ދިވެހިރާއްޖޭގައި ތިބި އިންޑިއާ ސިފައިންގެ އަދަދު އިތުރުކުރަން ނިންމައިފި

ދިވެހިރާއްޖޭގައި ޤާއިމްވެގެން ތިބޭ އިންޑިއާ ސިފައިންގެ އަދަދު އިތުރުކުރަން ނިންމައިފިއެވެ.
މިގޮތަށް ނިންމާފައިވަނީ އިންޑިއާގެ ޑިފެންސް މިނިސްޓަރު ރަޖުނާތު ސިންގު ރާއްޖެއަށް އައިސް، ރައީސް އިބްރާހީމާއި، ޑިފެންސް މިނިސްޓަރު މާރިޔާ ދީދީ އަދި ފޮރިން މިނިސްޓަރު އަބްދުﷲ ޝާހިދާއި އެކު ބޭއްވި މަޝްވަރާޓަކަށްފަހުގައެވެ. "ދިޔަރެސް" އަށް މައުލޫމާތު ދެއްވި ސިފައިންގެ އިސްވެރިއަކު ވިދާޅުވި ގޮތުގައި ރާއްޖޭގައި ތިބި އިންޑިއާ ސިފައިން އިތުރުކުރަން ބޭނުންވާކަމަށް ހުށަހެޅީ އިންޑިއާއިންނެވެ. އަދި ސަރުކާރުން ވަނީ އެކަމަށް މިހާރު އެއްބަސްވެފައި ކަމަށް އެބޭފުޅާ ވިދާޅުވިއެވެ.
"މިއީ ކުއްލިއަކަށް ކުރިކަމެއް ނޫން. ޑިފެންސް މިނިސްޓަރު އައުމުގެ ކުރިންވެސް ލިޔެކިޔުމުން އޮތީ މިވާހަކަ ދެކެވި މިކަމަށް އެއްބަސްވެފައި. މިހާރުދެން އެ ރަސްމީވީ" އެ ބޭފުޅާ ވިދާޅުވިއެވެ.
މިވަގުތު ރާއްޖޭގެ 5 ސަރަހައްދެއްގައި އިންޑިއާ ސިފައިން ޤާއިމްވެގެން ތިބެއެވެ. އެއީ ހދ.ހަނިމާދޫ، ލ.ކައްދޫ، އައްޑޫސިޓީ، އުތުރު ތިލަފަޅު އަދި މާލެއެވެ. މުޅި އެކު 2000 އާއި ގާތްކުރާ އަދަދަކަށް އިންޑިއާ ސިފައިން ރާއްޖޭގައި ތިބި އިރު މިހާރު ސަރުކާރުން ވަނީ ރާއްޖޭގެ އެކި ސަރަހައްދުތަކުގައި ޕެޓްރޯލު ކުރަން އިންޑިއާ ކަނޑުގެ ސިފައިންނަށް ހުއްދަދޭން ނިންމާފައެވެ.
އަދި އުތުރުތިލަފަޅުގައި ހަދަމުންދާ އަސްކަރީ މަރުކަޒު ނިމުމުން އެތަނުގައިވެސް ގިނަ އަދަދަކަށް އިންޑިއާ ސިފައިން ޤާއިމްވެގެން ތިބޭނެއެވެ. އުތުރުތިލަފަޅު އެއްބަސްވުމުގައި ވާގޮތުން އެއްބަސްވުމުގެ މުއްދަތު އެއްކޮށް ހަމަވާނީ 2051 ވަނަ އަހަރުގައެވެ. އަދި އެ މުއްދަތުގައި އެތަނުގެ ކަންކަން ބަލަހައްޓަނީ އިންޑިއާގެ ސިފައިންގެ އިސްވެރިން ހިމެނޭ ކޮމިޓީއަކުންނެވެ.
ރާއްޖޭގައި ތިބި އިންޑިއާ ސިފައިންގެ އަދަދު އިތުރުކުރަން ސަރުކާރުން ނިންމާފައިވާއިރު މިހާރު ޤާއިމްވެގެން ތިބި ސިފައިންގެ އަދަދަކީވެސް ސިއްރެއްކަމަށް ސަރުކާރުން ވަނީ ބުނެފައެވެ. އަދި އެ އަދަދު ސިއްރުކުރި މައްސަލަ މިހާރު ދަނީ ހައިކޯޓުގައި ހިނގަމުންނެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ