ފެނަކަ ކޯޕަރޭޝަން ލިމިޓެޑްގެ މެނޭޖިންގ ޑިރެކްޓަރުގެ މަޤާމަށް މޭޖަރ ރިޓަޔަރޑް މުޙައްމަދު ނަޖާޙް އައްޔަންކުރައްވައިފިއެވެ. މި މަޢުލޫމާތު ހާމަކުރައްވާފައިވަނީ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިންނެވެ.ޕީސީބީން މަޢުލޫމާތު ދެއްވާފައިވާ ގޮތުގައި، ކުރިން މި މަޤާމުގައި ހުންނެވި ގދ. މަޑަވެލި، ނެޕްޗޫން މުޢާޒު މުޙައްމަދު ރަޝީދު އިސްތިއުފާ ދެއްވުމަށް ހުށަހަޅުއްވާފައިވާތީ، އޭނާގެ އިސްތިއުފާ ޤަބޫލުކޮށް މިއަދުން ފެށިގެން އެ މަޤާމުން ވަކިކޮށްފައިވެއެވެ. އަދި ހަމަ މިއަދު، ހ. ޔެލޯރޯޒް 2، މޭޖަރ ރިޓަޔަރޑް މުޙައްމަދު ނަޖާޙް ވަނީ ފެނަކަ ކޯޕަރޭޝަން ލިމިޓެޑްގެ ޑިރެކްޓަރުންގެ ބޯޑުގެ މެންބަރުކަމަށާއި މެނޭޖިންގ ޑިރެކްޓަރުގެ މަޤާމަށް އައްޔަންކުރައްވާފައެވެ.އައު މެނޭޖިންގ ޑިރެކްޓަރު، މޭޖަރ ރިޓަޔަރޑް މުޙައްމަދު ނަޖާޙަކީ ޤައުމީ ދިފާޢީ ބާރުގައި 21 އަހަރުވަންދެން ޚިދުމަތްކުރައްވާފައިވާ ބޭފުޅެކެވެ. އަދި އޭނާއަކީ ލޮޖިސްޓިކްސް މެނޭޖުމަންޓުގެ ދާއިރާއިން މަތީ ތަޢުލީމް ހާސިލްކުރައްވާފައިވާ ބޭފުޅެކެވެ.ކުރީގެ މެނޭޖިންގ ޑިރެކްޓަރު މުޢާޒު މުޙައްމަދު ރަޝީދު، 28 ނޮވެންބަރު 2023 ގައި މި މަޤާމަށް އައްޔަންކުރެވުނެވެ. އޭނާގެ އިސްތިއުފާގެ ސިޓީގައި ބަޔާންކޮށްފައިވާ ގޮތުގައި، މަޤާމާ ހަވާލުވި ދުވަހުން ފެށިގެން އިޚްލާޞްތެރިކަމާއެކު މަސައްކަތްކުރެއްވިއެވެ. އަދި މިދިޔަ އެއް އަހަރު ދުވަހުގެ ތެރޭގައި ތަފާތު ގޮންޖެހުންތަކާއެކުވެސް ފެނަކައިން ރައްޔިތުންނަށް ފޯރުކޮށްދޭ ޚިދުމަތްތައް މެދުނުކެނޑި ފޯރުކޮށްދިނުމުގައި އެދެވޭ ނަތީޖާއެއް ހާސިލްކުރެވިފައިވާ ކަމަށް ވިދާޅުވިއެވެ.ނަމަވެސް، މުޢާޒު ފާހަގަކުރެއްވި ގޮތުގައި ފެނަކައިގެ މާލީ ހާލަތު ދަށްވުމުގެ ސަބަބުން ކުންފުނި ހިންގުމުގައި ގޮންޖެހުންތަކާ ކުރިމަތިވިއެވެ.