މީހުން ލައްވާ މަޖުބޫރުން މަސައްކަތް ކުރުވައިގެން އަހަރަކު 150 ބިލިއަން ޑޮލަރުގެ ނުހައްގު ފައިދާ އެކި ފަރާތްތަކުން ހޯދާ ކަމަށް އިންޓަނޭޝަނަލް ލޭބަ އޯގަނައިޒޭޝަން (އައިއެލްއޯ) އިން ބުނެފި އެވެ. މަސައްކަތްތެރިންގެ ބައިނަލްއަގުވާމީ ޖަމިއްޔާ އިން ބުނީ މަޖުބޫރުން މަސައްކަތް ކުރުވައިގެން ލިބޭ ކަމަށް އަންދާޒާ ކުރެވޭ ފައިދާ ކުރިން ހީކުރެވިފައިވާ ކަމަށް ވުރެ އެތައް ގުނައެއް އިތުރު ކަމަށެވެ. އެހެންވެ މި މައްސަލާގައި ސަރުކާރުތަކުން ހަރުދަނާ ފިޔަވަޅުތަކެއް އެޅުމަށް އައިއެލްއޯ އިން ވަނީ ގޮވާލައިފަ އެވެ. އައިއެލްއޯގެ ދިރާސާ ރިޕޯޓްގައި ބުނެފައި ވަނީ މަޖުބޫރީ ހާލަތުގައި މަސައްކަތްކުރަމުން އަންނަ 21 މިލިއަން މީހުން އުޅޭ ކަމަށާއި މި ހާލަތަށް ވެއްޓުމުގެ ނުރައްކާ އެންމެ ބޮޑަށް އޮތީ އަމިއްލަ ގައުމު ނޫން އެހެން ގައުމުތަކަށް ގޮސްގެން ވަޒީފާ އަދާކުރާ މީހުންނަށް ކަމަށެވެ. މަޖުބޫރުން މަސައްކަތް ކުރުވައިގެން ފައިދާ ހޯދާ ގޮތްތައް. ދިރާސާގައި ބުނެފައި ވަނީ މަޖުބޫރީ ހާލަތުގައި މަސައްކަތްކުރާ މީހުންގެ ތެރެއިން ދެ ބައިކުޅަ އެއް ބަޔަށް ވުރެ ގިނަ މީހުން އުޅެނީ އޭޝިއާ ސަރަހައްދުގައި ކަމަށާއި 18 ޕަސެންޓް މީހުން އުޅެނީ އެފްރިކާގައި ކަމަށެވެ. އަދި ލެޓިން އެމެރިކާ ސަރަހައްދުގައި 10 ޕަސެންޓް މީހުން އުޅޭ ކަމަށް ބުނެފައިވެ އެވެ. "މި ރިޕޯޓާ އެކު ޓްރެފިކިން އާއި މަޖުބޫރުން މަސައްކަތް ކުރުވުމާއި ޒަމާނީ އަޅުވެތިކަމާ މެދު ދެކޭ ގޮތް އިތުރަށް ގޯސްވެގެން ހިނގައްޖެ،" އައިއެލްއޯގެ ޑިރެކްޓަ ޖެނެރަލް ގައި ރައިޑަ ވިދާޅުވި އެވެ. ދިރާސާގައި ބުނެފައި ވަނީ ގަދަކަމުން މަސައްކަތް ކުރުވައިގެން ހޯދާ ފައިދާގެ އެއްވެސް މިންވަރެއް އެ މަސައްކަތްކުރާ މީހާ އަށް ނުލިބޭ ކަމަށާއި އެއިން ޓެކްސް ވެސް ނުދައްކާ ކަމަށެވެ. އަދި މި ނަހަމަ ފައިދާގެ ބޮޑު ބައެއް ހިއްސާކުރަނީ ޖިންސީ ވިޔަފާރި ކުރުވައިގެން ކަމަށް ވެެސް ބުނެފައިވެ އެވެ. ދެން އެންމެ ބޮޑު ފައިދާއެއް ހޯދަނީ ގޭތެރޭގެ މަސައްކަތް ކުރުވައިގެންނެވެ. އަދި ދެން އެންމެ ފައިދާ ގިނައީ ދަނޑުވެރިކަމާއި އިމާރާތް ކުރުމުގެ އިންޑަސްޓްރީންނެވެ. މަޖުބޫރީ ހާލަތުގައި މަސައްކަތްކުރަން ޖެހުމުގެ މައިގަނޑު ސަބަބަކީ ފަގީރު ހާލަތުގައި އުޅެން ޖެހުން ކަމަށާއި އެހެންވެ މައްސަލައިގެ އަސްލު ސަބަބު ނައްތާލުމަށް ސަރުކާރުތަކުން މަސައްކަތްކުރަން ޖެހޭނެ ކަމަށް އައިއެލްއޯ އިން ބުނެފައިވެ އެވެ.