ޝަރީފް ވިދާޅުވީ އަލަށް ހަރުކުރާ މީޓަރުތަކުން ކޮންމެ ކަސްޓަމަރަކަށް، އެ މީހެއްގެ ގޭގައި ކަރަންޓު ބޭނުންކުރާ މިންވަރު ދުވަހުން ދުވަހަށް އެނގޭނެ ކަމަށެވެ.
ސްޓެލްކޯއިން ކަރަންޓުގެ ހިދުމަތް ދޭ ގޭގޭގައި، ބޭނުންކުރާ ކަރަންޓުގެ މިންވަރު ދެނެގަނެ ނޮޓިފައި ކުރާނެ ސްމާޓް މީޓަރު ބެހެއްޓުމަށް ތައްޔާރުވަމުން އަންނަ ކަމަށް އެ ކުންފުނީގެ މެނޭޖިން ޑިރެކްޓަރު އަހްމަދު ޝަރީފް ވިދާޅުވެއްޖެއެވެ. 
އެ ކުންފުނީގެ 26ވަނަ އަހަރީ ދުވަސް ފާހަގަކުރުމަށް ރޭ ކްރޮސްރޯޑްސްގައި ބޭއްވި ޖަލްސާގައި ވާހަކަދައްކަވަމުން ޝަރީފް ވިދާޅުވީ އެކުންފުންޏަށް މިހާރު އެންމެ ބޮޑަށް އަމާޒުވާ އެއް ތުހުމަތަކީ ބޭނުންކުރާ ވަރަށް ވުރެ އިތުރަށް ބިލް ކުރާ ކަމުގެ ތުހުމަތު ކަމަށެވެ. އަދި އެ ތުހުމަތަށް ހައްލެއް ހޯދުމަކީ މިހާރުގެ އެންމެ ބޮޑު އެއް އަމާޒު ކަމަށް އޭނާ ވިދާޅުވިއެވެ."އެ ކަމަށް ހައްލެއް ހޯދުމަށް އަޅުގަނޑުމެން އިރާދަ ކުރެއްވިއްޔާ މި އަހަރުގެ ތެރޭގައި.. އަޅުގަނޑުމެންގެ ގޭގޭގައި ސްމާޓް މީޓާ އިންސްޓޯލްކުރުމުގެ މަސައްކަތް އަޅުގަނޑުމެން ކުރިއަށް ގެންދާނަން." ޝަރީފް ވިދާޅުވިއެވެ.ޝަރީފް ވިދާޅުވީ އަލަށް ހަރުކުރާ މީޓަރުތަކުން ކޮންމެ ކަސްޓަމަރަކަށް، އެ މީހެއްގެ ގޭގައި ކަރަންޓު ބޭނުންކުރާ މިންވަރު ދުވަހުން ދުވަހަށް އެނގޭނެ ކަމަށެވެ. އަދި، ކަރަންޓު ބޭނުންކުރާ މިންވަރު ފާއިތުވި އަހަރުތަކާއި، މަސްމަހާ އަޅާ ކިޔޭނެ ސޮފްޓްވެއާއެއް ވެސް އެއާއެކު ތައްޔާރު ކުރާނެ ކަމަށް އޭނާ ވިދާޅުވިއެވެ.މީގެ އިތުރުން ގެއަކުން ކަރަންޓު ބޭނުންކުރާ އެވްރެޖް މިންވަރަށް ވުރެ މައްޗަށް ދާ މަސްމަހުގައި ކަސްޓަމަރުގެ ސަމާލުކަމަށް އެކަން ގެނައުމުގެ ގޮތުން މެސެޖެއް ދާނެ ގޮތްވެސް އެއާއެކު ހަމަޖެހޭނެ ކަމަށް ޝަރީފް ވިދާޅުވިއެވެ.ރޭގެ ޖަލްސާގައި ވާހަކަދައްކަވަމުން ޝަރީފް ވަނީ ސްޓެލްކޯއާ އެއް ފެންވަރަށް ޚިދުމަތްދޭ އިތުރު ކުންފުންޏެއް ރާއްޖޭގައި ނެތް ކަމަށް ވިދާޅުވެފައެވެ. އަދި، ކަރަންޓުގެ ޚިދުމަތުގެ އިތުރުން އެ ކުންފުނިން އަލަށް ފަށާފައިވާ މަސައްކަތްތަކުން ވެސް ބޮޑެތި ކުރިއެރުންތަކެއް ހޯދާފައިވާކަން އޭނާ ފާހަގަކުރެއްވިއެވެ."ފެނާ ނަރުދަމާގެ ހިދުމަތަކީ އަޅުގަނޑުމެންނަށް އާ ހިދުމަތެއް ނަމަވެސް، މިހާރު އަޅުގަނޑުމެން ފެނާއި ނަރުދަމާގެ ހިދުމަތްދޭ އެހެން ކުންފުނިތަކާ އެއްވަރުގެ ހުނަރުވެރި ގާބިލް މުވައްޒަފުންތަކެއް ސްޓެލްކޯގައި އުފެދިފައި އެބަތިބި،" ޝަރީފް ވިދާޅުވިއެވެ.ޝަރީފްވަނީ ސްޓެލްކޯގެ ކާމިޔާބީގައި އެންމެ ބޮޑު ރޯލެއް އަދާކުރާ ބަޔަކީ މުވައްޒަފުން ކަމަށް ވިދާޅުވެފައެވެ. އެގޮތުން ކުންފުނީގެ މުވައްޒަފުންގެ ލާބައަށް ކުރަމުން އަންނަ ބައެއް ކަންކަމަށް އޭނާ އަލިއަޅުއްވާލެއްވިއެވެ.ޝަރީފް ވިދާޅުވީ މުވައްޒަފުންގެ މަސައްކަތްތައް ގާތުން މޮނިޓާ ކުރުމަށްޓަކައި، އެކްސްކޯ ލޭޔަރެއް އުފައްދާ ކުންފުނީގެ އޮނިގަނޑަށް ބަދަލުތަކެއް ގެނެސްފައިވާކަމަށެވެ. އަދި ކުންފުނީގެ މުވައްޒަފުންގެ އެލަވަންސްތައް މުރާޖައާކޮށް، އަންނަ ހަފުތާގައި ބޯޑަށް ހުށަހެޅުމަށް ތައްޔާރުވެފައިވާ ކަމަށް ވެސް އޭނާ ވިދާޅުވިއެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ