ތައުލީމީ ފަންޑުގެ ދަށުން ވިލި މާލޭގައި އިމާރާތް ކުރެވިފައިވާ ޕްރީ ސްކޫލް ހިންގުން އެ ފަންޑުގެ ފަރާތުން އަމިއްލަ ފަރާތަކާ ހަވާލު ކޮށްފި އެވެ.
ވިލި މާލޭ ޕްރީ ސްކޫލް ހިންގުން އަމިއްލަ ފަރާތަކާ ހަވާލު ކުރުމަށްޓަކައި މިއަދު ބޭއްވި ރަސްމިއްޔާތުގައި މިނިސްޓްރީ އޮފް އެޑިއުކޭޝަންގެ ފަރާތުން ސޮއި ކޮށްފައި ވަނީ ތައުލީމީ ފަންޑުގެ ޗެއާމަން އިބްރާހީމް އިސްމާއީލް އެވެ. މި ޕްރީ ސްކޫލް ހިންގުން ހަވާލު ކޮށްފައި ވަނީ އެޑިއުލް އޮޕްޝަން ޕްރައިވެޓް ލިމިޓެޑާ އެވެ. އެ ކުންފުނީގެ ފަރާތުން އެއްބަސްވުމުގައި ސޮއި ކޮށްފައި ވަނީ ކުންފުނީގެ ޑިރެކްޓަރު ހަސަން އިބްރާހީމް އެވެ.
އެއްބަސްވުމުގައި ސޮއި ކުރުމަށް ފަހު ތައުލީމީ ފަންޑުގެ ޗެއާމަން އިބްރާހީމް އިސްމާއީލް ވިދާޅުވީ އެޑިއުލް އޮޕްޝަނާ ހަވާލު ކޮށްފައި ވަނީ 12 އަހަރުގެ މުއްދަތަށް ކަމަށެވެ.
"އެޑިއުލް އޮޕްޝަން އާއި އަޅުގަނޑުމެން ވިލި މާލޭ ޕްރީ ސްކޫލް ހިންގުން ހަވާލު ކުރީ 12 އަހަރުގެ މުއްދަތަށް. ސްކޫލަށް ބޭނުންވާ ޓީޗަރުންނާއި އެހެން ފެސިލިޓީސް ހަމަޖައްސާނީ އެ ފަރާތުން. " އިބްރާހީމް އިސްމާއީލް ވިދާޅުވި އެވެ.
ތައުމީ ފަންޑުގެ ފަރާތުން ސަން އަށް މައުލޫމާތު ދެއްވަމުން ވިދާޅުވީ އެޑިއުލް އޮޕްޝަން އަށް ވިލި މާލޭ ޕްރީ ސްކޫލް ހިންގުން ހަވާލު ކުރީ ތައުލީމީ ފަންޑަށް ކޮންމެ މަހަކު ވަކި އަގެއް ދައްކާ ގޮތަށް ކަމަށެވެ. އެގޮތުން ފުރަތަ އަހަރު އެއްވެސް އަގެއް ދައްކާން ނުޖެހޭނެ ކަމަށާއި އެހެން ނަމަވެސް ދެވަނަ އަހަރުން ފެށިގެން ކޮންޓްރިބިއުޝަންގެ ގޮތުގައި އަގެއް ދައްކަން ޖެހޭނެ ކަމަށެވެ. އެގޮތުން ދެވަނަ އަހަރާއި ތިން ވަނަ އަހަރު ދައްކާން ޖެހޭނީ ކޮންމެ މަހަކު 5000 ރ އެވެ. ހަތަރު ވަނަ އަހަރާއި ފަސް ވަނަ އަހަރު ދައްކަން ޖެހޭނީ މަހަކު 7300ރ އެވެ. ހަވަނަ އަހަރުން 10 ވަނަ އަހަރުގެ ނިޔަލަށް 10،000 ރ އެވެ. އަދި 11 ވަނަ އަހަރުން ފެށިގެން 12 ވަނަ އަހަރުގެ ނިޔަލަށް 12،000ރ އެވެ.