އިނގިރޭސި ޕްރިމިއަރ ލީގުގައި ހޮނިހިދު ދުވަހުގެރޭ ނިއުކާސަލް ޔުނައިޓެޑް އަތުން ހޯދި ހަނި މޮޅާއެކު ލިވަޕޫލުން ވަގުތީގޮތުން ލީގު ތާވަލުގެ އެއްވަނައަށް ކުރިއަށް ޖެހިލައިފިއެވެ.
އެއްވަނައިގައި އޮތް މެންޗަސްޓަރ ސިޓީ އާއި ޕޮއިންޓުގެ ގޮތުން ކުޑަ ފަރަގެއް ދަމަހައްޓަމުން އަންނަ ލިވަޕޫލް އިންވަނީ މިއަދު ހޯދި މޮޅާއެކު ސިޓީ އަށްވުރެ އިތުރަށް އެއްމެޗު ކުޅެ 34 މެޗުން 82 ޕޮއިންޓު ހޯދާފައެވެ. ވަގުތީގޮތުން މިވަގުތު ތާވަލުގެ ދެވަނައިގައި އޮތް މެންޗަސްޓަރ ސިޓީ އަށް ލިބެނީ 33 މެޗުން 80 ޕޮއިންޓެވެ.
ލީގު ޓައިޓަލް އަށް މި ދެޓީމުގެ ވާދަވެރިކަން ބޮޑުވެފައިވާއިރު، ނިއުކާސަލްގެ މައްޗަށް އެޓީމުގެ ދަނޑުގައި ލިވަޕޫލުން ކުރިހޯދީ 0-1 ގެ ނަތީޖާއަކުންނެވެ.
"ކުއަޑްރަޕްލް" އެއް ނުވަތަ މި ސީޒަނުގައި ހަތަރު ޓްރޮފީ އެއް ކާމިޔާބު ކުރުމުގެ ބޮޑު އަޒުމެއްގައި ކުޅެމުން އަންނަ ލިވަޕޫލުން މިމެޗާއި ކުރިމަތިލީ އެޓީމުގެ ފުރަތަމަ 11 އަށް ބަދަލުތަކެއް ގެނެސްގެންނެވެ. އެގޮތުން އެންމެ ފާހަގަކޮށްލެވޭ ބަދަލީ ޔޫއެފާ ޗެމްޕިއަންސް ލީގުގެ ސެމީ ފައިނަލުގެ ފުރަތަމަ ލެގުގައި ވިޔަރެއާލް އަތުން މޮޅުވި މެޗަށްފަހު އަރާމު ކުރަން ވަގުތު ދިނުމުގެ ގޮތުން މިމެޗުގެ ފުރަތަމަ 11 ގައި އިތުބާރު ފޯވާޑް މުހައްމަދު ސަލާހް އަށް ފުރުސަތު ނުދޭކަމެވެ. އެހެންނަމަވެސް އޭނާ ވަނީ މެޗުގައި ބަދަދު ކުޅުންތެރިއެއްގެ ގޮތުގައި ކުޅެން އަރާފައެވެ.
މި ބަދަލުތަކާއެކު ލިވަޕޫލަށް މެޗުގެ ކުރީކޮޅުގައި ގޮންޖެހުންތަކަކާއި ކުރިމަތިލާން ޖެހުނުހެން ހީވިއެވެ. ހާއްސަކޮށް ރަނގަޅު ފޯމެއްގައި އޮވެ މެޗާއި ކުރިމަތިލި ނިއުކާސަލް އިން ވަރަށް ޕްރެސިންގ ގޭމެއް ކުޅެމުން ދިއުމުގެ ސަބަބުން މެޗުގެ ކުރީކޮޅުގައި ލިވަޕޫލްގެ ކުޅުންތެރިންނަށް ގޯސްތަކެއްވެސް ހެދުނެވެ.
އެހެންނަމަވެސް ޔާގެން ކްލޮޕްގެ އިރުޝާދުގެ ދަށުން ލިވަޕޫލުން ވަނި މަޑުމަޑުން މެޗުގެ ކޮންޓްރޯލް ހޯދާފައެވެ. އަދި ފުރަތަމަ ހާފުގެ 19 ވަނަ މިނެޓުގައި އެޓީމުން މެޗުގައި ޖެހި ލަނޑު ކާމިޔާބުކޮށް، ޓީމު ވަރަށް ބޮޑަށް މެޗުގެ ކޮންޓްރޯލް ހޯދިތަން ފެނިގެންދިޔައެވެ.
އޭރިއާ ތެރެއިން ވަރަށް ރީތިކޮށް ޑްރިބްލް ކޮށްލުމަށްފަހު ނިއުކާސަލްގެ ކީޕަރު ކައިރިންވެސް ނައްޓާލުމަށްފަހު މިލަނޑު ލިވަޕޫލަށް ކާމިޔާބު ކޮށްދިނީ ނަބީ ކެއިޓާއެވެ. މިއީ މި ސީޒަނުގައި ކެއިޓާ ލިވަޕޫލަށް ކާމިޔާބު ކޮށްދިން ހަތަރުވަނަ ލަނޑެވެ.
ދެވަނަ ހާފު ފަށައިގެންވެސް ދެޓީމުންވެސް ލަނޑެއް ޖަހަން ގިނަ މަސައްކަތްތަކެއް ކުރިއިރު ލިވަޕޫލުން ވަނީ އިތުރު ލަނޑެއްޖަހާ ލީޑު ފުޅާކުރަން ރަނގަޅު ހަމަލާއެއްވެސް ފޮނުވާލާފައެވެ. އެގޮތުން ޑިއޭގޯ ޖޮޓާ ފޮނުވާލި ހަމަލާއެއް ކީޕަރުގެ އަތުގައި ޖެހިފައި އެނބުރި ކުޅުމުގެ ތެރެއަށް އައުމުން، ގޯލާއި ދާދި ކައިރީގައި ހުރެފައި ސަޑިއޯ މާނޭ ފޮނުވާލި ބޯޅަ ދިޔައީ ގޯލާއި އަމާޒުނުވެ ބޭރަށެވެ.
މި މޮޅާއެކު ލިިވަޕޫލް އަށް ލީގު ތާވަލުގެ އެއްވަނަ ލިބުނުއިރު، މެންޗަސްޓަރ ސިޓީއަށް އަލުން އެއްވަނައަށް އެރުމުގެ ފުރުސަތު މިރޭ ލިބިގެންދާނެއެވެ. އެގޮތުން ސިޓީން މިރޭ ލީޑްސް އާއި ދެކޮޅަށް ނުކުންނަ މެޗުން މޮޅުވެގެން އަތުން އެއްވަނައިގައި އެއް ޕޮއިންޓުގެ ފަރަގަކާއިއެކު އެޮވެވޭނެއެވެ. ލީޑްސް މެޗު ނިމޭއިރު މި ދެޓީމަށްވެސް ލީގުގައި 34 މެޗު ކުޅެވޭއިރު، ބާކީ އިންނާނީ ލީގުގައި ކޮންމެ ޓީމަކަށްވެސް 4 މެޗެވެ.