އައްޑޫގެ ގުޅިފައިވާ އަވަށްތަކުން މިހާރު ކަރަންޓް ކެނޑެނީ ޓެކްނިކަލް މައްސަލައަކާ ހެދި ކަމަށް އެ ކުންފުނިން ބުނެފި އެވެ.
އިއްޔެ ރޭ މެންދަމުން ފެށިގެން ވެސް ގިނަ އިރުތަކެއް ވަންދެން ކެނޑިފައި ވަނިކޮށް މިއަދު ހެނދުނު 11:00 ޖަހައި ބޮޑުވި ފަހުން އަނެއްކާ ވެސް ކަރަންޓް ކެނޑި ބައެއް އަވަށްތަކަށް އަލުން ކަރަންޓް ލިބުނީ މެންދުރު ފަހު 3:00 ޖަހަން ގާތްވެފައި ވަނިކޮށެވެ.
މިކަމާ ގުޅިގެން ފެނަކަ އިން ބުނީ ޓެކްނިކަލް މައްސަލަތަކެއް ދިމާވެ ގުޅިފައިވާ އަވަށްރަކުން ކަރަންޓް ކެނޑެދެމުންދާތީ މައްސަލަ ހައްލު ކުރުމަށް މެދުނުކެނޑި މަސައްކަތްތަކެއް ކުރެވެމުން އަންނަ ކަމަށެވެ.
އެގޮތުން މިހާރު މައްސަލަ އެއްކޮށް ހައްލުވެ، ގުޅިފައިވާ އަވަށްތަކަް ކަރަންޓް ދީފައިވާ ކަމަށް ފެނަކަ އިން ބުންޏެވެ.
"ކަރަންޓާ ނުލައި ހޭދަކުރައްވަން ޖެހުމުން ކުރިމަތިވާނެ ދަތިތަކާއެކު ވެސް، ރައްޔިތުންގެ ފަރާތުން ދެއްވާ އެއްބާރުލެއްވުމަށާއި ކެތްތެރިކަމަށް ޝުކުރު ދަންނަވަން." ފެނަކަ އިން ސޯޝަލް މީޑިއާ ޕޯސްޓެއްގައި ބުންޏެވެ.
އައްޑޫގެ ގުޅިފައިވާ އަވަށްތަކުން ދޭތެރެ ދޭތެރެއިން ކަރަންޓް ކެނޑުމަކީ ވަރަށް އާންމު މައްސަލައެކެވެ. އަދި މިކަމާ ހުރެ އާންމު ދިރިއުޅުމަށް ވަރަށް ބޮޑަށް ބުރޫއަރަ އެވެ.
ގުޅިފައިވާ އަވަށްތަކަށް ކަރަންޓް ދެނީ އައްޑޫ ލިންކް ރޯޑްގައި ހުންނަ މަރުކަޒީ އިންޖީނުގެއިންނެވެ.