ޗައިނާގެ ނިންގްބޯ އޮލިމްޕިކް ސްޕޯޓްސް ސެންޓަރުގައި ބޭއްވުމަށް ހަމަޖެހިފައިވާ "ބެޑްމިންޓަން އޭޝިއާ ޗެމްޕިއަންޝިޕް" ގައި ރާއްޖެ ތަމްސީލުކުރުމަށް ރިވައިވަލް ސްޕޯޓްސްގެ ތިން ކުޅުންތެރިއަކު ފުރައިފިއެވެ. މިމަހުގެ 7-12 އަށް ކުރިއަށްދާ މި މުބާރާތުގައި ވާދަކުރާ ރާއްޖޭގެ ރިވައިވަލް ޓީމުގައި ހިމެނެނީ މުޙައްމަދު އަޖުފާން ޒަޔާން ޒަކީ (ޒަޔާން)، އާމިނަތު ނަބީހާ (ނަބީ) އަދި ފާތިމަތު ނަބާހާ (ނަބާ) އެވެ. މި ތިން ކުޅުންތެރިންނަކީވެސް ގައުމީ ބެޑްމިންޓަން ސްކޮޑުގެ އިތުރުން ރިވައިވަލް ސްޕޯޓްސްގެ ހައިޕާފޯމަންސް ޓީމުގައި ހިމެނޭ މުހިންމު ކުޅުންތެރިންނެވެ. މުބާރާތުގައި ރާއްޖޭގެ ކުޅުންތެރިން ހަތަރު ކެޓަގަރީއެއްގައި ވާދަކުރާނެއެވެ. އެއީ ފިރިހެން ސިންގަލްސް، އަންހެން ސިންގަލްސް، އަންހެން ޑަބަލްސް އަދި މިކްސްޑް ޑަބަލްސްއެވެ. ޒަޔާން ވާދަކުރާނީ ފިރިހެން ސިންގަލްސް އަދި މިކްސްޑް ޑަބަލްސްގައެވެ. ސިންގަލްސްގައި އޭނާ ހިމެނެނީ ގްރޫޕް ސީ ގައެވެ. މި ގްރޫޕުގައި ދެން ހިމެނެނީ ސްރީލަންކާގެ ވިރޭން އަދި މަކާއީގެ ޕީ ޕުއީ އެވެ. ނަބާ ތިން އިވެންޓެއްގައި ވާދަކުރާނެއެވެ. އެއީ ސިންގަލްސް، މިކްސްޑް ޑަބަލްސް (ޒަޔާންއާއެކު) އަދި އަންހެން ޑަބަލްސްއެވެ. ސިންގަލްސް ގްރޫޕުގައި އޭނާ ބައްދަލުކުރާނީ ބަންގްލަދޭޝްގެ އުރުމީ އާއި ކިރިގިސްތާނުގެ ޒަސްމިންއާއެވެ. ނަބީހާ ބޮޑަށް އިސްކަންދޭނީ އޭނާގެ އެއްމަނޑު ކޮއްކޮ ނަބާހާއާއެކު ކުޅޭ އަންހެން ޑަބަލްސް އިވެންޓަށެވެ. މި ޕެއަރ ހިމެނޭ ގްރޫޕް ސީގައި އިންޑޮނޭޝިއާ އަދި ސްރީލަންކާގެ ވަރުގަދަ ޕެއަރތަކާ ބައްދަލުކުރަން ޖެހޭނެއެވެ. މި ޓީމާއެކު ރިވައިވަލް ސްޕޯޓްސްގެ ކޯޗު ނަޝްފާން މުޙައްމަދު ވަނީ އަންގާރަ ދުވަހު ޗައިނާއަށް ދަތުރުކޮށްފައެވެ. މިއީ އޭޝިއާގެ ފެންވަރުގައި ރިވައިވަލްގެ ކުޅުންތެރިންނަށް ލިބޭނެ މުހިންމު ތަޖުރިބާއެއްގެ ގޮތުގައި އެ ކްލަބުން ދެކެއެވެ. އޭޝިއާގެ އެންމެ މޮޅު ކުޅުންތެރިންނާ ދެކޮޅަށް ކުޅުމަކީ ރާއްޖޭގެ ބެޑްމިންޓަން ކުރިއެރުވުމަށް ލިބޭ ރަނގަޅު ފުރުސަތެކެވެ.