މިދިޔަ ދެ މަހުގެ ކަރަންޓް ބިލް ނުދައްކައިގެން، ސ. ހިތަދޫގައި ހުންނަ އަމިއްލަ ހޮސްޕިޓަލް އައިއެމްޑީސީން ކަރަންޓް ކަނޑާލީ، ފެނަކަ ކޯޕަރޭޝަންގައި އަމަލުކުރާ ކަރަންޓްގެ ހިދުމަތް ދިނުމާ ބެހޭ ގަވައިދާ އެއްގޮތަށް ކަމަށް އެ ކުންފުނިން މިއަދު ބުނެފި އެވެ. މި ސަރުކާރުގެ ކުރީގެ ހެލްތު މިނިސްޓަރު ޑރ. މަރިޔަމް ޝަކީލާގެ ހިއްސާ އޮންނަ ސިމްޑީން ހިންގާ އައިއެމްޑީސީން މިދިޔަ އަންގާރަ ދުވަހު ކަރަންޓް ކަނޑާލި މައްސަލާގައި ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމާއި ހިތަދޫ ދެކުނު ދާއިރާ މެމްބަރު އަލީ ނިޒާރު އިއްޔެ ނޫސްވެރިންނާ ބައްދަލު ކުރައްވައި ދެެއްކެވި ވާހަކަތަކަށް އިޝާރާތްކޮށް، ފެނަކައިން ނެރުނު ބަޔާނެއްގައި ބުނީ، އައިއެމްޑީސީއާ މެދު ވެސް އަމަލު ކުރީ ފެނަކައިގެ އެހެން ކަސްޓަމަރުންނެކޭ އެއް ފަދައިންއިން ކަމަށެވެ. އަދި ކަރަންޓް ބިލާ ހަވާލު ނުވާ ނަމަ، އޮންނަ އުސޫލުގެ ތެރެއިން ނޯޓިސް ފޮނުވުމަށް ފަހު ކަރަންޓް ކަނޑާލާނެ ކަމަށް ފެނަކައިން ބުންޏެވެ. ނިޒާރު އިއްޔެ ވިދާޅުވީ އައިއެމްޑީސީ ހޮސްޕިޓަލްގައި ބަލި މީހުން ވެސް ތިއްބައި ކަރަންޓް ކަނޑާލުމަކީ ސަރުކާރުން ހިންގި އިންސާނިއްޔަތާ ހިލާފު ބޮޑު ޖަރީމާއެއް ކަމަށެވެ. އަދި ހަނގުރާމަތަކުގައި ވެސް ހޮސްޕިޓަލްތަކާއި ސްކޫލް މަދަރުސާތަކަށް ހަމަލާ ނުދޭ ކަމަށް އޭނާ ވިދާޅުވި އެވެ. ހިތަދޫގައި ހުންނަ އައިއެމްޑީސީ ހޮސްޕިޓަލް.---ހަވީރު ފައިލް ފޮޓޯ ރޮޒައިނާ އިއްޔެ ވިދާޅުވީ އައިއެމްޑީސީން ކަރަންޓް ކަނޑާލުމަކީ ސިޔާސީ ކަމެެއް ކަމަށެވެ. އަދި އެކަން އެގޮތަށް ކުރީ މި މަހުގެ 1 ވަނަ ދުވަހު އިދިކޮޅު ފަރާތްތަކުން މާލޭގައި ބޭއްވި މުޒާހަރާގައު ޑރ. ޝަކީލާ ވެސް ބައިވެރިވެވަަޑައިގަތުމުން ކަމަށް ވިދާޅުވި އެވެ. ފެނަކަ އިން ބުނީ ކަމުގެ ހަގީގަތް ނުބަލައި، ކުންފުންޏާ ދޭތެރޭ ކަސްޓަމަރުންގެ އިތުބާރު ގެއްލޭ ގޮތަށް ވާހަކަ ދެއްކުމަކީ ހިތާމަ ހުރި ކަމެއް ކަމަށެވެ. "ވީމާ އެއްވެސް ހަގީގަތެއް ނުބަލައި މި ކުންފުނީގެ ކަސްޓަމަރުންގެ ގޮތުގައި ތިބި އާންމު ރައްޔިތުންނާ ދޭތެރޭ އިތުބާރު ގެއްލޭ ގޮތަކަށް، މި ކުންފުންޏާ ދޭތެރޭ ދެކޭ ގޮތް ބަދަލުވާ ފަދަ ވާހަކަތައް އެއްވެސް ފަރާތަކުން ނުދެއްކުމަކީ ކުންފުނީގެ ވަރަށް ބޮޑު އެދުމެކެވެ،" ބަޔާނުގައިވެ އެވެ. "އަދި މިފަދަ ވާހަކަތައް ދެއްކުމަކީ ކުންފުނިން ވަރަށް ހިތާމަ ކުރާ ކަމެކެވެ." އައިއެމްޑީސީގެ ރެސެޕްޝަން އޭރިއާ: އެތަނަށް މިހާރު ކަރަންޓް ދެނީ އަމިއްލަ ޖަނަރޭޓަރަކުން.--ފޮޓޯ: ކިއުންތެރިއެއް އައިއެމްޑީސީން ބިލް ނުދައްކައިގެން އަންގާރަ ދުވަހު ކަރަންޓް ކަނޑާލުމުން އެތަަނަށް މިހާރު ކަރަންޓް ދެނީ އަމިއްލަ ޖަނަރޭޓަރެއް ބޭނުންކޮށްގެންނެވެ. މި މައްސަލާގައި ޑރ. ޝަކީލާ ކުރައްވާފައިވާ ޓްވީޓެއްގައި ވިދާޅުވީ "ހައްލެއް ހޯދަން ފުރުސަތެއް ނުދީ ސިއްހީ ފަރުވާ ދޭ ތަނަކުން ޖެއްސުމަށް ކަރަންޓް ކަނޑާލުމަކީ އިންސާނިއްޔަތަށް ދެވޭ ހިތާމަވެރި އަނިޔާއެއް" ކަމަށެވެ. އައްޑޫ ސިޓީ ކައުންސިލުން ނެރުނު ބަޔާނެއްގައި ބުނެފައި ވަނީ އައިއެމްޑީސީން ކަރަންޓް ކަނޑާލުމަކީ ފަހުގެ ތާރީހެއްގައި ސަރުކާރަކުން، އެ ގައުމެއްގެ ހޮސްޕިޓަލަކުން ކަރަންޓް ކަނޑާލި ފުރަތަމަ ފަހަރު ކަމަށާއި ބައިނަލްއަގްވާމީ މިންގަނޑުތަކަށް ތަބާވެ ހޮސްޕިޓަލް ފަދަ އިންސާނީ ހިދުމަތް ދޭ ތަންތަނުން ކަރަންޓް ކަނޑާލައިގެން ނުވާނެ ކަމަށެވެ. އެހެންވެ އައިއެމްޑީސީ އަށް ވީހާ ވެސް އަވަހަށް ކަރަންޓް ލިބޭނެ ގޮތެއް ހަމަޖައްސައި ދިނުމަށް ކައުންސިލުން ވަނީ ކަމާއި ބެހޭ ފަރާތްތަކަށް އިލްތިމާސްކޮށްފަ އެވެ. އައިއެމްޑީސީން ބުނިގޮތުގައި އެ ހޮސްޕިޓަލްގެ މިދިޔަ ދެ މަހުގެ ކަރަންޓް ބިލަށް އެރީ 120،000ރ. އެވެ. އެކަމަކު ބިލާ އެ ހޮސްޕިޓަލުން ހަވާލުނުވީ ކަމަށް ފެނަކައިން ބުންޏެވެ.