ރާއްޖޭގެ ސިވިލް ކޯޓުގެ ގާޒީ އަބްދުﷲ ޖަމީލް އިސްތިއުފާ ދެއްވައިފި އެވެ. ގާޒީ އަބްދުﷲ ޖަމީލް އިސްތިއުފާ ދެއްވިއިރު ހުންނެވީ ސިވިލް ކޯޓުގެ ޑިސްޕިއުޓް ރިސޮލިއުޝަން ސެކްޝަނުގައިއެވެ. އެ މަގާމުން ގާޒީ އަބްދުﷲ ޖަމީލް އިސްތިއުފާ ދެއްވި ސަބަބެއް ހާމަކުރަށްވާފައެއް ނުވެއެވެ.
ގާޒީ އަބްދުﷲ ޖަމީލް އިސްތިއުފާ ދެއްވާފައި ވާއިރު މިހާރު ޖުޑިޝަލް އެޑްމިނިސްޓްރޭޝަން ޑިޕާޓްމަންޓް (ޑީޖޭއޭ) އިން ވަނީ ރާއްޖޭގެ ޝަރުޢީ ނިޒާމް އިސްލާހުކުރުމަށް ބޭރުގެ ފަރާތްތަކާއި ގުޅިގެން ސެމިނާއެއް ބާއްވާފައެވެ.
މަޝްހޫރު ވަކީލުންނާއި ޝަރުއީ ދާއިރާގެ ބޭފުޅުން ދަނީ ޝަރުއީ ނިޒާމް ރަނގަޅުކޮށް އިސްލާހުކުރަން ޖެހޭކަމަށް ގޮވާލަމުންނެވެ. މީގެ އިތުރުން ރައީސުލް ޖުމްހޫރިއްޔާ އިބްރާޙީމް މުހައްމަދު ސޯލިހުވެސް ވަނީ ފަނޑިޔާރުގެ ޖަވާބުދާރީކޮށް ފަނޑިޔާރުގެ އިސްލާހް ކުރަން ޖެހޭ ކަމަށް ވިދާޅުވެފައެވެ.