބޭފުޅުންނަށްވެސް މަރުޙަބާ ދަންނަވަން.
އާދެ، ޝައްކެއްނެތްގޮތުގައި، މި ސްކޫލަކީ އަޅުގަނޑުމެން ވަރަށްވެސް ފަޚްރުވެރިވާ އަބްޠާލަކަށް ނިސްބަތްވެގެންވާ ސްކޫލެއް. މި ޤައުމުގެ މިނިވަންކަން ހިމާޔަތް ކުރެއްވުމަށް އަލިރަސްގެފާނު ކުރެއްވި ޖިހާދަށް ނިސްބަތްކޮށް، މި ސްކޫލަށް ނަންދެވިފައި މިވަނީ. އަޅުގަނޑުމެންގެ މި ޤައުމުގެ މުސްތަޤްބަލް ބިނާކުރުމުގައި ސަރުކާރުން މި ގެންގުޅޭ ސިޔާސަތު ކުރިއަށް ގެންދިޔުމުގެ ބޭނުމުގައި. ތުއްތުކުދިންގެ ހިތުގައި، ޒުވާނުންގެ ހިތުގައި ޤައުމީ ލޯބި އަށަގަންނުވައި، ބިންވަޅު ނެގުމަށްޓަކައި ކުރެވޭ މަސައްކަތަށް ހިތްވަރެއް ދިނުމުގެ ގޮތުން.
ލޮބުވެތި ހުރިހާ ދަރިވަރުން، މި ސްކޫލް ނިސްބަތްވެގެން މިވާ އަލިރަސްގެފާނުގެ ޖިހާދާއި، އަލިރަސްގެފާނު އެ ދުވަހު އެ ކަންތައްތައް ކުރެއްވި ގޮތާ، މިކަންކަމުން ޢިބްރަތް ހާސިލުކޮށް، ކޮންމެ ކުއްޖެއްގެވެސް ހިތުގައި ޤައުމީ ލޯބި ބިންވަޅުނަގައި، ޤައުމަށްޓަކައި ތިމަންނައަށް ކޮށްދެވޭނީ ކޮންކަމެއްތޯ އަބަދުވެސް ވިސްނައި، އެގޮތުގައި މަސައްކަތްކުރުމަށް ހިތްވަރުކޮށް، އެގޮތުގައި ކުރިއަށްދާން ހުރިހާ ކުދިންވެސް މަސައްކަތް ކުރަންވާނެ.
ތަޢުލީމް ހާސިލުކުރަނީ، ސިކުނޑި ތަރައްޤީކުރުމަށް. ޤައުމެއް ތަރައްޤީވުމުގައި އިމާރާތްތައް އެޅުމާއެކުގައި ސިކުނޑިތައް ތަރައްޤީވާންޖެހޭ. ވިސްނުން ތަރައްޤީވާންޖެހޭ. ތަރުބިއްޔަތު ރަނގަޅުގޮތުގައި އަށަގަންނުވަންޖެހޭނެ. ލޮބުވެތި ހުރިހާ ދަރިވަރުންނަށް، މި ސްކޫލް އެކަންޏެއް ނޫން، ރާއްޖޭގައި ކިޔަވާ ހުރިހާ ދަރިވަރުންނަށް އަޅުގަނޑު ދަންނަވާލަން ބޭނުންވަނީ، އަޅުގަނޑުމެން މި ހޭދަކުރާ ތަޢުލީމީ ޙަޔާތަކީ، އެންމެ ބޭނުންތެރިގޮތުގައި ތިމަންނައަށް އަދި ތިމަންނަގެ މައިންބަފައިންނަށް އަދި ތިމަންނަގެ މުޖުތަމަޢަށް، ޤައުމަށް، ވާނެގޮތަށް ބޭނުންހިފާ ޙަޔާތަކަށް، ދުވަސްކޮޅަކަށް ހަދަންވާނެއޭ. އަޅުގަނޑުމެން ކޮންމެ މީހަކީ، މާތްވެގެންވާ އިސްލާމްދީނުގައި ފައިތިލަ ސާބިތުކޮށްގެން ތިބި މުސްލިމުން ކަމުގައިވާއިރުގައި، އަޅުގަނޑުމެން ވާންޖެހޭނީ އަބަދުވެސް ކޮންޝަސްލީ، އެކަން ހަނދާންކޮށް، އިސްލާމްދީނުގައި ކަނޑައަޅާފައި އޮންނަ ގޮތަށް ކަންކަން ތަރުތީބުކޮށް، އަޅުގަނޑުމެންގެ ޙަޔާތުގައި ކޮންމެ ދުވަހެއްވެސް، ކޮންމެ ވަގުތުކޮޅެއްވެސް ހޭދަކުރާ ބަޔަކަށް. ފަރްޟު ފަސްނަމާދު އަދާކުރުމަށް ލޮބުވެތި ހުރިހާ ދަރިވަރުންނަށް އަޅުގަނޑު ވަރަށް ބޮޑަށް އިލްތިމާސް ކުރަން. ވަގުތުން ވަގުތަށް ނަމާދުކުރުމަށް. ފަތިސް ނަމާދަށް ގަޑިއަށް ހޭލުމަށް. ހޭލައި ފަތިސްނަމާދު ކޮށްގެން ދުވަސް ފެށުމަށް ހުރިހާ ކުދިންވެސް ޢަޒުމް ކަނޑައަޅަން، ހުރިހާ ކުދިންނަށް، ރާއްޖޭގެ ކިޔަވާ ހުރިހާ ކުދިންނަށް އަޅުގަނޑު އިލްތިމާސްކުރަން. މައިންބަފައިންގެ ކިބައިންވެސް އެދެން، ހުރިހާ ކިޔަވާކުދިން ދުވަސް ފަށަނީ، ފަތިސްނަމާދު ގަޑިއަށް ތެދުވެ ނަމާދުކުރުމުންކަން ބެލުން އެއީ، މައިންބަފައިންގެ ޒިންމާއެއްގޮތުގައި ކަނޑައަޅައި، އެކަން ކަށަވަރު ކުރެއްވުމަށް. އަޅުގަނޑުމެންގެ ދީނުގައި ކަންކަން ބަޔާންކޮށްފައި އޮންނަނީ ވަރަށްވެސް މާތް މަޤްޞަދެއްގައި. އެކަންކަމަކީ ހަމައެކަނި ފޮތެއްގައި ލިޔެވިފައި އޮންނަންޖެހޭ ކަންކަމެއް ނޫން. ޢަމަލީގޮތުން ކޮންމެ ދުވަހަކު އަޅުގަނޑުމެން ކަންކަން ކުރުމަށްޓަކައި، ދީނުގައި އެކަންކަން އޮންނަނީ.
އެހެންވީމާ، ދުވަސް ފަށަން އޮންނަގޮތަށް ފަށައި، ކިޔަވާކުދިން އެންމެ ހެޔޮގޮތުގައި އެ ދުވަހުގެ ބޭނުން ހިފާނެގޮތަށް ސްކޫލްތަކުގައިވެސް ކަންކަން ތަރުތީބުވެފައި ހުންނަންވާނެ. ވަރަށް އުފާކުރަން، ނަމާދުކުރާ ދެ ކޮޓަރި މި ތަނުގައި، މި ސްކޫލްގައިވެސް ގާއިމުވެފައި ހުރީމަ. އަދި ކްލާސްރޫމްތަކުގައިވެސް، ކްލާސްރޫމް ތެރޭގައިވެސް ނަމާދުކުރެވޭގޮތަށް، ޓީޗަރުންވެސް ކަންކަން ބައްޓަންކުރައްވާފައި މިހާރު ހުރޭ.
އާދެ، އެހެންވީމާ، ހުރިހާ ކުދިންވެސް ނަމާދަށް ފަރުވާތެރިކަން އަދާކުރަންޖެހޭނެ. މައިންބަފައިންނަށް ކިޔަމަންތެރިވާންޖެހޭނެ. ޓީޗަރުން ބުނާބަސް އަހައި، ސްކޫލްގެ ވެރިން އަންގާ މަގުން ސްކޫލްތެރޭގައި އަދި ތަޢުލީމީ ޙަޔާތުގައި ޖުމުލަކޮށް ކަންކަން ކުރަންވާނީ. އޭރުން އަޅުގަނޑުމެންގެ ތުއްތުކުދިންގެ މުސްތަޤްބަލަށް އެ އެޅިގެންދަނީ ގުޑުވައިނުލެވޭވަރުގެ ވަރުގަދަ ބިންގަލެއް. ރެނދު އަޅުވައިނުލެވޭވަރުގެ ވަރުގަދަ ފައުންޑޭޝަނެއް އޭރުން އެ އެޅެނީ. ތިޔަ ކުދިން ކިޔަވައިގެން ނުކުމެ، ބޮޑެތި މީހުންނަށްވެ، ކުރިއަށްދާން ބަލާއިރުގައި، ބިންގާ އޮތީ ވަރަށް ވީކްކޮށް، ނޫނީވިއްޔާ ރެނދު އަޅާފައި ކަމަށްވަންޏާ، ޙަޔާތުގައި ގެއްލުންތަކެއް ވެދާނެ. 
އެހެންވީމާ، މި ބިންގާ ވަރުގަދައަށް އެޅުމަށްޓަކައި ސްކޫލްތަކަށް މި އަންނަނީ. ކިޔަވަން މިދަނީ. އެ ބިންގާ އަމިއްލައަށް ވަރުގަދަކުރުމާއި އަދި އެކަމަށް މަގު ދައްކަން ތިބި ފަރާތްތަކުން، ޓީޗަރުންނާއި ބެލެނިވެރިން، އެގޮތަށް ހުރިހާ ކުދިންގެ ނަފްސާނީގޮތުން، އެ ބިންގާ ވަރުގަދަގޮތުގައި އެޅިގެންދިޔުން އެއީ، ކޮންމެ ޓީޗަރެއްގެވެސް، ބެލެނިވެރިއެއްގެވެސް ޒިންމާއެއްކަން ދަންނަންވާނެ.
ސަރުކާރުން މަސައްކަތް ކުރަމުންދާނީ، މި ހުރިހާ ކަމަކަށް މަގުފަހިކޮށްދިނުމަށްޓަކައި، ކަންކަން ތަރުތީބު ކުރަމުން. އެއީ މިކަހަލަ އިންފްރާސްޓްރަކްޗަރ މަޝްރޫޢުތައް ހިންގުން ކަމުގައިވިޔަސް، އަދި ނިޒާމީގޮތުން ތަޢުލީމީ ނިޒާމު ވަރުގަދަކުރަން ކުރެވޭ އެކިކަހަލަ ކަންތައް ކަމުގައިވިޔަސް، އަޅުގަނޑުމެން އިރާދަކުރެއްވިއްޔާ ކުރިއަށް ގެންގޮސްދޭނަން. ޚާއްޞަގޮތެއްގައި އިންކްލޫސިވިޓީ ޔަޤީންކުރުމަށްޓަކައި. މުޖުތަމަޢުގައި އުޅޭ ނުކުޅެދުންތެރިކަން ހުންނަ ކުދިންނާއި، ފަރާތްތައްވެސް، އަދި އެކިކަހަލަ ޑިސްއެބިލިޓީސްތައް، ނޫނީވިއްޔާ އެކިގޮތްގޮތުން މާޖިނަލައިޒް ވެފައި ތިބޭ ކުދިންނާއި ފަރާތްތައްވެސް. އެހެންވީމާ، އިންކްލޫސިވް އެޑިޔުކޭޝަނަކީ، މި ސަރުކާރުގެ މުހިންމު ސިޔާސަތެއް. މި ސްކޫލްގައިވެސް އެ ފެސިލިޓީޒް ގާއިމުވެފައި މިހިރީ.
އެހެންވީމާ، އަޅުގަނޑުމެން މަސައްކަތް ކުރަމުންދާނީ، މިކަން ރާއްޖޭގެ އެހެން ކަންކޮޅުތަކުގައިވެސް އިންކްލޫސިވްޓީ އިތުރުކުރުމަށްޓަކައިވެސް މަސައްކަތް ކުރަމުން. މި އަހަރުގެ ތެރޭގައި އެކަމަށް ޚާއްޞަ މަސައްކަތްތަކެއް ކުރަންވެސް އޮތީ ކަނޑައެޅިފައި.
އާދެ، ހުޅުމާލޭގައި ވަކިން ޚާއްޞަކޮށް، މި ފޭސް 2 ގައި މިހާބޮޑު އާބާދީއެއް އޮތްއިރުގައި، މި ސްކޫލް ބިނާވެގެން ދިޔުން ވެގެންދާނީ، މި ފޭސް 2 ގައި އުޅޭ ވަރަށް ގިނަ ޢާއިލާތަކަށް ވަރަށްބޮޑު ފަސޭހައަކަށް. އެކަމަށްޓަކައި ފޭސް 2 ގައި އުޅޭ ހުރިހާ ރައްޔިތުންނަށްވެސް މަރުޙަބާ ދަންނަވަން. އަޅުގަނޑުމެން އިތުރު ސްކޫލްތައް އެޅުންވެސް އިރާދަކުރެއްވިއްޔާ މިއޮތީ ކުރިއަށް. މިނިސްޓަރ ދެންމެ ފާހަގަކުރެއްވި. އެހެންވީމާ، ފޭސް 2 ގައިވެސް، އަދި އިރާދަކުރެއްވިއްޔާ ފޭސް 3 ގައިވެސް، ސްކޫލް އެޅުމާއި، ތަޢުލީމީ ނިޒާމުގެ ތެރެއިން ކުރަންހުރި ކަންކަންވެސް އޮތީ ކުރިއަށް.
އަޅުގަނޑުމެން މަސައްކަތް ކުރަމުންދާނީ، މާލެއާއި އަތޮޅުތެރޭގައި، އެއް ފެންވަރަކަށް ތަޢުލީމީ ނިޒާމުގެ ކަންތައްތައް ބައްޓަންކުރަން. ދެވޭ ތަޢުލީމީ ފެންވަރު އެއްވަރަކަށް ބަހައްޓަން. އެންމެ މަތީ ފެންވަރުގައި ތަޢުލީމީ ކަންތައްތައް ތަރުތީބުކުރަން. އެއީ، އެކި ސަބަބުތަކަށްޓަކައި މާލެއަށް އެބަ އަންނަންޖެހޭ. މިފަހަރުވެސް 1500 އަށްވުރެ ގިނަ ކުދިން، އޭގެ މާނައަކީ 5000 އަށްވުރެ ގިނަ ފަރާތްތައް މިވަނީ ރަށްރަށުން މާލެއަށް ބަދަލުވެފައި. ސްކޫލްތަކަށް ކުދިން ވައްދަން. އޭގެ މާނައަކީ ރަށްރަށުގައި ނެތިއްޔޭ އަދިވެސް މާލޭގައި މި ހުންނަވަރަށް ތަޢުލީމީ ފެންވަރު ގާއިމުކުރެވިފައި. އަދިވެސް ނެތީއޭ. އޭގެ އިތުރު އެހެން ކަންކަންވެސް ހުންނާނެ. ވަޒީފާގެ ފުރުޞަތުތަކާއި، ބޯހިޔާވަހިކަމާއި، މިހެންހުރި ކަންކަންވެސް އެބަހުރި. އެހެންވީމާ، ވަށާޖެހޭގޮތެއްގައި ތަރައްޤީ އެއްވަރަކަށް ޑިސްޓްރިބިއުޓް ކުރުމަށްޓަކައި، އަޅުގަނޑުމެންގެ މަސައްކަތްތައް ތަރުތީބުކުރެވިގެން ހިނގަން ފަށާފައި މިއޮތީ. އިރާދަކުރެއްވިއްޔާ އެ މަގުން ކުރިއަށް ގެންދާނަން.
އާދެ، ނިންމާލަމުންވެސް، ލޮބުވެތި ހުރިހާ ދަރިވަރުންނަށް ދަންނަވާލަން ބޭނުންވަނީ، މި ފުރުޞަތު، އެއީ ކޮން ފުރުޞަތެއްތޯ؟ ތަޢުލީމު ދިނުމަށްޓަކައި ސަރުކާރުން، ހުރިހާ އެންމެން ގުޅިގެން މިދޭ ފުރުޞަތަކީ ކޮންމެ ކުއްޖަކުވެސް ރަނުގެ ފުރުޞަތެއްގެ ގޮތުގައި ބަލައި، ދީނީގޮތުން ވަރުގަދަ ބިންގަލެއްގެ މަތީގައި ބިނާކުރާ، އެ ފުރުޞަތުގެ ބޭނުންހިފާ ފުރުޞަތަކަށް ހަދަންވާނެއޭ. ދީނުގައި އޮންނަގޮތަށް ކަންކަން ކުރުމަކީ، އެއީ ފަރުވާކުޑަކުރާ ކަމަކަށް ނަހަދައި، އަޚްލާޤީގޮތުން ރިވެތި އަޚްލާޤެއް ލިބިގެންވާ ކުއްޖަކަށް ކޮންމެ ކުއްޖަކުވެސް ވުމަށް ޢަޒުމް ކަނޑައަޅައި، ޓީޗަރުންނާއި، ސްކޫލްގެ ޕްރިންސިޕަލާއި، ހުރިހާ ބޭފުޅުން ވިދާޅުވާ ގޮތަށް ސްކޫލްތަކުގައި ހުރިހާ ކުދިންވެސް ކިޔެވުމުގެ ކަންކަން ގެންދިޔުމުން އިރާދަކުރެއްވިއްޔާ، ހުރިހާ ކުދިންގެ މުސްތަޤްބަލް އޮންނާނީ ވަރަށް އުޖާލާކޮށް.
 
އަޅުގަނޑުގެ ދުޢާއަކީ، ރާއްޖޭގެ މުސްތަޤްބަލް ކަމުގައިވާ އަދުގެ ތުއްތުކުދިންނާއި، ކިޔަވާކުދިންގެ މުސްތަޤްބަލް އުޖާލާ ކުރުމަށްޓަކައި މި ކުރެވޭ މަސައްކަތްތައް ކާމިޔާބުވެގެންދިޔުން. ރާއްޖޭގެ ތަޢުލީމީ ޙަޔާތް އިތުރު މަތީ ހަރުފަތްތަކަކަށް ގެންދިޔުމުގައި، އަޅުގަނޑުމެން އެންމެންނަށް ހެޔޮ ތައުފީޤު މިންވަރު ކުރެއްވުން. ރާއްޖޭގެ މުސްތަޤްބަލް އުޖާލާ ކުރުމުގައި ހުރިހާ މަސައްކަތްތަކެއްގައި ކާމިޔާބު މިންވަރު ކުރެއްވުން. އާމީން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.