އިންޑިއާގެ ޓާޓާ ކުންފުނިން އިމާރާތް ކުރި 264 ފްލެޓްގެ ތެރެއިން ފައިސާ ނުދެއްކި ހުރި 105 ފްލެޓް ވިއްކާލުމަށް ހައުސިންގ ޑިވެލޮޕްމަންޓުން ކޯރޕަރޭޝަން (އެޗްޑީސީ) އިން އިއުލާން ކޮށްފިއެވެ.
ހައުސިން މިނިސްޓްރީން ކުރި އިއުލާނުގައި ވިއްކަން އިއުލާނުކޮށްފައިވަނީ އަރަބިއްޔާ ސްކޫލް ހުރި ބިމުގައި އިމާރާތްކޮށްފައިވާ 30 ފްލެޓަކާއި، ގާކޮށީގައި އިމާރާތްކޮށްފައިވާ 75 ފްލެޓް އެކެވެ.
އެޗްޑީސީން ކުރި އިއުލާނުގައި ބުނީ، ފްލެޓަށް އެދޭ ފޯމް ދޫކުރުން ހަމަ ޖެހިފައިވަނީ އަންނަ މަހުގެ ހަތަރަކުން ފެށިގެން ކަމަށާއި، ފޯމު ދޫކުރުމަށް ހަމަޖެހިފައިވަނީ ފުރަތަމަ އަންނަ 105 ފަރާތަކަށް ކަމަށެވެ.
ވިއްކާލަން އިއުލާން ކުރި 105 ފްލެޓަށް ބޭންކް މެދުވެރިކޮށް ފައިސާ ދައްކާ ފަރާތްތަކުގެ ފައިނޭންޝަލް ސްކްރީނިން ހެދުމަށް ބޭންކު ތަކަށް ހުށަހެޅޭނެ އެންމެ ފަހު ތާރީހަކީ އަންނަ މަހުގެ 12 ވަނަ ދުވަހެވެ.
އެގޮތުން މި 105 ފްލެޓަށް ކުރިމަތި ލުމުގެ އެންމެ ފަހު ތާރީހަކީ އަންނަ ޖެނުއަރީ މަހުގެ ހަތް ވަނަ ދުވަހެވެ.
އަދި މި ފްލެޓްތަކަށް އެދި ހުށައަޅާ ފަރާތްތަކުގެ ޝަރުތުތަކުގެ ތެރޭގައި، 21 އަހަރުވެފައިވާ ދިވެއްސަކަށް ވުމާއި، ކައިވެނިކޮށްގެން އުޅޭ މީހެއްކަމުގައިވުމާއި ހުޅުމާލެ، މާލެ އަދި ވިލިމާލޭގައި އަމިއްލަ ބޯހިޔާވަހިކަމެއް ނެތް ނުވަތަ ބިމެއް ގަނެފައި ނެތުމާއި ފޯރމްހުށައަޅާ ފަރާތުގެ އަނބިމީހާ ނުވަތަ ފިރިމީހާގެ ނަމުގައި ހުޅުމާލެ، މާލެ އަދި ވިލިމާލޭގައި އަމިއްލަ ބޯހިޔާވަހިކަމެއް ނެތް ނުވަތަ ބިމެއް ގަނެފައި ނެތުމާއި 21 އަހަރު ނުފުރޭ މަދުވެގެން 1 ކުއްޖަކު ހުރުން ހިމެނެއެވެ.
މި 105 ފްލެޓް ގަތުމަށް ފޯރމްދޫކުރުމަށް ނިންމާފައިވަނީ އެއް ލައްކަ ރުފިޔާގެ ބޭންކް ގްރެންޓީއެއް ގެންނަ ފަރާތްތަކަށެވެ. ބޭންކް ގެރެންޓީގެ މުއްދަތަކީ ފޯމް ހުށައަޅާ ތާރީޚުން ފެށިގެން 120 ދުވަހެވެ.
މީގެއިން ކޮންމެ ފްލެޓެއް ވިއްކަން ހަމަޖެހިފައި ވަނީ ދެމިލިއަން ރުފިޔާ އަށް ކަމަށް ހައުސިންގ މިނިސްޓްރީން ކުރި އިއުލާނުގައި ވެއެވެ.