ރައީސް ޑރ. މުހައްމަދު މުއިއްޒު ޗައިނާއަށް ކުރައްވަމުންގެންދަވާ ދަތުރުފުޅުގެ ތެރެއިން، އިންޑިއާގެ ބޮޑުވަޒީރު ނަރެންދުރަ މޯދީއާ މިއަދު ބައްދަލުކުރައްވައިފިއެވެ. މިދިޔަ ހުކުރު ދުވަހު ރައީސް ޗައިނާއަށް ވަޑައިގަތީ، ޗައިނާގެ ރައީސް ޝީ ޖިންޕިން ގެ ދަޢުވަތަކަށް، ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ސަމިޓުގައި ބައިވެރިވެވަޑައިގަތުމަށެވެ. ރައީސް މިއަދު ޝީއާ ބައްދަލުކުރައްވާފައިވާއިރު، އެ މަނިކުފާނު މޯދީއާ ބައްދަލުކުރައްވާ ފޮޓޯއެއް މޯދީ ވަނީ ސޯޝަލް މީޑިއާގައި ހިއްސާކުރައްވައިފައެވެ. https://x.com/narendramodi/status/1962123585692283113 މޯދީވަނީ، އެސްސީއޯ ސަމިޓުގެ ހަވާސާގައި ދެ ބޭފުޅުން ބައްދަލުކުރެއްވި ކަމަށާއި ތަރައްގީގެ މަސައްކަތުގައި އެއް ގައުމުން އަނެއް ގައުމަށް ދޭ އެއްބާރުލުމުގެ ސަބަބުން އިންޑިއާއާއި ރާއްޖޭގެ ރައްޔިތުންނަށް ވެސް ވަރަށް ބޮޑަށް ފައިދާ ކުރާ ކަމަށް ވިދާޅުވެފައެވެ. އެ ބައްދަލުވުމާ ގުޅޭ ތަފުސީލެއް ރައީސް އޮފީހުން މިހާތަނަށް ހާމައެއްނުކުރެއެވެ. ޝީއާ ބައްދަލުކުރެއްވުމަށް ފަހު ރައީސް މުއިއްޒުވަނީ، ދެ ގައުމުގެ މެދުގައި އޮތް ވަރުގަދަ ގުޅުން އުފެދިފައި ވަނީ، އެތައް ޒަމާނެއްވީ ގާތް އެކުވެރިކަމާއި، އެއް ގައުމެއް އަނެއް ގައުމަށް ހެޔޮއެދުމުގެ މައްޗަށް ކަމަށް ވިދާޅުވެފައެވެ. އަދި ރައީސް ވަނީ އެ ގޮތުގައި، ދެ ގައުމުގެ ގުޅުން މުސްތަގުބަލުގައި ވެސް ކުރިއަށް ގެންދަވާނެކަމުގެ ޔަގީންކަން އާ ކުރެއްވި ކަމަށް ވިދާޅުވެފައެވެ. މި ސަރުކާރުން ވެރިކަމަށް އައީ ރާއްޖޭގައި ތިބި އިންޑިއާ ސިފައިން ގައުމަށް ފޮނުވާލުމަށް ގޮވާލައި ކުރިއަށްގެންދިޔަ ދިގު ކެމްޕޭނަކަށް ފަހުގައެވެ. އެހެންވެ، އިންޑިއާއާ ދެކޮޅު އަދި ޗައިނާއާ ގާތް ސިޔާސަތެއް ގެންގުޅޭ ސަރުކާރެއްގެ ގޮތުގައި ބޭރުގެ މީޑިއާތަކުގައި ފުރަތަމަ ވެސް މި ސަރުކާރު ސިފަކޮށްފައިވެއެވެ. ނަމަވެސް ރައީސް ވަނީ އެ މަނިކުފާނު އިސްކުރައްވާނީ ގައުމުގެ މަސްލަހަތު ކަމަށާއި މިއީ 'ޕްރޯ މޯލްޑިވްސް' ސަރުކާރެއް ކަމަށް ވިދާޅުވެފައެވެ. އާންމު ގޮތެއްގައި ރާއްޖޭގެ ރައީސުން ފުރަތަމަ ރަސްމީ ދަތުރުފުޅު ކުރައްވަނީ އިންޑިއާއަށް ކަމަށްވީ ނަމަވެސް، އިންޑިއާއަށް ވުރެ ކުރިން ރައީސް މުއިއްޒު ވަޑައިގަތީ ޗައިނާއަށެވެ. އެ ދަތުރުފުޅަށް ފަހު ގައުމަށް ވަޑައިގެން ރާއްޖެއަކީ ވަކި ގައުމެއްގެ 'ބެކްޔާޑެއް' ނޫން ކަމަށާއި 'ބުލީ ނުކުރެވޭނެ' ކަމަށް ވިދާޅުވިއެވެ. https://sun.mv/210664 އިންޑިއާއަށް އިޝާރާތް ކުރައްވައި އެ މަނިކުފާނު ދެއްކެވި ވާހަކަފުޅާއި ނައިިބު ވަޒީރުންތަކެއް އެ ގައުމާއި މޯދީއަށް ކުޑައިމީސް ކުރި މައްސަލައިގައި ދެ ގައުމުގެ ގުޅުން ހީނަރުވިއެވެ. އަދި އިންޑިއާގައި ރާއްޖޭގެ ފަތުރުވެރިކަން ބޮއިކޮޓް ކުރުމަށް ގޮވާލައި، ނުފޫޒުގަދަ ތަރީން ހިމެނޭ ބޮޑު ކެމްޕޭނެއް ކުރިއަށްގެންދިޔައެވެ. އޭގެ ފަހުން މި ސަރުކާރުން ވަނީ އިންޑިއާއާ ގުޅުން ބަދަހިކުރުމަށާއި އެ ގައުމުގައި ރާއްޖެ އިތުރަށް އިޝްތިހާރު ކުރުމަށް ވެސް ގިނަ މަސައްކަތްތައް ކޮށްފައެވެ. އެގޮތުން މޯދީ ތިން ވަނަ ދައުރަކަށް ހުވާ ކުރެއްވުމުގެ ރަސްމިއްޔާތަށާއި އިތުރު ދަތުރުފުޅެއްގައި ވެސް ރައީސް އިންޑިއާއަށް ވަޑައިގެންނެވިއިރު، ރާއްޖޭގެ މިނިވަން ދުވަހާ ގުޅުވައި މޯދީ ރާއްޖެ ޒިޔާރަތްކުރައްވައިފައިވެއެވެ.