މާލޭގެ 3 ގެއެއް ބަލައިފާސްކޮށް, މަސްތުވާތަކެތި ހޯދައި 4 މީހަކު ފުލުހުން ހައްޔަރުކޮށްފި އެވެ.
މިމައްސަލައާއި ގުޅިގެން ފުލުހުން ހައްޔަރު ކޮށްފައިވަނީ 27 އަހަރުގެ ފިރިހެނަކާއި, 19 އަހަރުގެ ފިރިހެނަކާއި, 23 އަހަރުގެ ދެ ފިރިހެނުންނެވެ.
މިމީހުން ފުލުހުންގެ ބެލުމުގެ ދަށަށް ގެންގޮސްފައި ވަނީ މިދިޔަ ޑިސެމްބަރު މަހުގެ 22 ން މިއަހަރުގެ ޖެނުއަރީ މަހުގެ 2 ވަނަ ދުވަހުގެ ނިޔަލަށް ޑްރަގް އެންފޯސްމަންޓް ޑިޕާޓްމަންޓުން ހިންގި ހާއްސަ އޮޕަރޭޝަނުގެ ތެރެއިންނެވެ.
އެގޮތުން މި މީހުން ފުލުހުންގެ ބެލުމުގެ ދަށަށް ގެންގޮސްފައިވަނީ ޖެނުއަރީ މަހުގެ 2 ވަނަ ދުވަހުގެ 19:47 ހާއިރު މަސްތުވާތަކެތި ގެންގުޅެ އެތަކެތީގެ ވިޔަފާރިކުރާކަމަށް ލިބުނު މަޢުލޫމާތަކާއި ގުޅިގެން މާލޭގެ 3 ގެއެއް ބަލައިފާސްކުރުމުގެ ތެރެއިންނެވެ.
ފުލުހުންގެ ބެލުމުގެ ދަށަށް ގެންގޮސްފައިވާ މީހުންގެ ތެރެއިން 23 އަހަރުގެ މީހެއްގެ ގެއަށް ކޯޓު އަމުރެއްގެ ދަށުން ވަދެ އެގެ ބަލައިފާސްކުރިއިރު, އެގޭގެ ފުރަތަމަ ފަންގިފިލާގައި ހުރި ކޮޓަރިއެއްގެ ތެރެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި 3 ރަބަރު ގަނޑު ފެނިފައިވެއެވެ.
މީގެއިތުރުން މިމައްސަލައާއި ގުޅުންހުރި ދެ ގެއެއްވެސް ބަލައިފާސްކޮށްފައިވެއެވެ. އެދެގެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި ފިލްމު ހުސްކުރި ދަޅަކާއި ދެ ސެލޯފިންކޮޅުގެ އިތުރުން 35 ރަބަރު ޕެކެޓް ފެނިފައިވެއެވެ.
މިމައްސަލާގައި ފުލުހުންގެ ބެލުމުގެ ދަށަށް ގެންގޮސްފައިވާ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުންވަނީ ބަންދުގައި ބަހައްޓައިގެން ތަހުޤީޤު ކުރިއަށް ގެންދިޔުމަށް 10 ދުވަހުގެ މުއްދަތެއް ދީފައެވެ.
މިމައްސަލަ ޑްރަގް އެންފޯސްމަންޓް ޑިޕާޓްމަންޓުން ދަނީ ތަހުޤީޤު ކުރަމުންނެވެ.