އިބްރާހިމް ނާސިރު އިންޓަނޭޝަނަލް އެއާޕޯޓުގެ ޓާމިނަލްތަކުގެ ފަޔާ އެލާމް ސިސްޓަމް ބެލެހެއްޓުމުގެ މަސައްކަތް ޑީއާރުޕީގެ ކުރީގެ ޑެޕިއުޓީ ލީޑަރު އުމަރު ނަސީރުގެ އެލާމްސް ޕްރައިވެޓް ލިމިޓެޑާ ހަވާލުކޮށްފައިވާ ކަމަށް އެއާޕޯޓް ހިންގާ ޖީއެމްއާރުން ބުނެފައިވީ ނަމަވެސް އެ ވާހަކަތައް އުމަރު މިއަދު ދޮގު ކުރައްވައިފި އެވެ. އެއާޕޯޓް ހިންގާ ކުންފުނީގެ އޮފިޝަލަކު ރޭ ހަވީރަށް ވިދާޅުވެފައި ވަނީ އެއާޕޯޓްގެ ޓާމިނަލްގެ ފަޔާ އެލާމް ސިސްޓަމް ބެލެހެއްޓުމުގެ މަސައްކަތް އުމަރު ނަސީރުގެ ކުންފުންޏާ ހަވާލުކުރީ ބީލަން އުސޫލުން ކާމިޔާބުކޮށްގެން ކަން އެނގިފައިވާ ކަމަށެވެ. އެހެން ނަމަވެސް އެލާމްސްގެ މެނޭޖިން ޑިރެކްޓަރު އުމަރު މިއަދު ވިދާޅުވީ އިންޑިޔާގެ ޖީއެމްއާރު ކުންފުނިން އެއާޕޯޓާ ހަވާލުވި ފަހުން އެތަނުގެ އެއްވެސް ޕްރޮޖެކްޓެއް އެލާމްސް އަށް އަދި އޭނާގެ ސަބްމެރިން އޮފީހަށް ވެސް ލިބިފައި ނެތް ކަމަށެވެ. "ޖީއެމްއާރުން އެއާޕޯޓާ ހަވާލުވި ފަހުން އަޅުގަނޑުމެން ކުރިމަތިލީ އެންމެ ބީލަމަކަށް. އެއީ އެތަނުގެ ފަޔާ ސިސްޓަމް މެއިންޓަނެންސް ކުރުމުގެ މަސައްކަތަށް. އެކަމަކު އެ ބީލަމެއް ވެސް އަޅުގަނޑުމެންނަކަށް ލިބިފައެއް ނެތް. މީގެ ދެ ތިން މަސް ކުރިން އެ ބީލަމަށް ކުރިމަތިލީ. އަޅުގަނޑުމެންނަކަށް ނޭނގޭ އެ ބީލަމަށް ވީ ގޮތެއް ވެސް. އެއީ ވަރަށް ކުޑަކުޑަ ޕްރޮޖެކްޓެއް. މަހަކު ލިބޭނީ 4،000ރ. 5،000ރ. ވަރު،" ބިޒްނަސް އެޑްމިނިސްޓްރޭޝަންގެ ދާއިރާ އިން މާސްޓާސް ހެއްދެވުމަށް މި ވަގުތު ސިންގަޕޫރުގައި ހުންނެވި އުމަރު ވިދާޅުވި އެވެ. "އެހެންވީމަ އެ ހަދަނީ ކަނޑައެޅިގެން ބޮޑު ދޮގެއް. އަޅުގަނޑު މިހާރު އެލާމްސްގައި ބުނެފިން ނޫސްބަޔާނެއް ވެސް ނެރެން. އަޅުގަނޑުމެންނަށް މިހާތަނަށް ވެސް އަންގާފައެއް ނެތް އެ ބުނާ ޕްރޮޖެކްޓެއް ލިބުނު ކަމަކަށް." ޖީއެމްއާރާ ގުޅުވައިގެން އިދިކޮޅު ލީޑަރު އަހުމަދު ތަސްމީން އަލީ އާއި ރައްޔިތުންގެ މަޖިލީހުގެ ރައީސް އަބްދުﷲ ޝާހިދުގެ މައްޗަށް ކޮރަޕްޝަންގެ އިނގިލި އެންމެ ބޮޑަށް ދިއްކުރައްވަމުން ގެންދަވާ އުމަރު ވިދާޅުވީ އެއާޕޯޓުގައި މިހާރު ބޭނުން ކުރަނީ އެލާމްސް އިން މީގެ އެތައް އަހަރެއް ކުރިން ހަރުކޮށްދިން އަލިފާން ނިއްވާ ސިސްޓަމެއް ކަމަށެވެ. އެ ސިސްޓަމް ހަރުކޮށްދީފައި ވަނީ 2002 ގައި ކަމަށް އޭނާ ވިދާޅުވި އެވެ.