"ކްލީން އެނާޖީ ފޯ ކްލައިމެޓް މިޓިގޭޝަން" ގެ ދެވަނަ ފިޔަވަހީގެ ދަށުން 250 ކިލޯވޮޓްގެ ޕީވީ ސިސްޓަމް ތިނަދޫގެ ގްރިޑަށް ގުޅާލައިފި އެވެ.
މިނިސްޓްރީ އޮފް އެންވަޔަރަންމަންޓް އެންޑް އެނާޖީގެ ފަރާތުން ގދ. ތިނަދޫގައި ކުރިއަށް ގެންދިޔަ "ކްލީން އެނާޖީ ފޯ ކްލައިމެޓް މިޓިގޭޝަން" މަޝްރޫއުގެ ފުރަތަމަ ފިޔަވަހީގެ ދަށުން ތިނަދޫގެ ތިން އިމާރާތެއްގައި އިރުގެ އަލިން ކަރަންޓް އުފައްދާ 308 ކިލޯވޮޓްގެ ސޯލަ ޕީވީ ސިސްޓަމް ގާއިމުކޮށް މިމަޝްރޫއުގެ ދެވަނަ ފިޔަވަހީގެ ދަށުން ވަނީ އިތުރު 250 ކިލޯވޮޓްގެ ސޯލަ ޕީވީ ސިސްޓަމް ހަރުކޮށް ތިނަދޫގެ ކަރަންޓު ވިއުގައަށް ގުޅާލާފަ އެވެ.
މިނިސްޓްރީން ބުނީ ތިނަދޫގައި މިހާރު މުޅި ޖުމްލަ 558 ކިލޯވޮޓްގެ ސޯލަ ޕީވީ ސިސްޓަމް ހަރުކުރެވިފައިވާ ކަމަށާއި އެ އަދަދަކީ އެރަށަށް ދުވާލުގަޑީގައި ބޭނުންވާ ކަރަންޓުގެ އެންމެ މަތީ އަދަދުގެ 50 އިންސައްތަ އާއި އެއްވަރުގެ އަދަދެެއް ކަމަށެވެ. މިމަޝްރޫއުގެ ދެވަނަ ފިޔަވަހީގެ ދަށުން ގާއިމްކުރެވުނު 250 ކިލޯވޮޓްގެ ސިސްޓަމް ތިނަދޫގެ ގްރިޑަށް ގުޅާލުމުގެ ގޮތުން މިއަދު ތިނަދޫގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން އެންވަޔަރަންމަންޓް މިނިސްޓަރު ތޯރިގް އިބްރާހީމް ވިދާޅުވީ ތިނަދޫގައި ގާއިމުކުރެވުނު މިސިސްޓަމަކީ މިހާތަނަށް އަތޮޅު ތެރޭގައި ގާއިމުކުރެވުނު އެންމެ ބޮޑު ސިސްޓަމް ކަމަށެވެ.
"ރާއްޖެ ތަރައްގީކޮށް ކުރިއެރުވުމުގައި ހަކަތައިގެ ދައުރު އިންތިހާއަށް އިތުރު ވެފައިވާއިރު މިކަމުގައި ބަރޯސާވާންޖެހިފައިވަނީ ރާއްޖެއިން ބޭރުން އެތެރެކުރާ ތެލަށް. 2013 ވަނަ އަހަރު އެކަނިވެސް ތެލުގެ ބާވަތްތައް އެތެރެކުރުމަށް ގާތްގަނޑަކަށް ހަތް ބިލިއަން ރުފިޔާ ވަނީ ޚަރަދު ކުރެވިފައި،" މިނިސްޓަރު ވިދާޅުވި އެވެ.
އެންވަޔަރަންމަންޓް މިނިސްޓްރީން ބުނީ ތިނަދޫގައި ކުރިއަށް ގެންދެވުނު މިމަޝްރޫއުގެ ދަށުން ތިނަދޫގެ ތަފާތު 20 ތަނެއްގެ އެނާޖީ އޮޑިޓް ހަދައި މި އޮޑިޓްގެ ހޯދުންތަކުގެ އަލީގައި ކަރަންޓް މަދުން ބޭނުންކުރާ އާލާތްތައް އެ ތަންތަނުގައި ހަރުކުރެވިފައިވާ ކަމަށެވެ. އެ ތަންތަނަކީ ޑރ. އަބްދުލްސަމަދު މެމޯރިއަލް ހޮސްޕިޓަލް، ތިނަދޫ ސްކޫލް، އަބޫބަކުރު ސްކޫލް، ރަށު ކައުންސިލުގެ އިދާރާ، އަތޮޅު ތައުލީމީ މަރުކަޒު އަދި އިންޖީނުގެ އެވެ. މިގޮތުން ހަރުކުރެވުނު ތަކެތީގެ ތެރޭގައި ކަރަންޓް ޚަރަދު ކުޑަ އިންވާޓަރ އެއާ ކޮންޑިޝަންއާއި، ލެޑް ހޮޅިބުރި އަދި ލެެޑް ބޮކި ހިމެނެއެ ވެ.
މީގެ އިތުރުން 5،000 އެލްއީޑީ ބޮކި ވަނީ ރަށުގެ ގެތަކަށް ހަދިޔާކުރެވިފާ ކަމަށާއި، ތިނަދޫގައި ކުރިއަށް ގެންދެވުނު މިމަޝްރޫއުގެ ސަބަބުން ޖައްވަށް ބޭރުވާ ވިހަ ގޭހުގެ މިންވަރު ދަށްވެ، ކަރަންޓް އުފެއްދުމަށް ތެޔޮ އަންދަންޖެހޭ މިންވަރު ކުޑަވެގެންދާނެ ކަމަށް މިނިސްޓްރީން ބުނެ އެވެ.