ނެތް އެއްޗެއް ކިތަންމެ ވަރަކަށް ހޯދިޔަސް ނުފެންނާނެ: ގާސިމް

ފުލުހުން ފާސްކުރި ނަމަވެސް ނެތް އެއްޗެއް ނުފެންނާނެ ކަމަށް ޖުމްހޫރީ ޕާޓީގެ ލީޑަރު އަދި ވިލާ ގުރޫޕުގެ ޗެއާމަން ގާސިމް އިބްރާހިމް ވިދާޅުވެއްޖެ އެވެ.
ގާސިމްގެ މަސްލަހަތު އޮންނަ ވިލާ ބިލްޑިން ކޯޓު އަމުރެއްގެ ދަށުން ފުލުހުން ވަދެ ބަލާ ފާސްކޮށް ނިމުމުން ނޫސްވެރިންނާ ބައްދަލުކުރައްވާ ގާސިމް ވިދާޅުވީ ބަލައި ފާސްކޮށް ނިމި ފުލުހުން ބޭނުންވާ އެއްޗެހި އެތަނުން ފެނިފައި ނުވާ ކަމަށް ލިއުމެއް ދީފައިވާ ކަމަށެވެ.
ގާސިމް ވިދާޅުވީ ފުލުހުން ތުހުމަތު ކުރާ ފަދަ އެއްވެސް ކަމެއް އެމަނިކުފާނު ނުކުރައްވާ ކަމަށާއި އެހެންކަމުން ނެތް އެއްޗެއް ކިތަންމެ ފަހަރަކު ހޯދިޔަސް ނުފެންނާނެ ކަމަށެވެ.
ހަތަރު ގަޑި އިރަށްވުރެން ގިނަ އިރުވަންދެން ފުލުހުން ވިލާ ބިލްޑިން ބަލައި ފާސްކޮށްފައިވެ އެވެ.
ގާސިމް ވިދާޅުވީ ވިލާ ބިލްޑިން ބަލައި ފާސްކުރުމަށް ދިޔަ ފުލުހުން އަމަލު ކުރީ ވަރަށް ރަނގަޅަށް ކަމަށާއި އެއްވެސް ބުރަ ކަމެއް އެބޭފުޅުންނާ ދޭތެރޭގައި ނެތް ކަމަށެވެ.
މީގެ އިރުކޮޅެއް ކުރިން ވިލާ ބިލްޑިންގައި ގާސިމް ހުންނަވަނިކޮށް ފުލުހުން ވަނީ ކޯޓު އަމުރެއްގެ ދަށުން އެމަނިކުފާނުގެ ފޯނު ވެސް އަތުލާފަ އެވެ.
ވިލާ ބިލްޑިން ފާސްކުރުމުގެ ކުރިން ފުލުހުން ވަނީ ގާސިމްގެ ގެކޮޅު، މާފަންނުވިލާއަށް ވަދެ އެގެ ވެސް ބަލައި ފާސްކޮށްފަ އެވެ. އެގެއިން ވެސް ފުލުހުން ބޭނުންވާ އެއްވެސް އެއްޗެއް ފެނިފައެއް ނުވެ އެވެ.
ގާސިމް އިބްރާހީމްގެ އަރިހުގައި ހުންނަވައިގެން ނޫސްވެރިންނާ ބައްދަލުކުރައްވާ ހިސާން ވިދާޅުވީ ވިލާ ބިލްޑިން ފުލުހުން ބަލައި ފާސްކުރީ އެމަނިކުފާނުގެ މައްޗަށް މިހާރު ދައުވާ އުފުލާފައިވާ މައްސަލައިގެ ތުހުމަތުގައި ކަމަށެވެ. އަދި ވިލާ ބިލްޑިން ބަލައި ފާސްކޮށް މައްސަލައާއި ގުޅުންހުރި އެއްވެސް ހެއްކެއް ނެތް ކަމަށް ފުލުހުން ލިޔުމުން އަންގާފައިވާ ކަމަށްވެސް ހިސާން ވަނީ ވިދާޅުވެފަ އެވެ.
ގާަސިމް އިބްރާހީމްގެ މަސްލަހަތު ހުރި ތަންތަނަށް ފުލުހުން ވަދެ ބަލައި ފާސްކުރާތީ ގުޅިފައިވާ ޕާޓީ ތަކުގެ ބޭފުޅުން ގެންދަނީ އެކަން ކުށްވެރިކުރައްވަމުންނެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ