ގައުމީ ޓީޓީ ޗެމްޕިއަންކަން ރަފާ އާއި ޝައްފާނަށް
ޓޭބަލްޓެނިސް އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން ބޭއްވި 63 ވަނަ ގައުމީ ޓޭބަލް ޓެނިސް މުބާރާތުގެ ސިންގަލްސް ޗެމްޕިއަންކަން އައިޝަތު ރަފާ ނާޒިމް އާއި މުޙައްމަދު ޝައްފާން ހޯދައިފިއެވެ. ހެންވޭރު މުނިއުފާ ޓީޓީ ހޯލުގައި ކުރިއަށްދިޔަ މުބާރާތުން ހޯދި މި ކާމިޔާބީއާއެކު މިއީ މި މުބާރާތުގެ ޗެމްޕިއަންކަން މި ދެ ކުޅުންތެރިން ހޯދި ތިންވަނަ ފަހަރެވެ. ފައިނަލް މެޗު ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ޝަރަފުވެރިކޮށްދެއްވިއިރު، ރަފާ ޗެމްޕިއަންކަން ހޯދީ މިދިޔަ ފަސް އަހަރުގެ ގައުމީ ތަށި ހޯދި ފާތިމަތު ދީމާ އަލީ ބަލިކޮށްގެންނެވެ. ފައިނަލް މެޗުން ރަފާ ކުރިހޯދީ، ސީދާ ހަތަރު ގޭމުންނެވެ. އެންމެ ފަހުން ކުޅުނު ގައުމީ ފަސް ފައިނަލުގައި ވެސް ދީމާ އަތުން ބަލިވި ރަފާ މި މެޗުގެ ސެޓުތައް ގެންދިޔައީ، 11-09، 11-09، އާއި 11-06، އަދި 13-11 އިންނެވެ. ރަފާ ވަނީ 2017 އާއި 2018 ގެ ޗެމްޕިއަންކަން މީގެކުރިން ހޯދާފައެވެ. ފިރިހެން ސިންގަލްސް ފައިނަލުގައި ޝައްފާން ވަނީ، ގައުމީ ޗެމްޕިއަންކަން 11 ފަަހަރު ހޯދާފައިވާ މޫސާ މުންސިފް އަހުމަދުގެ މައްޗަށް 4-1 ސެޓުން ކުރި ހޯދާފައެވެ. މި މެޗުގެ ފުރަތަމަ ސެޓު 13-11 އިން މުންސިފް ގެންގޮސްފައިވަނިކޮށް، ޝައްފާން ވަނީ ދެން ޖެހިގެންއައި ސެޓުތައް 11-07، 13-11، އާއި 11-08، އަދި 18-16 އިން ކާމިޔާބުކޮށްފައެވެ. ފައިނަލު މެޗުތަކަށްފަހު ބޭއްވި ރަސްމިއްޔާތުގައި އައިޓީޓީއެފް ބްލޫބެޖް ހާސިލުކުރި ރާއްޖޭގެ އަމްޕަޔަރު މުހައްމަދު ޔާމީނަށް ވަނީ ހަނދާނީ ފިލައެއް ދީފައެވެ. އޭނާއަކީ ދެކުނު އޭޝިއާގައި އިންޑިޔާ ފިޔަވާ މި ބެޖް ހާސިލުކުރި ފުރަތަމަ އަމްޕަޔަރެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ
އެންމެފަހުން އަޕްޑޭޓްކުރީ