އެހެން ދެމަފިންނަށް ލިބިގެން އުޅޭ ތަނަވަސްކަމާއި އެހެންވެސް އެފަދަ ކަންކަމަށް ކަޅިއަޅައެވެ! ޙަސަދަވެސް ލައެވެ! އެއީ އެދެމަފިރިންނަކީ ކާމިޔާބު ދެމަފިރިންކަމަށް ބަލައިގެން ތިމާމެންވެސް އެކާމިޔާބީއަށް ދަހިވެތިވާތީއެވެ. އެކަމަކު ބުނަންހެއްޔެވެ؟ ފެނިގެން ތިއައުޅެނީ އަދި ކާމިޔާބީއެއް ނޫނެވެ. އެއީ ކުޑަކުޑަ ކާމިޔާބީއެކެވެ. އެންމެ ބޮޑު ކާމިޔާބީ އެހެންމީހުންގެ ލޮލަލަކަށް ނުފެންނާނެއެވެ. އެކަން އިޙްޞާޞްކުރެވޭނީ އެދެމަފިރިންނަށެވެ. ވީމާ މިކަމަށް ތަންކޮޅެއް ރަނގަޅަށް ބަލައިލަމާ ހިނގާށެވެ!
ކޮންމެ ދެމަފިރިއަކުވެސް ބޭނުންވާނީ ތިމާމެންނަކީ އެންމެ ކާމިޔާބު ދެމަފިރިންކަމުގައި ވުމަށެވެ. ސުވާލަކީ އެކަމަށް އެދޭއިރު އެންމެ ކާމިޔާބު ދެމަފިރިންނަކީ ކޮބައިކަން އެބަ އެނގޭހެއްޔެވެ؟ އެނގެނީ ކިހައިވަރަކަށް ހެއްޔެވެ؟
އެންމެ ކާމިޔާބު ދެމަފިރިންނަކީ އެއްވެސް ހާލެއްގައި އެންމެ މުއްސަނދި، އެންމެ ބޮޑު ގޭގައި ދިރިއުޅޭ، އެންމެ އަގުބޮޑު ކާރު ދުއްވާ ދެމަފިރިންނެއް ނޫނެވެ. އެންމެ ކާމިޔާބު ދެމަފިރިންނަކީ ކައިވެންޏަށްފަހު އޮޅިގެން ނަމަވެސް ވަރިކުރުމާ ވަރިވުމުގެ ވާހަކަ ވެސް ނުދައްކައި ހަޔާތް ނިންމައިލާ ދެމަފިރުންނެވެ.
ޙަޔާތުގައި އަބަދުވެސް މައްސަލަތައް ކުރިމަތިވާނެއެވެ. އެންމެ ކާމިޔާބު ދެމަފިރިންކަމުގައިވާން ބޭނުންނަމަ ޞުލްޙަވެރިކަމާއެކު ހައްލު ކުރަން މަސައްކަތްކުރާށެވެ! ދިރިއުޅުމާއި އާޚިރަތްވެސް ކާމިޔާބުކުރެވޭނީ އެއިރުންނެވެ! ވީމާ ޢާއިލާތެރޭގައިވެސް އަދި ޢާއިލާއިން ބޭރުގައިވެސް ކުރިމަތިވާ ކޮންމެ ކަމަކާއި ގުޅިގެން "ހަނގުރާމަ"އެއް ކުރަން ނުވިސްނާށެވެ! އެގޮތަށް ވިސްނާނަމަ ތިބާއަށް ﷲ ތައާލާ މިންވަރު ކުރައްވަވާފައިވާ ސިކުނޑީގެ ބޭނުމަކީ ކޮބައިހެއްޔެވެ؟ ބުއްދީގެ ބޭނުމަކީ ކޮބައި ހެއްޔެވެ؟
ބައެއް މީހުންނަށް ހީވަނީ އެންމެ މޮޅު މީހަކީ ކޮންމެ ކަމަކާއިވެސް ހަނގުރާމަކޮށްގެން ގަދަވާ މީހާ ކަމަށެވެ. ވީމާ އަނބިމީހާ އާއި ނަމަވެސް ފިރިމީހާ އާއި ނަމަވެސް ނުވަތަ އެހެން މީހަކާއި ނަމަވެސް އެއްވެސް މައްސަލައެއް މެދުވެރިވެއްޖެ ނަމަ ފުރަތަމަވެސް ނަގަނީ "ހަތިޔާރެވެ." ދައްކަނީ ބިރެވެ!
އަނބިމީހާނަމަ ވަރިކުރާނެ ކަމަށް އެބަ ބުނެއެވެ. ދަރިންނަށް ނަމަ އަޅައި ނުލާނެ ކަމަށް އެބަ ބުނެއެވެ. މައިންބަފައިންނަށް ނަމަ އެހީތެރިނުވާނެ ކަމަށް އެބަ ބުނެއެވެ. މިފަދަ ބަސްތައް ބުނަން ބިރުވެތިވާށެވެ! އެހެނީ އެމީހަކު އަދާކުރަން ޖެހޭ ވާޖިބެއް އަދާ ނުކުރާނެ ކަމަށް ބުނުމަކީވެސް ކުށެކެވެ. ކޮންމެ ކުށަކީވެސް ފާފައެކެވެ.
ބާރުގެ ބޭނުންކޮށްގެން ކޮންމެ ކަމެއް ޙައްލުކުރަން މަސައްކަތްކުރާނަމަ އެމީހަކު ދެކެ އެންމެން ފޫހިވާންފަށާނެއެވެ! އެފޫހިކަން ރުޅި އާއި ނަފްރަތަށް ބަދަލުވާނެއެވެ! އެއީ އިންސާނަކަށް ކުރިމަތިވާނެ އެންމެ ހިތްދަތި ހާލަތެވެ!
ތިމާ އަޅައިލަން ޖެހޭ މީހަކަށް އަޅައިނުލީމާ ވާނީ ކިހިނެއްޔެވެ؟ ލޯބި ދޭން ޖެހޭ މީހަކަށް ލޯބި ނުދިނީމާ ދެން ވާނީ ކިހިނެއް ހެއްޔެވެ؟ ހުރިހާ ކަމެއް ނިމިގެންދާނީ އެމީހަކު އެންމެ ހިތް ނުއެދޭގޮތަށް ނޫން ހެއްޔެވެ؟ ވީމާ މައްސަލަތަކުގެ ޙައްލަކީ ޞުލްޙައެވެ. ޞުލްޙަ ލިބޭނީ ވިސްނުންތެރިކަމާއިއެކު ކުރިމަތިލައި މަޝްވަރާކޮށްގެންނެވެ. ބުއްދި ދެއްވަވާފައި މިވަނީ އެކަން ކުރުމަށެވެ! ﷲ ތަޢާލާގެ ޙަޟްރަތުން ވާގި އެދިހުރެގެން ވިސްނުންތެރިކަމާއިއެކު މައްސަލަތައް ޙައްލުކުރަން މަސައްކަތްކުރާ ކޮންމެ މީހަކަށް ﷲ ތަޢާލާ އެކަމަށް މަގުފަހިކޮށްދެއްވަވާނެއެވެ!
ބުނަން ހެއްޔެވެ؟ ރުޅި އަންނަ ކޮންމެ ފަހަރަކު ވަރި ބަސް ބުނާ މީހަކު 100 ކައިވެނި ކުރިނަމަވެސް އެކުގައި ދިރިއުޅޭނެ އަންތބަކު ނުލިބޭނެއެވެ. އަދި އަބަދު ވަރިއަށް އެދޭ އަންތބަކަށްވެސް އެކުގައި އުޅޭނެ ފިރިއަކު ނުލިބޭނެއެވެ. އަބަދުވެސް ޖެހޭނީ ހަމަ ވަރިކުރާށެވެ! ވަރިވާށެވެ! ވީމާ ވަރި ބަހަކީ ހަތިޔާރުތައް ހަތިޔާރުގުދަނުގައި ރައްކައުތެރިކުރާ ފަދައިން ރައްކައުތެރިކޮށްފައި ބާއްވާ އެއްޗަކަށް ހަދާށެވެ! ސިފައިންގެ އަތުގައި ހަތިޔާރު ހުރި ނަމަވެސް ދެން އެހެން ގޮތެއް ނެތުމުން ނޫނީ ހަތިޔާރުގެ ބޭނުމެއް ނުކުރޭ ނޫން ހެއްޔެވެ؟
--އިސްލާމީ ތިލަފަތުގެ ދަރުސަކުން