ދިވެހިރާއްޖޭގެ މިނިވަން ކަމަށް 50 އަހަރު މިއަންނަ އަހަރު ފުރޭއިރު އެމުނާސަބަތުގައި ކުރިއަށް ގެންދާ ހަރަކާތްތަކަކީ މީގެ ކުރިން ރާއްޖޭގައި ހިނގާފައި ނުވާ ފަދަ ހަރަކާތްތަކަކަށް ވެގެން ދާނެ ކަމަށް ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.
މިނިސްޓަރ އުމަރު މިހެން ވިދާޅުވެފައި ވަނީ ރާއްޖޭގެ މިނިވަން ކަމަށް 50 އަހަރު ފުރޭތީ ހިންގާނެ ހަރަކާތްތަކާއި ގުޅޭ ގޮތުން ހިޔާލު ހޯދުމަށް މިރޭ ދަރުބާރުގޭގައި ބޭއްވި ފޯރަމެއްގައި ވާހަކަފުޅު ދައްކަވަމުންނެވެ.
މިނިސްޓަރ އުމަރު ވިދާޅުވީ މިނިވަން 50 ފާހަގަކުރުމަށް ހިންގޭ ހަރަކާތްތަކަކީ މީގެ ކުރިން ހިންގާފައި ނުވާ ކުލަ ގަދަ އަދި އަޑު ގަދަ ހަރަކާތްތަކަކަށް ވެގެންދާނެ ކަމަށެވެ.
އަދި ސަރުކާރުގެ އަމާޒަކީ މިނިވަން 25 ގައު ކުރިއަށް ގެންދިއަ ހަރަކާތްތަކަށް ވުރެ ކުލަ ގަދަ ހަރަކާތްތަކެއް މިނިވަން 50 ގައި ހިންގުން ކަމަށް ވެސް މިނިސްޓަރ ވިދާޅުވިއެވެ.
"އިރާދަކުރެއްވިއްޔާ އަޅުގަނޑުމެންގެ އަމާޒަކީ މިނިވަން 25 ގައި ކުރިއަށް ގެންދިއަ ހަރަކާތްތަކަށް ވުރެ ކުލަ ގަދަ، އަލި ގަދަ، ހަރަކާތްތަކެއް ހިންގުން." މިނިސްޓަރ ވިދާޅުވިއެވެ.
މިރޭ ބޭއްވި ފޯރަމްގައި ވާހަކަފުޅު ދައްކަވަމުން މިނިސްޓަރ ވިދާޅުވީ މިނިވަން 50 ގައި ހިންގަން ފެންނަ ހަރަކާތްތައް ހުށެހެޅުމުގެ ފުރުސަތު ހުޅުވާލުމާއި އެކު ވަރަށް ގިނަ ފަރާތްތަކުން ތަފާތު ހިޔާލުތަކެއް ހުށައަޅާފައިވާ ކަމަށެވެ.
ނަމަވެސް ހިޔާލް ތަކުގެ ތެރެއިން މިނިވަން 50 ގައި ހިންގާނެ 7 އައިޓަމެއް ކަނޑައަޅާނީ ކޮމެޓީ އަކުން ކަމަށް ވެސް އުމަރު ވިދާޅުވިއެވެ.
މިކޮމެޓީގައި ހޯމް މިނިސްޓަރ އުމަރު ނަސީރުގެ އިތުރުން ފޮރިން މިނިސްޓަރ ދުންޔާ މައުމޫން ވެސް ހިމެނިވަޑައި ގަންނަވައެވެ.
މިނިވަން 50 ފާހަގަކުރުމުގެ ގޮތުން ސިފައިންނާއި ފުލުހުންގެ އައިޓަމްތައް ކުރީ އަހަރު ތަކެކޭ ވެސް އެއްގޮތަށް އޮންނާނެ ކަން މިނިސްޓަރ މިރޭ ވަނީ އިއުލާން ކުރަށްވާފައެވެ.
މިރޭގެ ފޯރަމްގައި ބައިވެރިވި އާންމުން ހުށަހެޅި ހިޔާލް ތަކުގެ ތެރޭގައި ރާއްޖެ އިސްލާމްވި ގޮތް ދަށްކައިދޭ މައުރަޒެއް ބޭއްވުމާއި ކަސްޓަމްސް އަށް އައިސްފައި ހުރި ބަދަލުތަށް ދަށްކުވައިދޭ މައުރަޒެއް ބޭއްވުން ފަދަ ހިޔާލްތައް ވަނީ ހުށައަޅާފައެވެ.