މަޝްހޫރު ތަރިންގެ ނަމުގައި ހުއްދަނެތި ޗެޓްބޮޓް ހެދުމުން މެޓާއަށް ފާޑުކިޔުން

ފޭސްބުކްގެ މައި ކުންފުނި، މެޓާއިން، ޓޭލާ ސްވިފްޓް، ސެލީނާ ގޯމެޒް އަދި ސްކާލެޓް ޖޯހަންސަން ފަދަ މަޝްހޫރު ތަރިންގެ ނަމާއި ސިފަ، އެމީހުންގެ ހުއްދަ ނެތި ބޭނުންކޮށްގެން އޭއައި ޗެޓްބޮޓްތަކެއް އުފައްދާފައިވާ ކަމަށް ބައިނަލްއަގުވާމީ ނޫސް އެޖެންސީ ރޮއިޓާސްއިން ހާމަކޮށްފިއެވެ. މި ޗެޓްބޮޓްތަކަކީ ޖިންސީ ވާހަކަތަކަށް ހިތްވަރުދީ، ބައެއް ފަހަރު ކުޑަކުދިންނާ ގުޅުން ހުރި ނުރައްކާތެރި ކޮންޓެންޓް އުފައްދާފައިވާ ތަކެތި ކަމަށް ވެސް އެ ރިޕޯޓުގައި ފާހަގަކޮށްފައިވެއެވެ. ރޮއިޓާސްއިން ހާމަކުރި ގޮތުގައި، މި ޗެޓްބޮޓްތައް އުފައްދާފައިވަނީ މެޓާގެ އަމިއްލަ އޭއައި އާލާތް ބޭނުންކޮށްގެންނެވެ. އަދި ހައިރާންވާންޖެހޭ ކަމަކީ، މެޓާގެ މުވައްޒަފަކު އަމިއްލައަށް ޓޭލާ ސްވިފްޓްގެ ނަމުގައި ދެ "ޕެރޮޑީ" ޗެޓްބޮޓް ހިމެނޭހެން މަދުވެގެން ތިން ޗެޓްބޮޓް އުފައްދާފައިވުމެވެ. މިކަމުގެ ނުރައްކާތެރިކަން އިތުރަށް ހާމަވަނީ، އުމުރުން 16 އަހަރުގެ ފިލްމީ ތަރި ވޯކާ ސްކޯބެލްގެ ނަމުގައި އުފެއްދި ޗެޓްބޮޓަކުން، އޭނާ ބަރަހަނާކޮށް ދައްކުވައިދޭ ފޮޓޯއެއް އުފައްދާފައިވުމުންނެވެ. ރޮއިޓާސްއިން ބުނާ ގޮތުގައި މިފަދަ ޗެޓްބޮޓްތަކުން ގިނަ ފަހަރު ޖިންސީ ގުޅުން ހިންގުމަށް ހިތްވަރުދެއެވެ. މި ތުހުމަތުތަކާ ގުޅިގެން މެޓާގެ ތަރުޖަމާނު އެންޑީ ސްޓޯން ވިދާޅުވީ، ކުންފުނީގެ ސިޔާސަތުތަކުގެ ދަށުން މަޝްހޫރު މީހުންގެ ނުރައްކާތެރި ފޮޓޯ ނުވަތަ ކުޑަކުދިންނާއި އެނޫންވެސް ތަރިންގެ އެއްވެސް ފޮޓޯއެއް އުފެއްދުމުގެ ހުއްދަ ނުދޭ ކަމަށެވެ. ނަމަވެސް އޭނާ ވަނީ، މިފަދަ ކަންކަން ހިނގާފައިވަނީ ކުންފުނީގެ ގަވާއިދުތައް ތަންފީޒުކުރުމުގައި ހުރި "ދަތިތަކެއްގެ" ސަބަބުން ކަމަށް ގަބޫލުކުރައްވާ ކަމަށް ވިދާޅުވެފައެވެ. ސްޓޯން އިތުރަށް ވިދާޅުވީ، ޗެޓްބޮޓްތަކަކީ "ޕެރޮޑީ" (މަޖަލަކަށްވާ ގޮތަށް ހަދާފައިވާ އެއްޗެއް) ކަމަށް ލޭބަލްކޮށްފައިވާނަމަ އެއީ ހުއްދަކަމެއް ކަމަށެވެ. އެހެންނަމަވެސް، ރޮއިޓާސްއިން ދިރާސާކުރި ގިނަ ޗެޓްބޮޓްތަކުގައި އެފަދަ ލޭބަލެއް ޖަހާފައިނުވާ ކަމަށް ރޮއިޓާސްގެ ރިޕޯޓްގައި ބުނެފައިވެއެވެ. މި މައްސަލަ ފެންމަތިވުމުގެ ކުރިން މެޓާއިން ވަނީ ޓޭލާ ސްވިފްޓްގެ ޗެޓްބޮޓްތައް ހިމެނޭގޮތަށް 12 ޗެޓްބޮޓެއް ޑިލީޓްކޮށްފައެވެ. ގާނޫނީ މާހިރުން ވިދާޅުވާ ގޮތުގައި، މިއީ މަޝްހޫރު ތަރީންނަށް ލިބިގެންވާ "ޕަބްލިސިޓީ ރައިޓްސް" އާ ޚިލާފުވާ ކަމަކަށް ވެދާނެއެވެ. އެމެރިކާގެ އެކްޓަރުންގެ ޔޫނިއަން، ސެގް-އެފްޓްރާ އިންވެސް ވަނީ މިކަމާ މެދު ކަންބޮޑުވުން ފާޅުކޮށްފައެވެ. އެ ޔޫނިއަންގެ އެގްޒެކެޓިވް ޑިރެކްޓަރު ވިދާޅުވީ، މިފަދަ ޗެޓްބޮޓްތަކުގެ ސަބަބުން، އަމިއްލަ ދިރިއުޅުމުގައިވެސް ނުރައްކާތަކާ ކުރިމަތިލާންޖެހިފައިވާ ތަރިންނަށް އިތުރު ނުރައްކާތައް ކުރިމަތިވެދާނެ ކަމަށެވެ. މިއީ މެޓާގެ އޭއައި އާ ގުޅޭގޮތުން ފާޑުކިޔުން އަމާޒުވި ފުރަތަމަ ފަހަރެއް ނޫނެވެ. މީގެކުރިންވެސް، މެޓާގެ އޭއައި ގަވާއިދުތަކުގައި "ކުޑަކުދިންނާ އެކު ޖިންސީ ވާހަކަ ދެއްކުން ހުއްދަ" ކަމަށް ބަޔާންކޮށްފައިވާ ކަމަށް ރިޕޯޓްކުރުމުން، އެމެރިކާގެ ސެނެޓުން ވަނީ އެކަން ތަހުގީގުކުރަން ފަށާފައެވެ. މި ހުރިހާ މައްސަލަތަކަކުން ރަމްޒުކޮށްދެނީ އާޓިފިޝަލް އިންޓެލިޖެންސް (އޭއައި) ޓެކްނޮލޮޖީއާ ގުޅިގެން ކުރިމަތިވަމުން އަންނަ ގާނޫނީ އަދި އަޚްލާގީ ގޮންޖެހުންތަކުގެ ފުޅާ މިނެވެ. އަދި މިފަދަ ޓެކްނޮލޮޖީތައް ބޭނުންކުރުމުގައި ހަރުދަނާ ގަވާއިދުތަކާއި އުސޫލުތަކެއް ކަނޑައެޅުމުގެ މުހިންމުކަމެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ