މިއަހަރުގެ ދަނޑުވެރިންގެ ދުވަހު ހަނިމާދޫ ސްކޫލްގައި އިފްތިތާހްކުރި "ސްކޫލް ހައިޑްރޮޕޯނިކްސް ޕްރޮގްރާމް"ގެ ދަށުން ހައްދާފައިވާ ލެޓިއުސް ފުރަތަމަ ފަހަރަށް ކަނޑައިފި އެވެ.
މި ޕްރޮގްރާމްގެ ދަށުން އެ ސްކޫލުގައި ހައްދާފައިވާ ލެޓިއުސް ކެނޑުމަށާއި ވިއްކުމަށް ބޭއްވި ރަސްމިއްޔާތު ޝަރަފުވެރި ކޮށްދެއްވާފައިވަނީ ހަނިމާދޫ ކައުންސިލްގެ ރައީސް އަބްދުއްސައްތާރު ހަސަންއެވެ.
މިރަސްމިއްޔާތުގައި ހަނިމާދޫ އެގްރިކަލްޗަރ ސެންޓަރާއި ހަނިމާދޫ ސްކޫލްގެ އިސްވެރިންނާއި މުވައްޒަފުން އަދި ގިނަ އަދަދެއްގެ ދަރިވަރުން ވަނީ ބައިވެރިވެފައެވެ.
މި ޕްރޮގްރާމް ސްކޫލުގައި ހިންގުމުގެ މަގުސަދުތަކުގެ ތެރޭގައި ހިމެނެނީ ދަރިވަރުންގެ މެދުގައި ދަނޑުވެރިކަމުގެ މަސައްކަތްތަކަށް ލޯބި އުފެއްދުމާއި، ދަނޑުވެރިކަމަށް ޝައުގުވެރިވާ ޒުވާން ޖީލެއް އުފެއްދުމުގެ އިތުރުން މަދުރަސީ ހަޔާތް ވޭތުކުރާ ދުވަސްވަރު ދަނޑުވެރިކަމުގެ ތަޖުރިބާއާއި އިލްމު ދަރިވަރުންނަށް ލިބިދެވޭނެ މަގު ތަނަވަސް ކޮށްދިނުމެވެ.
މި ޕްރޮގްރާމްގެ ދަށުން ހަނިމާދޫ ސްކޫލުގައި ވަނީ ކުޑަ ރެއިންޝެޑްއެއް ގާއިމްކޮށްފައެވެ. އެތަނުގެ ބޭނުމަކީ ދަރިވަރުންނަށް މަސައްކަތުގެ ތަޖުރިބާ ހާސިލް ކުރުމުގެ ފުރުސަތު ހޯދައިދިނުމެވެ.
އެ ސްކޫލުގައި ގާއިމް ކޮށްފައިވާ ރެއިންޝެޑްގައި ހައިޑްރޮޕޯނިކްސް ސިސްޓަމްގައި ފަތްޕިލާވެލީގެ ބާވަތްތަކާއި ކިޔުކަންބާ އާއި މެލަން ފަދަ ބާވަތްތައް ހައްދާނެ ނިޒާމް ވަނީ ގާއިމްކޮށްފައެވެ.
Thiladhun © 2019 – 2023| Made with ❤️ in #Thiladhunmathi
Thiladhun © 2019 – 2022
Made with ❤️ in #Thiladhunmathi