ޕޮލިސް އިންޓެގްރިޓީ ކޮމިޝަނުގެ މެމްބަރު ކަމަށް ކުރީގެ ޑެޕިއުޓީ ކޮމިޝަނަރ އޮފް ޕޮލިސް މުހައްމަދު ރިޝްވާނު އައްޔަން ކުރުމަށް އޭނާގެ ނަން ރައީސް މަޖިލީހަށް ފޮނުއްވައިފިއެވެ.
މަޖިލީހުގެ މިއަދުގެ ޖަލްސާގައި ރިޝްވާނުގެ ނަންވަނީ މަޖިލީހަށް އިއްވާފައެވެ. އަދި އެނަން ދިރާސާ ކުރުމަށް މިނިވަން މުއައްސަސާތަކާއި ބެހޭ ކޮމިޓީއަށް ވެސްވަނީ ފޮނުވާފައެވެ.
މަޖިލީހަށް ރައީސް މުހައްމަދު ވަހީދު ހަސަން މަނިކު ފޮނުއްވާފައިވާ ސިޓީގައި ވިދާޅުވެފައިވަނީ، އާއްމުކޮށް އިއުލާނު ކުރުމުން ކުރިމަތިލައްވާފައިވަނީ ރިޝްވާނު ކަމަށެވެ. ރިޝްވާނުގެ ނަން މަޖިލީހަށް ފޮނުވާފައިވަނީ އެކޮމިޝަނުގެ ރައީސް ކަމުގެ މަގާމުގައި ކުރިން ހުންނެވި ޝަހިންދާ އިސްމައިލު އެމަގާމުން އިސްތިއުފާ ދެއްވުމުންނެވެ.
ޝަހިންދާ އިސްތިއުފާ ދެއްވާފައިވަނީ އެހެން މެމްބަރުންނާއި ހިޔާލު ތަފާތުވަމުން ދިއުމާއި ގުޅިގެން އިތުރަށް މަސައްކަތް ކުރެވެން ނެތް ކަމަށް ވިދާޅުވެއެވެ.