އެންޓި ކޮރަޕްޝަން ކޮމިޝަން (އޭސީސީ)ގެ ނައިބު ރައީސް އަބްދުއްސަލާމާއި މެންބަރު ތޯހާ މުހައްމަދު، އެ ދެ ބޭފުޅުން މަޤާމުން ވަކިކުރުމަށް މަޖިލީހުގައި ވޯޓަށް އެހުމުގެ ކުރިން، މި ސަރުކާރުން ބިރު ދައްކައިގެން މިއަދު މަޤާމުން އިސްތިއުފާ ދެއްވައިފިއެވެ.
މިނިވަން މުއައްސަސާތަކާ ބެހޭ ކޮމިޓީގެ ސިއްރު ބައްދަލުވުމެއްގައި އިއްޔެ މި ދެ ބޭފުޅުން މަޤާމުން ވަކިކުރުމަށް ފާސްކޮށް، މިއަދު އެކަމަށް ވޯޓު ނެގުމަށް ތާވަލުކޮށްފައި އޮތެވެ. މި ދެ ބޭފުޅުންގެ މައްޗަށް ކުރެވުނު ތުހުމަތުތަކުގެ ތެރޭގައި، މަޤާމުގެ މަސްއޫލިއްޔަތު އަދާނުކުރުމާއި، ގަވާއިދާ ޚިލާފު ޢަމަލުތަކާއި، ބައެއް މައްސަލަތަކުގައި ޢަމަލުކުރެއްވި ގޮތާއި، މުވައްޒަފުންނާމެދު ގޯސްކޮށް ޢަމަލުކުރެއްވުން ހިމެނެއެވެ.
ތޯހާ މަޤާމުން އިސްތިއުފާ ދެއްވައި ރައީސް އޮފީހަށް ފޮނުއްވި ސިޓީގައި ވިދާޅުވެފައިވަނީ، އެއްވެސް އަސާސެއްނެތް ތުހުމަތުތަކެއް ކުރައްވައި، އިތުބާރު ނެތްކަމުގެ މައްސަލަ ބެއްލެވުމަކީ، ޤާނޫނުން ހަވާލުކުރައްވާފައިވާ ޒިންމާތައް މިނިވަންކަމާއެކު އަދާކުރެއްވުމަށް ހުރަސްއެޅޭނެ ކަމެއް ކަމަށެވެ. އަދި މިނިވަންކަމާއެކު މަސައްކަތްކުރެވޭނެ މާޙައުލެއް ނެތުމުން މަޤާމުން އިސްތިއުފާ ދެއްވި ކަމަށް ވިދާޅުވިއެވެ. ސަލާމްވެސް ވަނީ އިސްތިއުފާގެ ސިޓީ ރައީސް އޮފީހަށް ފޮނުއްވާފައެވެ.
މި ދެ ބޭފުޅުންގެ އިސްތިއުފާއާ ގުޅިގެން، އޭސީސީގެ މެންބަރުންގެ ގޮތުގައި މިހާރު ތިއްބެވީ ރައީސް އާދަމް ޝާމިލް، ޝިޔާމާ މުހައްމަދު، އަދި ޝަޒްނާ ހާޝިމްއެވެ.
މުޢިއްޒުގެ ސަރުކާރުން ހިތްޕުޅާ ނުވާ ބޭފުޅުން މަޤާމުތަކުން ދުރުކުރައްވަމުން ގެންދަވާއިރު، މިނިވަން މުވައްސަސާތަކަށް ނުފޫޒު ފޯރުވުމުގެ ނުބައި މަގުސަދުގައި, އީސީ އާއި އޭސީސީގެ ރައީސުން ސީދާ ރައީސުލްޖުމްހޫރިއްޔާއަށް އައްޔަންކުރެއްވޭ ގޮތަށް ޤާނޫނު މިޙާރުވަނީ އިޞްލާޙުކޮށްފައެވެ.
މި ސަރުކާރުން ދަނީ ދައުލަތުގެ މިނިވަން މުވައްސަސާތަކަށް މުއިއްޒުގެ ގޮނޑިކޮއްކޮ މެމްބަރުން އައްޔަން ކުރުމުގެ ބޭނުމުގައި އެ މުވައްސަސާތަކުގައި މިހާރު ތިއްބެވި މެމްބަރުން މަގާމްތަކުން ވަކި ކުރަމުންނެވެ.