ހެލްތު މިނިސްޓަރު އަބްދުﷲ ނާޒިމް ވިދާޅުވި ގޮތަށް، ދިވެހިރާއްޖޭގައި ގުޑުގުޑާ މަނާކޮށް، ހަކުރަށް ދޭ ސަބްސިޑީ ކަނޑާލަން ނުއުޅޭ ކަމަށް ރައީސް މުހައްމަދު މުއިއްޒު ރޭ ވިދާޅުވެއްޖެ އެވެ.
ވެރިކަން ހިންގާ ޕީއެންސީ އިން އާޓިފިޝަލް ބީޗުގައި ރޭ ބޭއްވި ޖަލްސާއެއްގައި ވާހަކަ ދައްކަވަމުން މުއިއްޒު ވިދާޅުވީ ގުޑުގުޑާ މަނާކޮށް، ހަކުރުން ސަބްސިޑީ ކަނޑާލުމުގެ ބަދަލުގައި މި ސަރުކާރުގެ ސިޔާސަތަކީ ރައްޔިތުން އެކަންކަމަށް ހޭލުންތެރި ކުރުވުން ކަމަށެވެ.
"އަޅުގަނޑުމެންގެ ސިޔާސަތެއް ނޫން، އަޅުގަނޑު މިކަން ސާފުކޮށްލަން މިދަންނަވަނީ، އިތުރު ކަންކަން ބޭން ކުރުމަކީ. އެހެނެއް ނޫން ހޭލުންތެރިކުރުވުން، އަޅުގަނޑުމެން ހޭލުންތެރިކަން އިތުރުކުރާނަން. އަޅުގަނޑުމެން ނޫޅެން ޝީޝާ ބުއިން ބޭން ކުރާކަށެއް. ހަކުރުގެ ސަބްސިޑީ ކަނޑާލާކަށް. މިކަހަލަ ކަންކަން ކުރާކަށެއް ނޫޅެން،" މުއިއްޒު ވިދާޅުވި އެވެ.
ނަމަވެސް މިދިޔަ ބުރާސްފަތި ދުވަހު ނޫސްވެރިންނާ ބައްދަލުކުރައްވާ ނާޒިމް ވިދާޅުވީ ޝީޝާ މަނާކޮށް ހަކުރުން ސަބްސިޑީ ކަނޑާލުމަށްފަހު ޓެކްސް ނެގުމަށް ސަރުކާރުން މަޝްވަރާ ކުރަމުންދާ ކަމަށެވެ.
"[ގުޑުގުޑާ މަނާކޮށް، ހަކުރުން ސަބްސިޑީ ކަނޑާލުމުގެ] މަޝްވަރާތައް ހަމަ އަޅުގަނޑުމެން އެކި ލެވެލްގައި ކުރެވޭ އެނގޭތޯ. ކިހާ ހިސާބެއްގައިތޯ މުޅިން ތަންފީޒުވެގެންދާނީ އެއީ ކަންނޭނގޭ އުފެދޭނެ ސުވާލަކީ. އެންމެ މުހިންމު ދަނޑިވަޅުގައި، އެންމެ މުހިންމު ހާލަތުގައި، މުހިންމު ވަގުތުގައި އެކަން ކުރުން ވަރަށް މުހިންމު،" ނާޒިމް ކުރިން ވިދާޅުވި އެވެ.
މިނިސްޓަރު ވިދާޅުވީ ކުރިއަށް އޮތް މުސްތަގުބަލުގައި ގުޑުގުޑާ މަނާކޮށް، ހަކުރަށް ދޭ ސަބްސިޑީ ކަނޑާލައި، ހަކުރުން ޓެކްސް ނެގުމަކީ ކުރެވޭނެ ކަމެއް ކަމަށާއި އެންމެ މުހިންމު ދަނޑިވަޅުގައި އެކަން ކުރުން ވަރަށް މުހިންމު ކަމަށެވެ.
ރޭގެ ޖަލްސާގައި ވާހަކަ ދައްކަވަމުން ރައީސް މުއިއްޒު އިތުރަށް ވިދާޅުވީ، ގުޑުގުޑާ ބުއިމަކީ ދިވެހިންގެ އާދަކާދައާ ގުޅިފައިވާ ކަމެއް ކަމަށެވެ. އަދި ވިދާޅުވީ، މަނާ ކުރިޔަސް އެފަދަ ކަންކަމާ ރައްޔިތުން ދުރު ނުކުރެވޭނެ ކަމަށެވެ.
މީގެއިތުރުން މުއިއްޒު ވިދާޅުވީ ހަކުރު ސަބްސިޑީ ކަނޑާލުމުގެ ބަދަލުގައި ހަކުރު އެކުލެވޭ ތަކެތި ބޭނުން ކުރުމުން ލިބޭ ގެއްލުންތަކަށް އާންމުން ހޭލުންތެރިކުރުވަން ޖެހޭ ކަމަށެވެ.
މިގޮތުން ހަށިގަނޑަށް ފައިދާވާ މޭވާ އާއި ތަރުކާރީގެ ބާވަތްތައް އަގުހެޔޮކޮށް ގައުމުން ލިބޭނެ ގޮތް ހަދައި، އެފަދަ ތަކެތި ރާއްޖޭގައި އުފެއްދޭނެ މަގުފަހިކޮށްދިނުމަކީ ސަރުކާރުގެ އަމާޒު ކަމަށް މުއިއްޒު ވިދާޅުވި އެވެ.
ސަރުކާރުން 2024 ވަނަ އަހަރު ރާއްޖެއިން ވޭޕް މަނާކޮށް، ދުންފަތުން ޓެކްސް ބޮޑުކުރުމުގެ އިތުރުން ދުންފަތުގެ ޖެނެރޭޝަނަލް ބޭންއެއް ވެސް ގެނެސްފައިވެ އެވެ.