މާލޭގައި ރަށްވެހިވެފައިވާތާ އެއް އަހަރު ނުވި ނަމަވެސް، ބޯހިޔާވަހިކަމުގެ ފުރުސަތުތަކަށް ކުރިމަތިލެވޭ ގޮތަށް އުސޫލުތަކަށް ބަދަލު ގެނެސްފައިވާ ކަމަށް ބިނާރާ، ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާއިން ހާމަކުރައްވައިފިއެވެ.
މި ބަދަލާއެކު މާލޭގައި ދިގު މުއްދަތަކަށް ދިރިއުޅެމުންދާ ފަރާތްތަކަށް ބޯހިޔާވަހިކަމުގެ ސްކީމްތަކަށް ކުރިމަތިލުމުގައި އިތުރު ލުއިތަކެއް ލިބިގެންދާނެއެވެ.
ގެދޮރުވެރިކަމާ ބެހޭ ވުޒާރާއިން ވިދާޅުވީ، މާލޭގައި މެދުނުކެނޑި ދިރިއުޅޭތާ 15 އަހަރުވެފައިވާ ފަރާތްތަކުގެ ތެރެއިން ރަށްވެހިކަން މާލެއަށް ބަދަލުކުރިތާ އަހަރު ނުވި ނަމަވެސް، އެ ކެޓަގަރީގެ ޝަރުތު ފުރިހަމަވާނަމަ މިހާރު ފޯމު ހުށަހެޅޭނެ ކަމަށެވެ. މީގެ ކުރިން އޮތް އުސޫލަކީ މާލޭގައި މެދުނުކެނޑި 15 އަހަރު އުޅުމުގެ އިތުރުން ރަށްވެހިކަން ބަދަލުކުރިތާ ވެސް މަދުވެގެން އެއް އަހަރު ވާންޖެހޭ ގޮތަށެވެ.
އެ ވުޒާރާއިން ނެރުނު އިއުލާނެއްގައި ބަޔާންކޮށްފައިވާ ގޮތުގައި، މި ފުރުސަތުގެ ބޭނުން ހިފާ ފަރާތްތަކުން "މެދުނުކެނޑި މާލޭގައި ދިރިއުޅޭތާ 15 އަހަރުވެފައިވާ ފަރާތެއް" ކަން އެނގޭނެ ލިޔެކިޔުމުގެ އިތުރުން، މާލޭގައި ރަށްވެހިވީ ތާރީޚު އަންގައިދޭ ރަސްމީ ލިޔުމެއް ހުށަހަޅަން ޖެހޭނެއެވެ. މިއީ ބޯހިޔާވަހިކަމުގެ ޝަރުތުތައް ހަމަވާ ފަރާތްތަކަށް ފަސޭހަކޮށްދިނުމަށް ގެނައި ބަދަލެކެވެ.
މި ބަދަލުތަކަކީ ސަރުކާރުން ކުރިއަށްގެންދާ "ގެދޮރުވެރިޔާ" ޕްރޮގްރާމާއި "ބިންވެރިޔާ" ސްކީމުގެ ދަށުން ދެވޭ ފުރުސަތުތަކެކެވެ. މީގެ ތެރޭގައި ކުރީ ސަރުކާރުގެ ސްކީމްގެ ދަށުން ޖޮއިންޓްކޮށް ގޯތި ލިބިފައިވާ ފަރާތްތަކުގެ ތެރެއިން ވަކިން ގޯތި ބޭނުންވާ އާއިލާތަކާއި، ކުރިން ފްލެޓެއް ލިބިފައި އޮތުމުގެ ސަބަބުން ބިންވެރިޔާ ސްކީމަށް ކުރިމަތިނުލެވުނު ފަރާތްތައް ހިމެނެއެވެ.
މީގެ އިތުރުން، ސަރުކާރުން ވަނީ "ބިންވެރިޔާ" ޚާއްޞަ ސްކީމަށް އިތުރު ކެޓަގަރީއެއް ވެސް އިތުރުކޮށްފައެވެ. ކެޓަގަރީ 3 ގެ ދަށުން މިހާރު އެޕްލިކޭޝަން ހުށަހެޅޭނީ ދެ ބަޔަކަށެވެ. އެއީ މާލެ ސަރަހައްދުން ބަންޑާރަ ގޯތި ދޫކުރުމުގެ އުސޫލުގެ ދަށުން ސިންގަލް އެޕްލިކޭޝަން ހުށަހަޅައި ގޯތި ދޫކޮށް ފްލެޓަށް ބަދަލުވާން ބޭނުންވާ ފަރާތްތަކާއި، ޖޮއިންޓް އެޕްލިކޭޝަން ހުށަހަޅާފައިވާ ފަރާތްތަކުގެ ތެރެއިން ގޯތި ދޫކޮށް ވަކިން ގޯއްޗާއި ފްލެޓަށް އެދޭ ފަރާތްތަކެވެ.