ޓޫނާޕައި ޓޫނާ ޕައި ބޭނުންވާތަކެތި ½1 ޖޯޑު ގޮދަން ފުށް 1 ސައިސަމުސާ ބޭކިންޕައުޑަރު 1 މޭޒުމަތީސަމުސާ މާޖިރީން ½ ސައިސަމުސާ ހަކުރު 1 ދަޅު ތެޔޮމަސް 1 ފިޔާ (ކުޑަ، ކޮށާފައި) 1 ލޮނުމެދު (ގާނާފައި) ⅓ ސައިސަމުސާ އަސޭމިރުސް (މުގުރާފައި) 1 ޓޮމާޓޯ (ކުޑަ، ވައްކޮށް ކޮށާފައި) 1 ކުކުޅުބިސް ގިތެޔޮމިރުސް، ލޮނު ފުށްގަނޑު ހަދާ ގޮތް ފުށާއި ބޭކިންޕައުޑަރު އެއްކޮށްފައި، ފުރޭނުން. އެ ފުށުގެ ތެރެއަށް ލޮނާއި، ހަކުރާއި، މާޖިރީން އެއްކުރުން. އޭގެ ތެރެއަށް ފެން އަޅައިގެން، ރޮށި ފިހަން ފުށް މޮޑޭ ގޮތަށް މޮޑެލުން. އެ ފުށްގަނޑު އެއްޗަކަށް ލާފައި، މަތި ބަންދު ކޮށްފައި ދިހަ މިނެޓު ވަންދެން ބެހެއްޓުން. މަސްގަނޑު ތައްޔާރު ކުރާ ގޮތް މަސްދަޅުގެ ތެޔޮފޮދުގައި ފިޔާ މީރު ކުރުން. ފިޔާކޮޅު ރަތް ވީމައި، ތެޔޮމަސް އެޅުން. ގިތެޔޮމިރުސް، އަސޭމިރުސް، ލޮނު އެޅުން. ރަނގަޅަށް އެއްކޮށްލުމަށް ފަހު ލޮނުމެދު އެޅުން. އެއްކޮށްލާފައި ލޮނު ހެޔޮވަރު ކުރުން. ފިހާ ގޮތް ފުށްގަނޑު ދެބައި ކޮށްލުން. އެއްބައި ރޮށްޓެއް ގޮތަށް ދަމާލުން. ފިހާ ތަބަކުގައި އެ ރޮށި ބޭއްވުން. އޭގެތެރޭގައި، ދެންމެ ތައްޔާރު ކުރި މަސްގަނޑު ފަތުރާލުން. އޭގެ މަތީގައި ޓޮމާޓޯފޮތިތައް އަތުރާލުން. ދެން އޮތް ފުށްގުޅަ ދަމާފައި، ތަބައް މަތީގައި ބޭއްވުން. ވަށައިގެން ރަނގަޅަށް ބެއްދުމަށް ފަހު، ފުށްގަނޑު މަތީގައި ބިހުގެ ގޮބޮޅިކޮޅެއް ހާކާލުމަށް ފަހު ފިހުން. ހަނާ ކުރި ބޯށި ހަނާކުރި ބޯށި ބޭނުންވާތަކެތި 1 ބޯށި 1 ގަނޑު ވަޅޯ މަސް (ކުޑަ، ކޮށާފައި) ބައި ސައިސަމުސާ އަސޭމިރުސް (މުގުރާފައި) ބައި ސައިސަމުސާ ދިރި (މުގުރާފައި) 2 ލޮނުމެދު (މެދުން ފަޅާފައި، ކޮށާފައި) 1 ފިޔާ (ބޮޑު، ކޮށާފައި) ރޯމިރުސް (މެދުން ފަޅާފައި) ނުވަތަ ހިކިމިރުސް (މެދުން ބުރި ކޮށްފައި)، ހިކަނދިފަތް، ރާނބާފަތް، ތެޔޮ، ލޮނު ހަދާނެގޮތް (އާދައިގެ ސައިޒުގެ ބޯއްޓެއް ނަމަ) ހަ ޖޯޑު ފެނުގެ ތެރެއަށް އެއް ސައިސަމުސާ ލޮނު އަޅާފައި، އޭގެ ތެރެއަށް، ތުނިކޮށް ބޯށި ކޮށުން. ކޮށާފައި ހުރި ބޯށިތަކާ ހަމައަށް ފެންފޮދު ނާރާ ނަމަ، އިތުރަށް ފެން އެޅުން. ބޯށިތައް ރަނގަޅަށް ދޮވެލުމަށް ފަހު ފެންފޮދު ވަކި ކޮށްލުން. ވަކި އެއްޗެއްގައި (ހިކަނދިފަތާއި ރާނބާފަތް އަޅައިގެން) ފިޔާ މީރު ކޮށްފައި، ނެގި ބޯށިކޮޅު އޭގެ ތެރެއަށް އަޅާލުން. އެ އަށް ފަހު، ވަޅޯ މަސް، މިރުސް، އަސޭމިރުސް، ދިރި، ލޮނުމެދު އަޅާފައި، ރަނގަޅަށް އެއްކޮށްފައި، މަތި ޖަހާފައި، މަޑު ގިނީގައި ކެއްކުން. އެކަމަކު، ކައްކަމުންދާއިރު، ފުލުގައި ހިފިޔަ ނުދީ، ދޭތެރެދޭތެރެއިން (މަތި ނަގާފައި) އެއްކުރަމުން ގެންދިޔުން. ބޯށިން ނުކުންނަ ފެންތައް ހިނދޭއިރު، ބޯށި ހުންނާނީ ރޯފިލާފައި. މަތި ނެގުމަށް ފަހު، ލޮނު ހެޔޮވަރު ކޮށްފައި، އެއްކުރަމުން، ފަސް މިނެޓެއް ހާއިރު ވަންދެން ކައްކާލުން. ކައްކަން ވާނީ މަޑު ގިނީގައި. އެޑިޓަރުގެ ނޯޓް: މި ރެސިޕީތަކަކީ، ފާތިމަތު ޚުރުޝިދާގެ ރެސިޕީތަކެކެވެ. އޭނާ އަންނަނީ ދިވެހި ރަހަތަކަށް އިސްކަން ދީގެން އަމިއްލަ ގޭގައި އެތަކެތި ތައްޔާރުކޮށް، އޭގެ ހުރިހާ މައުލޫމާތަކާއި ފޮޓޯތައް ފޭސްބުކް ޕޭޖް "ރުމާ"ގައި ކިޔުންތެރިންނާ ހިއްސާ ކުރަމުންނެވެ.