އެމެރިކާ އާއި އީރާނާ ދެމެދު ބަދަލުކުރަމުންދިޔަ ސިލްސިލާ ހަމަލާތައް ވަގުތީ ގޮތުން މެދުކަނޑާލުމާ ގުޅިގެން، މެދުއިރުމަތީގެ މަސްރަހަށް އައި ލުޔާއެކު ދުނިޔޭގެ ބާޒާރުގައި ތެލުގެ އަގު ވަރަށް ބޮޑަށް ދަށަށް ގޮސް، ހިއްސާގެ ބާޒާރުތަކުގެ އަގުތައް މައްޗަށް އުފުލެން ފަށައިފިއެވެ.
​ދެ ގައުމުގެ ދެމެދުގައި މަޝްވަރާތަކަށް ފުރުސަތު ދިނުމުގެ ގޮތުން ހަމަލާތައް ހުއްޓާލުމާއެކު، ބައިނަލްއަގުވާމީ ބެންޗްމާކް ކަމަށްވާ ބްރެންޓް ސާފުނުކުރާ ތެލުގެ އަގު ވަނީ 4.7 އިންސައްތަ ދަށަށް ގޮސް، ފީފާއެއްގެ އަގު 87.33 ޑޮލަރަށް ތިރިވެފައެވެ. އަދި އެމެރިކާގެ ވެސްޓް ޓެކްސަސް އިންޓަމީޑިއަޓް (ޑަބްލިއުޓީއައި) ތެލުގެ އަގު 5.5 އިންސައްތަ ދަށަށް ގޮސް، ފީފާއެއްގެ އަގު ވަނީ 84.42 ޑޮލަރަށް ތިރިވެފައެވެ.
މި ބަދަލު އައިސްފައިވަނީ އޯމާން ކަނޑުގެ ހޮރްމުޒް ކަނޑުއޮޅިން ދަތުރުކުރި އުޅަނދުފަހަރަށް ދިން ހަމަލާތަކާ ގުޅިގެން މަސްރަހު ގޯސްވެ، ފާއިތުވި ހަފުތާގައި ތެލުގެ އަގު ފީފާއެއް 100 ޑޮލަރަށްވުރެ މައްޗަށް ގޮސްފައި ވަނިކޮށެވެ. ނަމަވެސް ހަމަލާތައް މެދުކަނޑާލުމުން ގަލްފު ކަނޑުގެ ދަތުރުފަތުރާއި ތެލުގެ ސިނާއަތަށް މިހާރު ވަނީ ބޮޑު ލުޔެއް ލިބިފައެވެ.
އެމެރިކާއިން އދ. އަށް ކަނޑައަޅާފައި ހުންނަވާ މަންދޫބު ވިދާޅުވީ ހަމަލާތައް މެދުކަނޑާލީ ސުލްހައިގެ މަޝްވަރާތަކަށް ޖާގަ ދިނުމުގެ ގޮތުން ކަމަށެވެ. މީގެ ރައްދުގައި އީރާނުންވެސް ވަނީ އެމެރިކާއިން އިސްވެ ހަމަލާއެއް ނުދޭހާ ހިނދަކު އިތުރު ރައްދެއް ނުދޭނެ ކަމަށް ބުނެފައެވެ.
​މާލީ ދާއިރާގެ ތަޖުރިބާކާރުން ފާހަގަކުރާ ގޮތުގައި، މެދުއިރުމަތީގެ މަސްރަހަށް ވަގުތީ ލުޔެއް ލިބުނު ނަމަވެސް، މައްސަލައަށް ދާއިމީ ހައްލެއް ނުލިބޭތީ ކުރިއަށް އޮތް ތަނުގައި ތެލުގެ އަގު ފީފާއެއް 85 ޑޮލަރަށްވުރެ ތިރިއަށް ދިޔުމަކީ އެކަށީގެންވާ ކަމެއް ނޫނެވެ.
މަސްރަހަށް އައި ފިނިކަމާއެކު ވޯލްސްޓްރީޓާއި ޔޫރަޕުގެ ހިއްސާގެ ބާޒާރުތަކަށް ވަނީ ބޮޑު ކުރިއެރުމެއް ލިބިފައެވެ. އެގޮތުން އެމެރިކާގެ ނާސްޑެކް އިންޑެކްސް 1.6 އިންސައްތަ މައްޗަށް ގޮސްފައިވާއިރު، އެޕަލް، އެމަޒޯން އަދި އަލްފަބެޓް ފަދަ ބޮޑެތި ޓެކްނޮލޮޖީ ކުންފުނިތަކުގެ ހިއްސާގެ އަގުތައް ވަނީ އުފުލިފައެވެ.
މީގެ އިތުރުން ޖަރުމަނުގެ ފްރެންކްފަޓްގެ އިތުރުން ލަންޑަނާއި ޕެރިސްގެ ބާޒާރުތަކުންވެސް ވަނީ ފާހަގަކޮށްލެވޭ ކުރިއެރުމެއް ދައްކާފައެވެ.