ހޮރްމޫޒް ކަނޑުއޮޅިން ދަތުރުކުރާ އުޅަނދުފަހަރު ބެލެހެއްޓުމާއި އެ ސަރަހައްދުން ދަތުރުކުރާ އުޅަނދުތަކުން ފީ ނެގުމާ ގުޅޭ ޕްލޭން ވަރަށް އަވަހަށް އިއުލާން ކުރާނެ ކަމަށް އީރާނުން އިއްޔެ ބުނެފި އެވެ.
އީރާނުގެ ހާރިޖީ ވަޒީރު އައްބާސް އަރަގްޗީ ވިދާޅުވި ގޮތުގައި، އެމެރިކާއާ އެކު ކުރެވޭ މަޝްވަރާތައް ނާކާމިޔާބުވެއްޖެ ނަމަ، އެމެރިކާއާ ދެކޮޅަށް ސީދާ އަސްކަރީ ކުރިމަތިލުމަކަށް ދިއުމަށް އީރާން އޮތީ ފުރިހަމައަށް ތައްޔާރަށެވެ. އަދި މިހާރު ހިނގަމުންދާ ހަމަނުޖެހުންތަކުގެ ސަބަބުން ތަކެތީގެ އަގުބޮޑުވެ، ހަކަތައިގެ ހަރަދުތައް އުފުލި، އެމެރިކާގެ އާންމު އާއިލާތަކަށް އޭގެ ނޭދެވޭ އަސަރު ކުރަމުންދާ ކަމަށް އޭނާ އިންޒާރު ދެއްވި އެވެ.
އެކްސްގައި ކުރެއްވި ޕޯސްޓެއްގައި އަރަގްޗީ ވިދާޅުވީ، އީރާނާ ދެކޮޅަށް ކުރާ ހަނގުރާމައިގެ ބޮޑު ހަރަދު އުފުލަން އެމެރިކާގެ ރައްޔިތުންނަށް މަޖުބޫރުވެފައިވާ ކަމަށެވެ. އަދި އެމެރިކާގެ ދަރަނި އިތުރުވެ، ލޯނުތަކުގެ އިންޓްރެސްޓް ރޭޓް މަތިވަމުންދާކަން އޭނާ ފާހަގަކުރެއްވި އެވެ.
"ތެލުގެ އަގުބޮޑުވުމާއި ހިއްސާގެ ބާޒާރަށް އަންނަ ބަދަލުތަކަށް ވުރެ ބޮޑަށް، އަސްލު ތަކުލީފުތަކާ ކުރިމަތިލާން ޖެހޭނީ އެމެރިކާގެ ދަރަންޏާއި މޯގޭޖް ރޭޓްތައް އުފުލެން ފެށުމުން،" އޭނާ ލިޔުއްވާފައިވެ އެވެ.
އީރާނުގެ މަޖިލީހުގެ ރައީސް މުހައްމަދު ބާގިރު ގާލިބާފް ވެސް ވަނީ މި ހަނގުރާމައިގެ ސަބަބުން އެމެރިކާގެ އިގްތިސާދަށް ކުރާ އަސަރުތަކަށް ފާޑުވިދާޅުވެފަ އެވެ. އަދި ސޯޝަލް މީޑިއާގައި ކުރެއްވި ޕޯސްޓެއްގައި އެމެރިކާގެ ޑިފެންސް ސެކްރެޓަރީ ޕީޓް ހެގްސެތަށް އޭނާ ވަނީ މަލާމާތް ކުރައްވާފަ އެވެ.
މި ވާހަކަތައް އައިސްފައިވަނީ މިދިޔަ 28 ފެބްރުއަރީގައި ހަމަނުޖެހުންތައް ފެށުނީއްސުރެ ބަންދުވެފައިވާ ހޮރްމޫޒް ކަނޑުއޮޅީގެ މައްސަލައިގައި މަސްލަހަތު ވަރަށް ބޮޑަށް ގޯސްވެފައިވާ ދަނޑިވަޅެއްގަ އެވެ. އީރާނުގެ އޮފިޝަލުން ބާރުއަޅަނީ، އެމެރިކާއާ އެކު ވެވޭ ކޮންމެ އެއްބަސްވުމެއްގައި ވެސް އެ ކަނޑުއޮޅީގެ މައްޗަށް އީރާނުގެ ސިޔާދަތީ ބާރު އޮތްކަން ބަލައިގަންނަން ޖެހޭނެ ކަމަށެވެ.
އީރާނުގެ މަޖިލީހުގެ ގައުމީ ސަލާމަތާ ބެހޭ ކޮމިޝަނުގެ މުގައްރިރު އިބްރާހީމް އަޒީޒީ ވިދާޅުވީ، ކަނޑުއޮޅިން ދަތުރުކުރާ އުޅަނދުފަހަރު ބެލެހެއްޓުމަށްޓަކައި ޕްރޮފެޝަނަލް ނިޒާމެއް އީރާނުން ތައްޔާރުކޮށްފައިވާ ކަމަށެވެ. އަދި މި ނިޒާމުގެ ފައިދާ ލިބޭނީ ހަމައެކަނި އީރާނަށް އެއްބާރުލުންދޭ އުޅަނދުފަހަރަށް ކަމަށާއި އެ ސަރަހައްދުން ދަތުރުކުރާ އުޅަނދުތަކުން ފީ ނަގާނެ ކަމަށް ވެސް އޭނާ ވިދާޅުވި އެވެ.
މި ހަމަނުޖެހުންތަކުގެ ސަބަބުން އީރާނުގެ އިގްތިސާދަށް ވެސް ވަނީ ވަރަށް ބޮޑަށް އަސަރުކޮށްފަ އެވެ. ރަސްމީ ހިސާބުތަކުން ދައްކާ ގޮތުގައި، މިދިޔަ މަހުގެ ފަހުކޮޅު ކާބޯތަކެތީގެ އަގު ވަނީ %115އަށް އުފުލިފަ އެވެ. އަދި އާންމު ބާޒާރުގައި އީރާނުގެ ރިއާލްގެ އަގު ވެއްޓި، އެމެރިކާ ޑޮލަރަކަށް 1.8 މިލިއަން ރިއާލް ޖެހޭ މިންވަރަށް ވަނީ ދަށްވެފަ އެވެ.
ކުރިމަތިލުންތައް މެދުކަނޑާލާފައިވާ މި ދަނޑިވަޅުގައި، އީރާނުގެ ދައުލަތުގެ މީޑިއާތަކުން ދަނީ ސަރުކާރަށް ތާއީދުކޮށް ފޮނުވާ ޕްރޮގްރާމްތައް އިތުރުކުރަމުންނެވެ. އެގޮތުން، ހަތިޔާރު އެޅި ހުށަހެޅުންތެރިންނާއި އަސްކަރީ ހަރަކާތްތައް ދައްކަމުންދާއިރު، އިސްލާމީ ޖުމްހޫރިއްޔާއަށް ތާއީދުކޮށް ކޮންމެ ރެއަކު ވެސް ދަނީ އެއްވުންތައް ބާއްވަމުންނެވެ.
މީގެ އިތުރުން، އީރާނުން ވަނީ މުޅި ގައުމުން އިންޓަނެޓްގެ ހިދުމަތް ކަނޑާލާފަ އެވެ. އަދި މި ހަމަނުޖެހުންތަކުގެ ތެރޭގައި ސަރުކާރާ ދެކޮޅުވެރިވާ ކަމަށް ތުހުމަތުކުރެވޭ ފަރާތްތަކަށް މަރުގެ އަދަބު ދިނުން ވެސް އީރާނުން ދަނީ ކުރިއަށް ގެންދަމުންނެވެ.