ތިނަދޫއިން އަހުމަދު ސާއިލް އަލީ ގދ. ތިނަދޫއަށް ދިމާވެފައިވާ ކަރަންޓުގެ މައްސަލަ ހައްލުކޮށް އަލުން ކަރަންޓު ދިނުމަށް މާލެއިން ފޮނުވި ދެ ޖަނަރޭޓަރު މިރަށަށް ގެނެސްފިއެވެ. ތިނަދޫ ކައުންސިލުން ބުނީ ޖަނަރޭޓަރު ބޭލޭނީ މިއަދު އިރުއޮށްސޭއިރަށް ކަމަށެވެ. އަދި މިރޭގެ ވަގުތެއްގައި ޖަނަރޭޓަރު އިންޖީނުގެއަށް ގެންގޮސް، 12 ގަޑިއިރުގެ ތެރޭގައި ކަރަންޓު ދޭނެ ކަމަށް ތިނަދޫ ކައުންސިލުން ބުންޏެވެ. ތިނަދޫ އަށް މިއަދު ގެނެސްފައި ވަނީ އެއް މެގަވޯޓުގެ ދެ ޖަނަރޭޓަރެވެ. އެއީ ރަނގަޅު ކޮންޑިޝަނެއްގައި ހުރި ދެ އިންޖީނަށްވުމުން ދާއިމީ ގޮތެއްގައި ކަރަންޓުގެ ހިދުމަތް ދެވިގެންދާނެ ކަމަށް ފެނަކައިން ބުނެ އެވެ. ކުރިން މި ދެ ޖަނަރޭޓަރު އަންނާނެ ކަމަށް ލަފާކޮށްފައި ވަނީ މިއަދު މެންދުރުގެ ވަގުތެއްގައި އެވެ. ތިނަދޫ އިންޖީނުގޭގައި އަލިފާން ރޯވެ އެތަން ވަނީ ބޭނުން ނުކުރެވޭވަރަށް އަނދައިފަ އެވެ. އެއާ އެކު މިރަށުން މިވަނީ ކަރަންޓުގެ ހިދުމަތް ވަގުތީ ގޮތުން މެދުކެނޑިފަ އެވެ. ފެނަކަ ކޯޕަރޭޝަންގެ މެނޭޖިން ޑިރެކްޓަރު މުހައްމަދު ނިމާލު ވިދާޅުވީ ތިނަދޫގެ ރައްޔިތުންނަށް ކަރަންޓު ފޯރުކޮށްދޭ ފެނަކަ އިންޖީނުގޭގައި ހިނގާ ދިޔަ އަލިފާނުގެ ހާދިސާއިން އަރައިގަނެ ރަށުގެ ރައްޔިތުންނަށް ދާއިމީކޮށް ކަރަންޓު ފޯރުކޮށް ދެވޭނީ ދެ މަސް ފަހުން ކަމަށެވެ. އޭނާ ވިދާޅުވީ ތިނަދޫ ރައްޔިތުންނަށް އެ ހިދުމަތް ފޯރުކޮށްދީ ދާއިމީ ހައްލަކަށް ދާއިރު 35 މިލިއަން ރުފިޔާ ހަރަދުވެގެންދާނެ ކަމަށެވެ.