ކ. ހިންމަފުށީގައި 1700 މީހުން ދިރިއުޅޭއިރު ހިންމަފުއްޓަކީ ސަރުކާރަށް ތާއީދު ބޮޑު ރަށެކެވެ. ނަމަވެސް ކަރަންޓްގެ އަގަށް ސަރުކާރުން ގެނައި ބަދަލާއި ގުޅިގެން ހިންމަފުށީ ރައްޔިތުން ކަންބޮޑުވުން ފާޅުކޮށް މިއަދު ވަނީ މުޒާހަރާކޮށްފަ އެވެ. ހިންމަފުށީ ރައްޔިތުން ބުނީ ކަރަންޓާއި ނުލައި ދިރިނޫޅެވޭއިރު ބިލް ދައްކާފައި ދިރިނޫޅެވޭ ވަަރަށް ކަރަންޓް ބިލް ބޮޑުވެފައިވާ ކަމަށެވެ.
ހިންމަފުށީގައި ކަރަންޓްގެ ހިދުމަތް ދެމުންދަނީ މާލޭގައިވެސް ކަރަންޓްގެ ހިދުމަތްދެމުން އަންނަ ސަރުކާރުގެ ކުންފުނި ސްޓެލްކޯއިން ނެވެ. ނަމަވެސް މާލޭގައި ޔުނިޓަކަށް ނަގާ އަގަށްވުރެ ރަށްރަށުގައި ނަގާ އަގު އެތައް ތަނެއް ބޮޑުވުމަކީ އެ ރައްޔިތުންގެ ވަރަށް ބޮޑު ކަންބޮޑުވުމެކެވެ. މީގެ އިތުރަށް ކުރިން ސަރުކާރުން ދެމުންއައި ސަބްސިޑީ ކަނޑާލުމާއި އެކު ބައެއް ގޭބިސީތަކުގައި ކަރަންޓް ބިލްގެ އަގު ދެގުނަ ބޮޑުވެފައިވާ ކަމަށްވެސް އެމީހުން ބުނެ އެވެ. އެގޮތުން އާންމުކޮށް ހުރިހާ ގެއެއްގެ ބިލްތަކަށްވެސް 2000 ރުފިޔާއާއި 5000 ރުފިޔާއާ ދެމެދުގެ އަދަދެއް އިތުރުވެފައިވާ ކަމަށާއި، އެެހެން ކަމުން ރައްޔިތުން ގޮތް ހުސްވެފައިވާ ކަމުގައިވެސް ހިންމަފުށީ ރައްޔިތުން ބުނެ އެވެ.
މުޒާހަރާކުރި މީހުން ބުނީ އެމީހުންނަށް ކަރަންޓް ބިލްތައް ބޮޑު ކަމުން ދެއްކޭނެ ގޮތެއް ނެތް ކަމަށެވެ. އަދި މިމައްސަލައަށް ހައްލެއް ބޭނުންވާ ކަމަށާއި، މުޒާހަރާކުރަން ޖެހުނީ މިހާތަނަށް ހައްލެއް ނުލިބުމުން ކަމަށްވެސް އެމީހުން ބުންޏެވެ. އަދި މިއީ އެއްވެސް ހާލެއްގައި ސިޔާސީ ކަމެއް ނޫން ކަމަށްވެސް ހިންމަފުށީ ރައްޔިތުން ބުނެ އެވެ.
"އަޅުގަނޑުމެން ކުރިން ބިލަށް ދައްކަމުން އައީ 3000ރ. އެކަމަކު މިމަހު އެބައޮތް 7000ރ. އަރާފައި. ސަރުކާރުން މިއަށްވުރެ ރަނގަޅު ގޮތެއް ހަދައިދޭނެ ކަމަށް އުއްމީދު ކުރަން. މިއީ ކޮންމެހޭ ސަރުކާރާ އިދިކޮޅުވެގެން ކުރާ ކަމެއް ނޫން. އެކަމަކު ކަރަންޓް ބިލްގެ އަގު ތިރިވަންދެން މިކަން ކުރާނަން،" ރައްޔިތަކު ބުންޏެވެ.
މުޒާހަރާގައި ބައިވެރި ބައެއް ފަރާތްތަކުންނާއި، ރަށުކައުންސިލް މެމްބަރަކުވެސް ވިދާޅުވީ އެ ކަންބޮޑުވުންތައް ސަރުކާރާއި ހިއްސާކުރުމަށް މަސައްކަތް ކުރި ނަމަވެސް އެކަމުގައި އަދި އަލިމަގެއް ނުފެންނަ ކަމަށެވެ. މީގެ އިތުރުން ރައްޔިތުންގެ މަޖިލީހުގެ އިންތިހާބަށްފަހު ހިންމަފުށި ނިސްބަތްވާ ތުލުސްދޫ ދާއިރާގެ މެންބަރު މުހައްމަދު ވަހީދު އިބްރާހިމާ ބައްދަލުނުވާ ކަމަށްވެސް ހިންމަފުށީގެ ބައެއް ރައްޔިތުން ވަނީ ފާހަގަކޮށްފަ އެވެ.
"މިކަމާއި ގުޅިގެން ދާއިރާގެ މެންބަރު ވައްޑޭ އާއިވެސް ބައްދަލުކުރެވޭތޯ ބަލައިފިން. އެކަމަކު އަދި މިހާތަނަށް މިކަމަށް އިޖާބައެއް ދީފަ ނުވޭ. އަދި ސްޓޭލްކޯގެ ވެރިންނާވެސް ވާހަކަދައްކައިގެން މިކަން ހައްލުވޭތޯ މިބަލަނީ،" ރައްޔިތަކުން ބުންޏެވެ.
ކަރަންޓް ބިލަށް ގެނައި ބަދަލާއި ގުޅިގެން އާދަޔާ ހިލާފަށް ބިލް ބޮޑުވެފައިވާކަން ބައެއް ރައްޔިތުން ވަނީ ފާހަގަކޮށްފަ އެވެ.
"މިދިޔަ ދެމަހުގެ ބިލަށްވެސް 18،600 ރުފިޔާ އަރާފަ. އަޅުގަނޑުމެންގެ މިއީ ތިން ކޮޓަރީގެ ގެއެއް. ކުރީގައި ވެއްޖެއްޔާ 4،500ރ. އިން އަޅުގަނޑުމެންނަށް ކަރަންޓް ބިލް ސަލާމަތްވޭ. އެކަމަކު މި ދެމަހުގެ މިހާރުވެސް އެބައޮތް 18،600ރ. ބިލެއް" ހިންމަފުށީ އަންހެނަކު ބުންޏެވެ.
މިއަދުގެ މުޒާހަރާ މިއަދު ހަވީރު 5:00 ޖެހިއިރު ފަށައިގެން ކުރިއަށް ގެންދިޔައިރު މުޒާހަރާގެ ބައިވެރިން ވަނީ ރަށުގެ ބޮޑެތި މަގުތަކުގައިވެސް ޝުއޫރު ފާޅުކުރަމުން ހިނގާފަ އެވެ. ހިންމަފުށީ ރައްޔިތުން މިއަދު ވަނީ ސްޓެލްކޯގެ އިންޖީނުގެ ކައިރިއެއް އެއްވެ އެތަނުގައިވެސް ޝުއޫރު ފާޅުކޮށްފަ އެވެ. ހިންމަފުށީގެ ރައްޔިތުންގެ ހަމައެކަނި އެދުމަކީ ކަރަންޓްގެ އަގު މާލެއާއި އަތޮޅުތެރެ ތަފާތު ނުކޮށް ރައްޔިތުންގެ އަތްފޯރާ ފަށަށް ގެނެސްދިނުން ކަމަށް އެމީހުން ދަނީ ބުނަމުންނެވެ.