ތެޔޮބަރުކޮށްގެން ހޮރުމޫޒް ކަނޑުއޮޅިން ދަތުރުކުރި އިންޑިއާގެ ތެޔޮ ޓޭންކަރަކަށް ބަޑީގެ ނުރައްކާތެރި ހަމަލާތަކެއް ދީފިއެވެ.
ބަޑީގެ ހަމަލާތަކުގެ ސަބަބުން އުޅަނދުގެ ބައެއް ތަންތަނަށް ގެއްލުންތައް ލިބިފައިވީ ނަމަވެސް، އުޅަނދުގެ ފަޅުވެރިންނަށް އެއްވެސް ގެއްލުމެއް ލިބިފައި ނުވާކަމަށް ރިޕޯޓްތައް ބުނެއެވެ.
މި ހާދިސާއާ ގުޅިގެން އުޅަނދާއި ފަޅުވެރިންގެ ރައްކާތެރިކަން ކަށަވަރުކުރުމަށްޓަކައި، ކެޕްޓަން ވަނީ އުޅަނދު ދަތުރުކުރަމުންދިޔަ މަގު ވަގުތުން ބަދަލުކޮށްފައެވެ. އަދި އޭގެ ފަހުން އިތުރު ސަލާމަތީ ނުރައްކަލަކާ ކުރިމަތިނުވެ، އިންޑިއާގެ ކަނޑުގެ ސަރަހައްދާ ހަމައަށް ދަތުރު ކުރިއަށް ގެންގޮސްފައިވެއެވެ.
އެ އުޅަނދު އޮޑިޝާގެ އައްސޭރިފަށަށް ފޯރުމުން، ޕަރާދީޕް ބަނދަރާ 22 ކިލޯމީޓަރު ބޭރުގައި ބާއްވައިގެން ސިންގަލް ޕޮއިންޓް މޫރިންގް (އެސްޕީއެމް) ނިޒާމުގެ އެހީގައި ތެޔޮ ހުސްކުރުމުގެ މަސައްކަތް މިހާރު ވަނީ ފަށާފައެވެ.
ނުރައްކާތެރި ސަރަހައްދެއްގެ ތެރެއިން ދަތުރުކޮށް ފަޅުވެރިން ދެއްކި ހިތްވަރާއި ފަންނީ ހުނަރުވެރިކަން ފާހަގަކޮށް، ބަނދަރުގެ އޮފިޝަލުން ވަނީ އުޅަނދަށް ޒިޔާރަތްކޮށް ފަޅުވެރިންނަށް މަރުހަބާ ކިޔާފައެވެ.