މި ސީޒަންގައި ނިއު ރޭޑިއަންޓާ ގުޅުނު މަޝްހޫރު ކުޅުންތެރިންގެ ތެރޭގައި ތަޖުރިބާކާރު ކުޅުންތެރިއާ އަލީ އުމަރު (އައްޔަ) ވެސް ހިމެނެ އެވެ. އެކަމަކު އައްޔައާ މެދު އޭރު ނިއުގެ ގިނަ ސަޕޯޓަރުން މާބޮޑު އުންމީދެއް ކުރާނެކަމާ މެދު ޝައްކެވެ. ފާއިތުވި ދެ ތިން އަހަރު ވީބީ އައްޑޫ އެފްސީގައި އައްޔަގެ ފަރާތުން ފެނުނީ އޭނާ ކުރިން ދެއްކި މޮޅު ކުޅުމެއް ނޫނެވެ. ގިނަ ބަޔަކު ގަބޫލްކުރީ އައްޔައަކީ ނިއު އިން ގެނައި އޮއްސިފައިވާ ތަރިއެއެއް ކަމަށެވެ. އެކަމަކު މި ސީޒަންގައި މިހާތަނަށް އައްޔަގެ ފަރާތުން ފެންނަނީ ތަފާތު މަންޒަރެކެވެ. ނިއު އިން މިހާތަނަށް ކުޅުނު ހުރިހާ މެޗެއް ކަހަލަ ގޮތަކަށް އެ ޓީމުގެ ފުރަތަމަ 11ގައި ކުޅެފައިވާ އައްޔަގެ ފަރާތުން ފެންނަމުންދަނީ މޮޅު ކުޅުމެކެވެ. ރާއްޖޭގައި މި ވަގުތު ހުރި އެންމެ ތަޖުރިބާކާރު އެއް ކުޅުންތެރިއާ ކަމަށްވާ އައްޔަގެ ފަރާތުން ފާއިތުވި ދެ ތިން އަހަރު ފެނުނު ކުޅުމަށް އަޅާބަލާއިރު މި އަހަރު ފެންނަނީ މުޅިން ތަފާތު މަންޒަރެކެވެ. "އަޅުގަނޑު ހީކުރިވަރަށް ވުރެ މާބޮޑުތަން ރަނގަޅު،" އަލީ އުމަރުގެ ކުޅުން ސިފަކުރަމުން ނިއުގެ ކޯޗު މުހައްމަދު ޝިޔާޒް (މޯހަން) ކުރިން ބުންޏެވެ. "އަޅުގަނޑު ހަގީގަތުގައި ފުރަތަމަ (އަލީ އުމަރު) އައި އިރު އެހާ އުންމީދެއް ނުކުރަން އޭނާގެ ފަރާތުން މި ފެންވަރުގެ ކުޅުމެއް ފެނިދާނެ ކަމަށް ނުވަތަ މިއާ ކައިރިކުރާ ވަރުގެ ކުޅުމެއް ފެނިދާނެ ކަމަކަށް ވެސް އުންމީދެއް ނުކުރަން. ހަގީގަތުގައި އުންމީދެއް ނުކުރަން ކޮންމެ ދުވަހަކު (ފުރަތަމަ) 11 އަށް (އަލީ އުމަރު) ލައިގެން ފައްޓާނެކޭ ވެސް." މި ސީޒަންގައި އައްޔަގެ ފަރާތުން ފެނުނު ކުޅުމަށް ހެކިދޭ އެއް ކަމަކީ ހަވީރު ސްޕޯޓްސް އެވޯޑްސްގެ އެންމެ މޮޅު ފުޓްބޯޅަ ކުޅުންތެރިއާގެ މަގާމަށް ލީގުގެ ފުރަތަމަ ބުރުން ވާދަކުރާ ގަދަ ފަހެއްގައި އޭނާ ހިމެނުމެވެ. މިއީ އަހަރުތަކަކަށް ފަހު އެވޯޑަށް ވާދަކުރާ ގަދަ ފަހެއްގައި، 2006 ވަނަ އަހަރު މޮޅު ކުޅުންތެރިއާގެ މަގާމް ހޯދި އައްޔަ ހިމެނުނު ފަހަރެވެ. އައްޔަގެ ފަރާތުން މިހާރު ފެންނަ ތަފާތު ކުޅުމުގެ އެންމެ ބޮޑު ސިއްރަކީ އޭނާގެ ފިޓްނަސް ލެވެލް ރަނގަޅުކުރުމެވެ. މިދިޔަ ސީޒަންގައި ވީބީގެ ކޯޗު ތުރުކީގެ ޖޭން ވަންލީ ވަނީ އަލީ އުމަރުގެ ފިޓްނަސް ދަށް ކަމަށް ބުނެފަ އެވެ. އަދި އޭނާ އަކީ ފިޓްނަސް ރަނގަޅުކޮށްފި ނަމަ އަދިވެސް ރަނގަޅަށް ކުޅެވޭނެ ކުޅުންތެރިއެއް ކަމަށް ވަންލީ ބުންޏެވެ. މި ސީޒަންގައި އައްޔަގެ ފިޓްނަސް ރަނގަޅުކުރިއިރު، ދަނޑުމަތީގައި ކުރިން ނުފެންނަ ވަރަށް ައައްޔަ މަސައްކަތްކުރާކަން ވެސް ވަނީ ފާހަގަކުރެވިފަ އެވެ. ސީޒަން ގާތްގަނޑަކަށް ދެބައިވެފައިވާއިރު ނިއު އޮތީ ލީގު ތާވަލްގެ އެއްވަނައިގަ އެވެ. މި ސީޒަންގައި ބާކީ އޮތް ބައިގައި އައްޔަ މިހާތަނަށް ދައްކަމުންދާ ކުޅުމުގެ ފެންވަރު ދަމަހައްޓައިފި ނަމަ، ސީޒަން ނިމޭއިރު މޮޅު ކުޅުންތެރިންގެ ލިސްޓަށް އޭނާ އެރުމުގެ ފުރުސަތު ވެސް އެބައޮތެވެ. ނިއު އަށް ކުޅުމަށް ފަހު 2007 ވަނަ އަހަރުން ފެށިގެން ވީބީ އަށް ކުޅުނު އައްޔަ އެނބުރި ނިއު އަށް ދިޔައީ "ކުޅުން ހުއްޓާލަން ބޭނުންވަނީ ސަޕޯޓުކުރާ ޓީމުގައި ހުރެގެން" ކަމަށް ބުނެ އެވެ. ޔޫތު ސްޕޯޓްސް ކްލަބުން 1997 ވަނަ އަހަރު ކެރިއަރު ފަށައި އައްޔަ ވަނީ 1998 އިން 2003 އަށް ވެލެންސިއާ އަށް ކުޅެފަ އެވެ. ހަވީރު ރަންބޫޓު 2000 ވަނަ އަހަރު ހޯދި އައްޔަ ވަނީ ވެލެންސިއާ ދޫކޮށް އައިލެންޑް ފުޓްބޯލް ކްލަބް (އައިއެފްސީ) އަށް 2004 ވަނަ އަހަރު ކުޅެފަ އެވެ. އެކަމަކު ހަމަ އެ އަހަރުގެ ގައުމީ ފުޓްބޯޅަ މުބާރާތަށް އައިއެފްސީ ކޮލިފައިނުވުމުން އައްޔަ ވަނީ އެނބުރި ވެލެންސިއާ އަށް ބަދަލުވެ އެ މުބާރާތުގައި ކުޅެފަ އެވެ. އަދި 2005 ވަނަ އަހަރު ވެސް އައްޔަ ކުޅުނީ ވެލެންސިއާ އަށެވެ. އައްޔަ އެންމެ ކުޅެން ބޭނުންވާ ކްލަބު ކަމަށްވާ ނިއު އަށް އޭނާ ބަދަލުވީ 2006 ވަނަ އަހަރު އެވެ. އަދި އޭނާގެ ކެރިއަރުގައި އެންމެ ކާމިޔާބު އެއް އަހަރަށްވީ އައްޔަ ނިއު އަށް ކުޅުނު އަހަރެވެ. އައްޔަގެ ކެޕްޓަންކަމުގެ ދަށުން ނިއު އިން ދިވެހި ލީގުގެ އައްޑަނަ ފުރަތަމަ ފަހަރަށް އުފުލާލިއިރު، ހަވީރުން ހޮވި އަހަރު އެންމެ މޮޅު ފުޓްބޯޅަ ކުޅުންތެރިއާގެ މަގާމު ވެސް އެ އަހަރު އައްޔަ ވަނީ ހޯދައިފަ އެވެ.