ރައްޔިތުންގެ މަޖިލީހުގެ މަތިވެރި ދާއިރާގެ މެމްބަރު ހަސަން ޒަރީރު އަވަހާރަކޮށްލަން ހަމަލާދިން ކަމުގެ ތުހުމަތުގައި ހައްޔަރުކުރި އިބްރާހިމް އަބްދުﷲ (ގައްބަރޭ) ކޯޓުގެ އަމުރަކަށް ދޫކޮށްލުމަށް ފަހު އަނެއްކާވެސް ހައްޔަރުކޮށްފި އެވެ.
ވީ ކިހިނެއް؟ - މެންބަރު ޒަރީރަށް ހަމަލާދިން މައްސަލާގައި އިބްރާހިމް އަބްދުﷲ އާއި އިތުރު ދެ މީހަކު ދޫކޮށްލަން ކްރިމިނަލް ކޯޓުން ކުރި އަމުރު މިދިޔަ އާދީއްތަ ދުވަހު ހައި ކޯޓުން ވަނީ ބާތިލްކޮށްފަ އެވެ.
ތަފްސީލް - 'ދައުރު' އަށް އެނގިފައިވާ ގޮތުގައި އެއާ އެކު އިބްރާހިމް އަބްދުﷲ އަނެއްކާވެސް ހައްޔަރުކޮށް މިހާރު ހުރީ ފުލުހުންގެ ބަންދުގަ އެވެ. އެކަމުގެ ތަފްސީލެއް އަދި ނުލިބެ އެވެ. 
ފަސް މީހުންގެ ގްރޫޕަކުން ޒަރީރަށް ހަމަލާދިނީ މިދިޔަ މެއި މަހުގެ 1 ވަނަ ދުވަހުގެ ފަތިހު ރައްޓެހިންތަކަކާ އެކު މާލޭގެ ކެފޭއެއްގެ ތެރޭގައި އިންނަވަނިކޮށެވެ. އެ ހަމަލާގައި މަރުތޭލަކުން ޒަރީރުގެ ބޮލުގައި ޖަހާފައިވާ ކަމަށް ފުލުހުން ބުނެފައިވާ އިރު، އޭނާގެ މައްޗަށް ފުލުހުން ވަނީ މީހަކު މަރާލަން އުޅުމުގެ ތުހުމަތުކޮށްފަ އެވެ.
މީގެ ކުރިން ވެސް މާރާމާރީ އާއި މަރުގެ އަދި ފޭރުމުގެ ގިނަ މައްސަލަތަކެއްގައި ހައްޔަރުކުރި އިބްރާހިމް އަބްދުﷲ އާއި އިތުރު ދެ މީހެއްގެ މައްޗަށް މި މައްސަލާގައި ފުލުހުން އިތުރު ތުހުމަތެއް ވެސް ކުރެ އެވެ. އެއީ:
ގްރޫޕް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ ތުހުމަތު
އިބްރާހިމް އަބްދުﷲ އާއި މި މައްސަލައިގައި ތުހުމަތުކުރެވޭ އަނެއް ދެ މީހުން ދޫކޮށްލުމުގެ އަމުރު ބާތިލްކޮށް ހައި ކޯޓުން އާދީއްތަ ދުވަހު ނެރުނު އަމުރުގައި ބުނީ، ތަހުގީގު މަރުހަލާ އާއި ޝަރީއަތުގެ މަރުހަލާ ނިމެންދެން އެ މީހުން އަލުން ބަންދުކުރަން ޕްރޮސެކިއުޓާ ޖެނެރަލްގެ (ޕީޖީ) އޮފީހުން ނުވަތަ ފުލުހުންގެ ފަރާތުން ދަށު ކޯޓަށް ހަތް ދުވަހުގެ ތެރޭގައި ހުށަހަޅައިފި ނަމަ އެ އަމުރު ނެރެދޭން ޖެހޭނެ ކަމަށެވެ.
ހައި ކޯޓުގެ އަމުރުގައި ބުނީ، ނުރައްކާތެރި ކުށްވެރިން ކޯޓުތަކުން އަމިއްލައަށް އިސްނަގައިގެން ދޫކޮށްލުމަކީ ކޮށްގެންވާނެ ކަމެއް ނޫން ކަމަށެވެ. ތަހުގީގުގެ މަރުހަލާ ދިގުލައިދިއުމުގެ ސަބަބުން، އެފަދަ މީހެއްގެ ފަރާތުން، ތަހުގީގު ނިމެންދެން ދޫކޮށްދިނުމަށް އެދި ހުށަހެޅިޔަސް، އެފަދަ މީހަކު ދޫކޮށްލެވޭނީ ގާނޫނުގެ ތަރަހައިގެ ތެރެއިން ބަލަންޖެހޭ ބެލުންތައް ބެލުމަށް ފަހު ކަމަށް ހައި ކޯޓުގެ ނިންމުމުގައިވެ އެވެ.
ފަސްމަންޒަރު - އިބްރާހިމް އަބްދުﷲ ވަނީ 2007ގައި ތޫނު އެއްޗަކުން ހަމަލާދީ އަލީ އިޝާރު، ހ. ކުބްރާ، މަރާލުމުގައި ބައިވެރިވި ކަމަށް ފުލުހުންގެ ތަހުގީގުގައި އެއްބަސްވެފަ އެވެ. އޭރު 18 އަހަރު ނުވާ އިބްރާހިމްގެ މައްޗަށް އެ މައްސަލައިގައި ދައުވާކުރިޔަސް އެކަށީގެންވާ ވަރަށް ހެކި ނެތް ކަމަށް ބުނެ ކޯޓުން އޭނާ ދޫކޮށްލީ އެވެ.