އޭޝިއާގެ ގައުމު ތަކުގެ ތެރެއިން ޕްރީސްކޫލް ތައުލީމް ހިލޭ ފޯރުކޮށްދޭ ފުރަތަމަ ގައުމުގެ ޝަރަފް ރާއްޖެއަށް ލިބިފައިވާ ކަމަށް އެޑިޔުކޭޝަން މިނިސްޓަރު ޑރ. އައިޝަތު ޝިހާމް ވިދާޅުވެއްޖެ އެވެ.
އެންމެ ކުއްޖަކުވެސް ބާކީ ނުކޮށް ޕްރީ ސްކޫލްގެ ތައުލީމް ކޮންމެ ރަށަކުން ވެސް ހިލޭ ލިބޭނެ އިންތިޒާމް ހަމަޖެއްސުމުގެ މަޝްރޫއު ފެށުމަށް ރޭ ދަރުބާރު ގޭގައި ބޭއްވި ހާއްސަ ރަސްމިއްޔާތުގައި ވާހަކަ ދައްކަވަމުން އެޑިއުކޭޝަން މިނިސްޓަރު ޑރ. އައިޝަތު ޝިހާމް ވިދާޅުވީ 2030 ވަަނަ އަހަރު އަންނަންވާއިރަށް ހުރިހާ ގައުމަކުން ޕްރީ ސްކޫލް ތައުލީމް ފޯރުކޮށްދޭން ޖެހޭނެ ކަމަށް އދ. އިން ކަނޑަ އަޅާފައިވާ ކަމަށެވެ. އެގޮތުން ރާއްޖެއިން ވަނީ މިކަމާ ގުޅޭ ކުރިއަށް އޮތް 15 އަހަރު ދުވަހުގެ ޕްލޭން ފެށުމުގެ ކުރިން ދެ އަހަރުގެ ޕްރީސްކޫލް ތައުލީމް ފުރުސަތު ފަހި ކޮށްދީފައި ކަމަަށްވެސް ވިދާޅުވި އެވެ.
މިނިސްޓަރު ވިދާޅުވީ އަންނަ އަހަރު ކިޔަވަން ފެށުމާއެކު ސަރުކާރުން ކަނޑަ އަޅާ ވަކި ސްކޫލް ތަކެއްގައި ނުވަތަ މިނިސްޓްރީގެ ބެލުމުގެ ދަށުގައިވާ ސަރުކާރުގެ ސްކޫލްތަކުގައި ހިލޭ ޕްރީސްކޫލް ތައުލީމް ދޭން ފަށާނެ ކަމަށެވެ. އަދި މިއަހަރުގެ ކިޔެވުން ފެށުނުއިރު މާލެއާއި އައްޑޫ ސިޓީ ފިޔަވާ ރާއްޖޭގެ ހުރިހާ ރަށެއްގައި ޕްރީސްކޫލު ތަކުގައި ހިލޭ ކިޔަވައިދޭން ފަށާފައިވާ ކަމަށްވެސް މިނިސްޓަރު ވިދާޅުވި އެވެ.