ކަރަންޓު ބިލުގައި ކުނީގެ ބިލު ހިމެނުމުގެ ފަހުގެ ތައްޔާރީތައް ވަމުންދާކަމަށް ސްޓެލްކޯއިން ބުނެފިއެވެ.
ސްޓެލްކޯއިން ބުނެފައިވަނީ މިދިޔަ މަހުގެ ކަރަންޓު ބިލްގައި ވެމްކޯގެ ކުނީގެ ހިދުމަތުގެ ބިލް ހިމަނައިގެން ކަސްޓަމަރުންނަށް ފޮނުވުމުގެ އެންމެ ފަހުގެ ތައްޔާރީތަށް މިހާރު ވަމުންދާ ކަމަށެވެ.
އެގޮތުން މިހާތަނަށް ލިބިފައިވާ މައުލޫމާތައް ބަލައި، ލިފްޓްތައް/ސާވިސް މީޓަރުތަކުގެ އިތުރުން، ކުނި ނުއުފެދޭ ތަންތަނުގެ ކަރަންޓު ބިލްތަކުގައި ކުނީގެ ހިދުމަތަށް ނަގާ އަގު ހިމަނާފައި ނުވާނެ ކަމަސް ސްޓެލްކޯއިން ބުނެފައިވެއެވެ.
އެހެންނަމަވެސް، އެއްވެސް ސަބަބަކާއިހުރެ މިފަދަ ތަނެއްގެ މައުލޫމާތު ހިއްސާނުކުރެވި ވާނަަމަ، އޭގެ މައުލޫމާތު ވެމްކޯ ވެބްސައިޓްގައިވާ ކަމާއިގުޅޭ ފޯރމް މެދުވެރިކޮށް ވެމްކޯއަށް ހިއްސާ ކުރުމުން، ވެމްކޯއިން އެކަމަށް އެޓެންޑްވެ، ތަން ދިރާސާކުރުމަށް ފަހު، އޮންނަ އުސޫލުގެ ތެރެއިން އެ ބިލް އިސްލާހު ކުރެވޭނެ ކަމަށް ވެސް ސްޓެލްކޯއިން މައުލޫމާތު ދީފައިވެއެވެ.
ކުނީގެ ހުދުމަތުގެ ބިލު ކަރަންޓު ބިލުގެ ތެރޭގައި ހިމެނުމާއެކު ސްޓެލްކޯއިން ކޮންމެ ބިލަކުން އިދާރީ ފީގެ ގޮތުގައި 2.50 ރުފިޔާ ނަގާނެއެވެ.