ފެށޭ ހަފުތާގެ އާދިއްތައިން ފެށިގެން ތެލެސީމިއާ ސެންޓަރުން ޚިދުމަތްދޭ ވަގުތު އިތުރުކުރުމަށް ނިންމައިފިއެވެ. މޯލްޑިވިއަން ބްލަޑް ސާވިސަސް (އެމްބީއެސް)އިން ގެޒެޓުކޮށްފައިވާ އިއުލާނެއްގައިވަނީ އަންނަ އާދިއްތައިން ފެށިގެން އެ ތަނުން ފޯރުކޮށްދޭ ޚިދުމަތްދޭ ގަޑިތަކަށް ބަދަލު ގެނެސްފައިވާ ކަމަށެވެ. އެ ގޮތުން ކޮންމެ ހަފުތާއެއްގެ ހޮނިހިރުން ފެށިގެން ބުރާސްފައްޗަށް، ހެނދުނު ހެނދުނު 08:00 އިން ރޭގަނޑު 21:00 އަށް އެ ތަން ހުޅުވާފައި ހުންނާނެއެވެ. މި ވަގުތުތަކުގައި ޚިދުމަތްދޭ ގަޑިތަކަށް ވެސް ވަނީ ބަދަލު ގެނެސްފައެވެ. އެ ގޮތުން: އެޗްބީ ބެލުމަށް ސާމްޕަލް ނެގުން: ހޮނިހިރުން ފެށިގެން ބުރާސްފަތީގެ ނިޔަލަށް 08:00 – 20:00އަށް ކްރޮސްމެޗް ހެދުމަށް ސާމްޕަލް ނެގުން: ހޮނިހިރުން ފެށިގެން ބުދައިގެ ނިޔަލަށް 08:00 – 20:00އަށް ކްރޮސްމެޗް ހެދުމަށް ސާމްޕަލްނެގުން: ބުރާސްފަތި ދުވަހު 08:00 – 17:45އަށް ތެލަސީމިއާ ސްކްރީނިން: 08:30 – 13:00އަށް ތެލަސީމިއާ ކާޑް ދޫކުރުން: 08:00 – 14:00އަށް ޑޯނަރުން ގައިން ލޭ ނެގުން: 08:00 – 19:45އަށް ޑޯނަރުން ގައިން އެފެރެސިސްކޮށް ލޭ ނެގުން: 08:00 – 19:30 އަށް ހުރިހާ އުމުރުފުރައަކަށް ލޭ ގުޅައިދިނުން (1 ޔުނިޓް): 08:00 – 16:30އަށް ހުރިހާ އުމުރުފުރައަކަށް ލޭ ގުޅައިދިނުން (2 ޔުނިޓް): 08:00 – 14:30އަށް ޑޮކްޓަރުން ބެއްލެވުން: 08:00 – 20:30އަށް ތެލަސީމިއާ ސެންޓަރުގައި ބޭނުންކުރާ ފިލްޓަރުތައް ހަލާކުވެ، ލޭ ޕެކެޓުތަކުން އިސްރާފުވާ މިންވަރު އިތުރުވާތީ ތެލަސީމިއާ ޕޭޝަންޓުންނާއި، އެ މީހުންގެ އާއިލާތަކުން ވަނީ މިދިޔަ މަހު 23ގައި މުޒާހަރާކޮށްފައެވެ. އެ މުޒާހަރާއާ އެކު ޖެހިގެން އައި ދުވަހު ރައީސް ވަނީ އެ ސެންޓަރަށް ވަޑައިގެންފައެވެ. https://sun.mv/204013 އެ ދުވަހު ރައީސް ވަނީ އެ ތަނުގެ ހާލަތު އެނގިވަޑައިނުގަންނަވާ ކަމަށް ވިދާޅުވެފައެވެ. އެހެންވެ، އެ މަނިކުފާނަށް ފާޑުކިޔުން އަމާޒުވިއެވެ. އެއާއެކު ރައީސް ވިދާޅުވެފައިވަނީ މަހެއް ތެރޭ ތެލަސީމިއާ ސެންޓަރުގެ މަސައްކަތް ނިންމަން، ސިފައިންނާ ހަވާލުކޮށްފައިވާ ކަމަށެވެ. ތެލެސީމިއާ ފަރުވާ ހަރުދަނާ ކުރުމުގެ ގޮތުން ހުޅުމާލޭގައި ޖާގައިގެ ގޮތުން ވަރަށް ތަނަވަސް، އަދި ގިނަ ވަސީލަތްތަކާއެކު އައު ތެލެސީމިއާ ސެންޓަރެއް އެޅުމަށް ވެސް ސަރުކާރުން ވަނީ ނިންމައިފައެވެ.