އިކޮނޮމިކް މިނިސްޓްރީގެ ކުރީގެ ޑެޕިއުޓީ މިނިސްޓަރު އަބްދުﷲ މުހައްމަދު (މަދަނީ އަބްދުﷲ ނުވަތަ ބޯފަން އަބްދުﷲ) މެލޭޝިއާ އަށް އިއްޔެ ވަޑައިގަތުމުން، އެއާޕޯޓުގައި ހިފަހައްޓައި، އޭނާ ޑިޕޯޓް ކޮށްލަން ނިންމައިފި އެވެ.
“ހަފްތާ” އަށް އެނގިފައިވާ ގޮތުގައި އޭނާއަށް މެލޭޝިއާއަށް އެތެރެވުމުގެ ހުއްދަ ދީފައެއް ނުވެ އެވެ. އަދި އެންމެ އަވަހަށް ހަމަޖެހޭ ފްލައިޓަކުން އަނބުރާ ރާއްޖެއަށް ފޮނުވާލާނެކަން އެނގިފައިވެ އެވެ.
އަބްދުﷲ ހިފެހެއްޓީ ސީދާ ކޮން ސަބަބަކާ ހުރެ ކަމެއް ނޭނގެ އެވެ. ނަމަވެސް ދިވެހި ބައެއް މީޑިއާތަކުގައި ރިޕޯޓް ކޮށްފައިވާ ގޮތުން އޭނާ ހިފަހައްޓާފައިވަނީ، ޓެރަރިޒަމްގެ ތުހުމަތަކާ ގުޅިގެންނެވެ.
އެކަން މެލޭޝިއާގައި ހުންނަ ދިވެހި ހައި ކޮމިޝަނުންނާއި ފޮރިން މިނިސްޓްރީންވެސް ކަށަވަރު ކޮށެއް ނުދެ އެވެ.