ޕަބްލިކް ސަރވިސް މީޑިއާ (ޕީއެސްއެމް) ގެ މެނޭޖިންގ ޑިރެކްޓަރުގެ މަޤާމަށް އިބްރާހިމް ނަސްރީން އަދި ޗެއަރމަނަކަށް އާމިނަތު ނަމްޒާ އައްޔަނުކޮށްފިއެވެ. މި ބަދަލު ގެނެވިފައިވަނީ ކުރީގެ މެނޭޖިންގ ޑިރެކްޓަރު މުޙައްމަދު ސަޢީދު މި މަހުގެ 17 ވަނަ ދުވަހު އިސްތިއުފާ ދެއްވުމާ ގުޅިގެންނެވެ.އިބްރާހިމް ނަސްރީނަކީ މި މަޤާމަށް އައްޔަނުކުރެވުނުއިރު ޕީއެސްއެމްގެ ސޭލްސް އެންޑް މާކެޓިންގ ޑިރެކްޓަރުގެ މަޤާމުގައި ހުންނެވި ބޭފުޅެކެވެ. ނަސްރީނަކީ ބިޒްނަސް މެނޭޖްމަންޓް، އިނޮވޭޝަން އަދި މާކެޓިންގ ދާއިރާއިން ފުޅާ ތަޖުރިބާއެއް ލިބިވަޑައިގެންފައިވާ ބޭފުޅެކެވެ.ޕީއެސްއެމްގައި 9 އަހަރަށްވުރެ ގިނަ ދުވަހު ޚިދުމަތްކުރައްވާފައިވާ ނަސްރީން ވަނީ މި މުއްދަތުގެ ތެރޭގައި ކުންފުނީގެ އެކި އިސް މަޤާމުތައް ފުރުއްވާފައެވެ. މީގެ އިތުރުން، ނަސްރީނަކީ ދިވެހިރާއްޖޭގެ ޤައުމީ ޔުނިވަރސިޓީ، މެޕްސް ކޮލެޖް އަދި ސައިރިކްސް ކޮލެޖުގައި ލެކްޗަރަރެއްގެ ގޮތުގައިވެސް މަސައްކަތްކުރައްވާފައިވާ ބޭފުޅެކެވެ.ތަޢުލީމީ ގޮތުން ބަލާއިރު، ނަސްރީނަކީ މެލޭޝިއާގެ ޓެއިލަރސް ޔުނިވަރސިޓީގެ ސްކޫލް އޮފް ބިޒްނަސްއިން ވިޔަފާރީގެ ދާއިރާއިން ޑޮކްޓަރ އޮފް ފިލޯސަފީއަށް ކިޔަވާ ވިދާޅުވަމުންގެންދަވާ ބޭފުޅެކެވެ. އޭނާ ވަނީ މެލޭޝިއާގެ ލިމްކޮކްވިންގ ޔުނިވަރސިޓީން ބެޗްލަރ އޮފް ޕްރޮފެޝަނަލް ޑިޒައިން ފަސްޓް ކްލާސް އޮނަރސް ހާސިލުކުރައްވާފައެވެ. އަދި ތައިލެންޑުގެ ކޮލެޖް އޮފް އިނޮވޭޝަން އެޓް ތަމަސަޓް ޔުނިވަރސިޓީން ސަރވިސް އިނޮވޭޝަންގެ ދާއިރާއިން މާސްޓަރސް ޑިގްރީއެއްވެސް ހާސިލުކުރައްވާފައިވެއެވެ.